ယူအက်စ်သွား တောလား - ၂

ဇွန် ၁၈ ကနေ ၂၀ ထိ  ဖီလာဒဲဖီးယား၊ ဝါရှင်တန်ဒီစီ၊ နိုင်အာဂရာရေတံခွန် ၂ ညအိပ် ၃ ရက်ခရီး စတင်ပါတယ်။ မနက် ၇ နာရီ ဖလပ်ရှင်းစုရပ်မှာ သွားစောင့်၊ တရုတ်တန်းဆီ ကြိုပို့လုပ်ပေးတဲ့ ဖယ်ရီကားကိုစီး၊ မနက် ၈ နာရီသာသာမှာ တရုတ်တန်းကနေ စထွက်ပါတယ်။ ကျွန်မဘေးနားမှာ ထိုင်ရတာက အိန္ဒိယအစ်မကြီး၊ ကျွန်မတို့နောက်မှာက သူ့အမျိုးသားနဲ့ ဆယ်ကျော်သက်အရွယ် သူ့သမီး။ မက်ဟက်တန်ကနေ ဟော်လန်တန်နယ် မြေအောက်လှိုဏ်ခေါင်းကို ဖြတ်ပြီးရင် ဂျာစီစီးတီး နယူးဂျာဆီပြည်နယ်ကို ရောက်ပါတယ်။ ဟော်လန်တန်နယ်ဟာ ဟတ်ဆန်မြစ်အောက်ကနေ ကားတွေအတွက် ဖောက်လုပ်ထားတဲ့ အစောဆုံး မြေအောက်လှိုဏ်ခေါင်း နှစ်ခုထဲက တစ်ခုဖြစ်ပြီး နောက်တစ်ခုက လင်ကွန်းတန်နယ်ပါ။ ဟော်လန်တန်နယ်ဆိုလို့ နယ်သာလန်၊ ဟော်လန်နိုင်ငံကို အစွဲပြုပြီး အမည်ပေးထားလို့ ထင်ရင် မှားပါတယ်တဲ့။ ပရောဂျက်ရဲ့ အင်ဂျင်နီယာချုပ် ကလစ်ဖို့ဟော်လန်ကို အစွဲပြုပြီး အမည်ပေးထားတာပါတဲ့။  ၁၉၂၀ မှာ စတင်ပြီး ၁၉၂၇ မှာ တန်နယ် ဆောက်လုပ်ပြီးစီးခဲ့ပေမဲ့ အင်ဂျင်နီယာချုပ် ကလစ်ဖို့ဟော်လန်က တန်နယ်မပြီးဆုံးခင်မှာ သေဆုံးသွားတာမို့ တန်နယ်ဒီဇိုင်နာ အိုလေးစင်စတဒ်က အဆုံးသတ်ခဲ့ရတယ်။ အဆောက်အဦး ၄ ခုကနေ ပန်ကာ ၈၄ ခုနဲ့လေဝင်လေထွက်ကောင်းအောင် တည်ဆောက်ထားတာမို့ လှိုဏ်ခေါင်းထဲမှာပေမဲ့ လေဝင်လေထွက်ကောင်းတယ်။ တန်နယ်တွေမှာ လေဝင်လေထွက်က အရေးကြီးပါတယ် ကားတွေဆီကထွက်တဲ့ ကာဗွန်ဒိုင်အောက်ဆိုဒ် ဓာတ်ငွေ့တွေကို ရှုရှိုက်ပြီး အသက်ဆုံးရှုံးနိုင်တာကိုး။

