၂၀၂၅ ဇန်နဝါရီ ၁၀ သောကြာနေ့ မနက်လေယာဥ်နဲ့ Sharm El-Sheikh ဆီသွားတယ်။ လေယာဥ်က တနာရီသာသာ စီးရတယ်။ လေဆိပ်မှာ ပတ်စ်ပို့စ်တွေစစ်တော့ ဝိုင်းရဲ့ဗီယက်နမ်ပတ်စ်ပိုစ့်မှာ တံဆိပ်တုံးရှာမတွေ့လို့ ယူအန်ပတ်စ်ပို့စ်ပြမှ အဆင်ပြေသွားတယ်။ Sharm El-Sheikh လေဆိပ်ကနေထွက်တော့ တက္ကစီသမားက စောင့်နေတယ်။ ကားကမထွက်သေးဘဲရပ်နေလို့ မေးကြည့်တော့ တိုးရစ်ကားတွေကို စောင့်ရှောကပေးမဲ့ escort ကားကိုစောင့်နေတာတဲ့။ Sharm El-Sheikh ကနေ Dahab အထိ တနာရီလောက်ပဲ မောင်းရတယ်။ လမ်းတလျှောက် လုံခြုံရေးတင်းကျပ်တယ်။ ဘေးကအစ္စရေးနိုင်ငံက ကျူးကျော်ဝင်ရောက်လို့ ၇ ရက်စစ်ပွဲဖြစ်ခဲ့တယ်တဲ့။ တောတောင်ရေမြေက ကိုင်ရိုနဲ့ အင်မတန်ကွာတယ်။ မြေနီတောင်၊ ကျောက်တောင်၊ အပင်တွေကအစ ကိုင်ရိုနဲ့တခြားစီပဲ။ မိုးတွေတအားသည်းသည်းမည်းမည်းရွာ ရှေ့ကကားကိုမမြင်ရလို့ ဘီးလိမ့်ရုံဖြည်းဖြည်းလေးပဲ မောင်းရတယ်။ ဝိုင်းက သူအီဂျစ်ရောက်တာ နှစ်နှစ်ကျော်ပြီ ဒီတခါပဲမိုးရွာတာ တွေ့ဖူးသေးတယ်တဲ့။ ငါတို့ကို မိုးနတ်မင်းကြီးက ကြိုဆိုတာ။ Dahab က Gulf of Aqaba ပင်လယ်မှာရှိတဲ့ ကမ်းခြေမြို့လေး။ ဘေးတဖက်က ဆော်ဒီအာရေဗျနိုင်ငံ။ နိုင်ငံခြားသားများပြီး တကယ့်ကိုအေးချမ်း အပန်းဖြေဖို့ကောင်းတဲ့ မြို့လေး။ ပင်လယ်စာ အင်မတန်စားကောင်းတယ်။ မြင်ရတဲ့ရေကလဲ ကြည်လင်နေတာ snorkeling လုပ်တဲ့သူ၊ လှေလှော်တဲ့သူနဲ့။ အီဂျစ်နိုင်ငံထဲလို့ မထင်ရဘူး။ ကမ်းခြေတလျှောက်က ဆိုင်တွေလိုက်ကြည့်ကြပြီး ဟိုတယ်ပြန်နားတယ်။ ည ၁၀ နာရီ Mount Sinai တောင်တက်ပြီး မနက်နေထွက်တာကို ကြည့်ကြမှာ။
Happy Traveling!
စန်းထွန်း
အောက်တိုဘာ ၂၂၊ ၂၀၂၅။
 |
| form Sharm El-Sheikh to Dahab |
 |
| Dahab |
No comments:
Post a Comment