နနယူးယောက် အပ်စတိတ်ဖက်က Cold Spring ကို ၂၀၁၄ မှာ ဝိုင်းနဲ့၊ ၂၀၁၇ မှာ အမေ၊ မကြီးတို့နဲ့ ရောက်ဖူးတယ်။ နွေရာသီရောက်တိုင်း အပ်စတိတ်အဝေးဆုံး ဘူတာကနေစပြီး ဘူတာတိုင်းကို ဟိုက်ကင်းထွက်မယ်လို့ စိတ်ကူးထားတာ ဒီနှစ်တော့ အကောင်အထည် ဖေါ်ဖြစ်တယ်။ ဇှုလှိုင် ၁၃ စနေနေ့ ဂရမ်းစင်ထရယ်ကနေ မနက် ၈ နာရိ ၄၅ မိနစ် ထွက်တဲ့ရထားစီး။ ၂ နာရီစီး Hudson ဟက်ဆန်ရထားလိုင်းအဆုံးက Poughkeepsie ပေါ့ကီးစကီးမြို့။ အဲ့ဒီနေ့မှာ အပူချိန်က ၉၀ ဒီဂရီဖာရင်ဟိုက် ကျော်တယ်။ ရထားဘူတာကနေ Walkway over the Hudson ဆီကို မိနစ် ၄၀ လောက် လျှောက်ရတယ်။ ဟက်ဆန်မြစ်ပေါ် ဖြတ်ကျော်ဖောက်လုပ်ထားတဲ့ ရထားသံလမ်းပါတဲ့ တံတားဟောင်းမှာ လမ်းလျှောက်ရတယ် စက်ဘီးစီးလို့ရတယ်။ စက်ဘီးစီးတဲ့သူ တော်တော်များတယ်ထင်တယ် စက်ဘီးငှားတဲ့ဆိုင်ရှိတယ်။ တံတားအစပဲရှိသေးတယ် ဗိုက်ဆာလာလို့ သယ်လာတဲ့မုန့်တွေ စားကြတယ်။ အားရှိမှ ဟိုက်ကင်းထွက်နိုင်မှာပေါ့နော့။ တံတားပေါ်ကနေ မြင်ရတဲ့မြင်ကွင်းက အတော်လှတယ်။ ဆောင်းဥ◌ီးရာသီ သစ်ရွက်တွေ အရောင်ပြောင်းတဲ့အချိန်ဆို သိပ်လှမှာပဲ။ ဆောင်းဥ◌ီးရာသီချိန် ပြန်လာချင်တယ်။ ရေခဲမုန့်ရောင်းတဲ့ ဥ◌ီးလေးကြီးက ဝိုင်းနဲ့ကိုယ် နှစ်ယောက်တွဲ ဓာတ်ပုံရိုက်ပေးတယ်။ အစကတော့ ငြင်းနေတာ ဆယ်ဖီရိုက်တာ ဘယ်လိုမှ အဆင်မပြေဘူး။ ဒါနဲ့ ဓာတ်ပုံရိုက်ပေးဖို့ အကူအညီတောင်းရတယ် ဆူနမ့်ဆီပို့မလို့။ ဆူနမ်ကတော့ ထုံးစံအတိုင်း ပူလွန်းလို့ ဘယ်မှမသွားဘူးတဲ့။ တံတားအဆုံးမှာ မုန့်ဆိုင်၊ ရေဖြည့်လို့ရ၊ အိမ်သာရှိတယ်။ ရေဖြည့်တဲ့နေရာ မရှိမှာစိုးလို့ ကိုယ်က ရေဘူးနှစ်ဘူး ဆောင်လာတယ်။ ဟက်ဆန်မြစ်ကမ်းဘေးအတိုင်းလမ်းလျှောက တံတားတစီးကိုဖြတ်ကျော်။ ဟက်ဆန်မြစ်ကမ်းဘေးမှာ ထိုင်နား။ အဲ့ဒီလိုမြစ်ချောင်းအင်းအိုင် ရေကန်ဘေးနား သစ်တောသစ်ပင် စိမ်းစိမ်းလေးတွေမြင်ရရင စိတ်ချမ်းသာတယ်။ ပြီးတော့ အူဘာစီးပြီး ၁၅ မိနစ်အဝေးက Locust Groove Estate ကို သွားလည်ကြတယ်။ ကြေးနန်းတီထွင်သူ ဆင်မြူရယ်မော့ဆက်ရဲ့အိမ်ကို နာမည်ကြီးဗိသုကာပညာရှင်က ဒီဇိုင်းဆွဲပေးထားတယ်။ ကြေးနန်းဆိုတာကို ကြားသာကြားဖူးပြီး ဘာမှန်းမသိတဲ့ ကိုယ်တို့လိုလူမျိုးတွေအတွက် အတော်စိတ်ဝင်စားစရာကောင်းတယ်။ ဓာတ်ပုံရိုက်ခွင့်မပြုလို့ မရိုက်ခဲ့ရဘူး။ ဟိုက်ကင်းထရေးလမ်း၊ ရေကန်၊ သီးနှံစိုက်ခင်း၊ ပန်းချီပြခန်းတွေနဲ့ သာယာလှပတယ်။ အူဘာငှားစီးပြီး ရထားဘူတာဆီသွားတာ ရထားမှီလို့ တော်သေးတယ်။ ပင်ပန်းလို့ ရထားပေါ်မှာ အိပ်ပျော်သွားတယ်။
Happy Traveling!
စန်းထွန်း
No comments:
Post a Comment