Philadephia Independence Hall 

နယူးဂျာဆီပြည်နယ်ရဲ့ နာမည်ပြောင်က Garden State ၊ နယူးယောက်ပြည်နယ်ရဲ့ နာမည်ပြောင်က အင်ပါယာစတိတ်တဲ့။ နယူးဂျာဆီပြည်နယ်ရဲ့ ထူးခြားချက်က ဓာတ်ဆီဈေး အင်မတန် သက်သာတယ်။ ဒါကြောင့် ဟော်လန်တန်နယ်ကအထွက်မှာ ဓာတ်ဆီဆိုင်မှ အများကြီးပဲ။ အိမ်ငှားခလည်း သက်သာတယ်၊ တက်စ်လည်း နယူးယောက်ထက် နည်းတယ်။ အစက နယူးဂျာဆီမှာ နေမလား စဉ်းစားသေးတယ် ဟော်လန်တန်နယ်၊ လင်ကွန်းတန်နယ်၊ မြေအောက်လှိုက်ခေါင်းမှာ တခုခုဖြစ်ရင်၊ ဂျော့ဝါရှင်တန်တံတားမှာ တစ်ခုခုဖြစ်ရင် စောင့်ပေတော့ တမေ့တမော ထိုင်ငိုချင်လောက်တယ်။ နှင်းမုန်တိုင်းတိုက်လို့ နယူးဂျာဆီပြည်နယ်မှာ ရထား၊ ကားမထွက်ပေမဲ့ နယူးယောက်မှာတော့ မြေအောက်ရထားတွေ ထွက်တယ် ဒီလေးနောက်ကျတာတော့ ဖြစ်တာပေါ့။ နယူးယောက်က မြေအောက်ရထားတွေက ၂၄ နာရီ ရှိတယ်။ နယူးဂျာဆီမှာ ခရီးသည်တွေ တက်ကြပြီးတဲ့အခါမှာ တိုးဂိုက်က မိတ်ဆက်ပါတယ်။ တိုးဂိုက်နာမည်က ဟယ်လင်တဲ့ ပိန်ပိန်ရှည်ရှည် တရုတ်မ၊ နောက်တိုးဂိုက်နာမည်ကို မမှတ်မိတော့ဘူး ပုပုသေးသေး ပြုံးပြနှုတ်ဆက်ပြီး သဘောမနောကောင်းတဲ့ တရုတ်မလေး။ ထုံးစံအတိုင်း တရုတ်များတယ်၊ အိန္ဒိယတွေက ၁၀ ယောက်လောက် ရှိတယ်။ နယူးယောက်ကနေ တောင်ဖက်စူးစူး ၂ နာရီ မိုင် ၁၀၀ မောင်းပြီးတော့ ဖီလာဒဲဖီးယားကို ရောက်ပါတယ်။ ရာသီဥတုက ကောင်းကင်တခုလုံး မှောင်မည်းနေပြီး မိုးတဖြောက်ဖြောက် ရွာနေတယ်။

US Capitol

ဟိုဟာက လွတ်လပ်ရေးအဆောက်အဦး၊ ဟိုဟာက လွတ်လပ်ရေးခေါင်းလောင်း ဓာတ်ပုံရိုက်ကြနော်၊ နေ့လည်စာစားထား၊ နောက်တနာရီခွဲကြရင် ခုရပ်တဲ့နေရာမှာ ပြန်ဆုံမယ်တဲ့။ ခေါင်းလောင်းကိုဝင်ကြည့်ဖို့က လက်မှတ်ဝယ်ရမှာ ကြည့် ကျူတန်းကြီးက အရှည်ကြီးတဲ့ အပြင်ကနေပဲ ဓာတ်ပုံရိုက်ခဲ့ရတယ်။ မိုးရွာနေလို့ ဓာတ်ပုံရိုက်ပြီးတာနဲ့ food court ဆီ ပြေးကြတော့တယ်။ ဘူဖေးစတိုင် ကြိုက်တာယူ အလေးချိန်နဲ့ ကျသလောက်ရှင်းတဲ့ တရုတ်ဘူဖေးဆိုင်မှာပဲ စားဖြစ်တယ်။ မနှစ်က ဖီလာဒဲဖီးယား နေ့ချင်းပြန်ခရီး သွားလည်တုန်းကလည်း စားတာ အဲဒီဆိုင်ပဲ။ ရုံးက ပတ်ထရီရှာက ဖီလီချီစ်စတိတ် Philly Cheese Steak စားဖြစ်အောင်စားခဲ့လို့ မှာပေမဲ့ အေးရှန်းစာ ပိုကြိုက်တော့ တရုတ်စာပဲ စားဖြစ်တယ်။ ဖီလာဒဲဖီးယားဆိုတာ ဂရိဘာသာစကားနဲ့ Brotherly Love လို့ အဓိပ္ဗာယ်ရပါသတဲ့။ ဖီလာဒဲဖီးယားမှာ ဗြိတိသျှတွေဆီကနေ လွတ်လပ်ရေးကြေငြာစာတမ်းကို လက်မှတ်ရေးထိုးတဲ့မြို့မို့လို့အမေရိကန်သမိုင်းမှာ အရေးပါတဲ့မြို့၊ လွတ်လပ်ရေးမြို့ ဆိုပါတော့။ လွတ်လပ်ရေးကြေငြာစာတမ်း ဖတ်ပြီးတော့ တီးခတ်ကြတဲ့ ခေါင်းလောင်းတွေထဲက တစ်ခုကို လွတ်လပ်ရေးခေါင်းလောင်းအဖြစ် ပြတိုက်မှာ ပြသထားပါတယ်။ မနှစ်က ဖီလာဒဲဖီးယား တောလားတုန်းက ပထမဆုံး အမေရိကန်အလံ ပြုလုပ်ခဲ့တဲ့အိမ်ကို ရောက်ခဲ့သေးတယ်။ ပထမဆုံး အမေရိကန်အလံမှာ ဗြိတိသျှတွေက ခွဲထွက်ပြီး လွတ်လပ်ရေးကြေငြာတဲ့ ပြည်နယ် ၁၃ ကို ကိုယ်စားပြုတဲ့ ကြယ် ၁၃ လုံး၊  အဖြူအနီ ၁၃ လိုင်း ရှိပါတယ်။

National Museum of the American Indian

အခုလက်ရှိ အမေရိကန်အလံမှာ ပြည်နယ် ၅၀ ကို ကိုယ်စားပြုပြီး ကြယ်အလုံး ၅၀ ရှိတယ်။ ဒီနေ့ပဲ  Rocky ၊ Rambo ရုပ်ရှင်တွေရဲ့ သရုပ်ဆောင် စတာလုန်း အကြောင်း ကျွန်မ နှစ်သက်တဲ့ အေဘီစီသတင်းဋ္ဌာရဲ့ GMA (Good Morning America) အစီအစဉ်မှာ တွေ့လိုက်ရတယ်။ စတားလုံးဟာ အသက် ၇၀ ရှိပါပြီတဲ့။ ဖီလာဒဲဖီးယား အနုပညာပြတိုက်ရှေ့က လှေကားထစ် ၄၇ ထပ်ကို ပြေးတက်ပြီး လက်နှစ်ဖက်ကို ကာယဗလမောင်တွေလို မြှောက်ပြတဲ့ စတားလုန်းရဲ့ ရော့ကီစတိုင်နဲ့ဖီလာဒဲဖီးယား အနုပညာပြတိုက်ရှေ့မှာ ဓာတ်ပုံရိုက်လေ့ ရှိကြတယ်။ ဖီလာဒဲဖီးယား အနုပညာပြတိုက်ဘေးနားမှာ စတားလုန်းရဲ့ ရော့ကီရုပ်ထု ရှိပါတယ်။ ဖီလာဒဲဖီးယားမှာ Elfreth's Alley လို့ အမည်တွင်တဲ့ နှစ်ပေါင်း ၃၀၀ ကျော်ပြီဖြစ်တဲ့ ယူအက်စ်မှာ သက်တမ်းအရှည်ဆုံးလမ်းလေး ရှိပါတယ်။ ဗြိတိသျှက ပြောင်းရွှေ့လာတဲ့သူတွေ နေထိုင်ခဲ့ကြတဲ့အိမ်တွေမို့လို့ လန်ဒန်က အိမ်တွေနဲ့ တပုံစံတည်း လန်ဒန်ကို ရောက်နေတယ်လို့ ထင်ရတယ်။ ထုံးစံအတိုင်း တိုးရစ်တွေ လာကြည့်ကြတဲ့ လမ်းဆိုပါတော့။ ဖီလာဒဲဖီးယားရဲ့ တဖက်ကမ်း ကမ်ဒန်မြို့ Camden နယူးဂျာဆီပြည်နယ်က Adventure ရေသတ္တဝါပြတိုက်မှာ ဝေလငါး ရှိတယ် အတော်စုံတဲ့ ရေသတ္တဝါပြတိုက်လေး။ ဖီလာဒဲဖီးယားကနေ တောင်ဖက်စူးစူး ၂ နာရီခွဲ မိုင် ၁၄၀ လောက်မောင်းရင် ဝါရှင်တန်ဒီစီကို ရောက်ပါတယ်။ ဒီစီကိုရောက်တော့ နေက ခြစ်ခြစ်တောက် ပူနေတယ်။

National Air & Space Museum

National Air & Space Museum

နယူးယောက်ကို မြို့တော်လုပ်ဖို့ စဉ်းစားခဲ့ကြပေမဲ့ ဗြိတိသျှရေတပ်မတော်ကို ကြောက်လို့ မေရီလန်းပြည်နယ်၊ ဗာဂျီးနီးယား ပြည်နယ်တွေကနေ မြေတွေနည်းနည်းစီဖဲ့ပြီး ဝါရှင်တန်ဒီစီမြို့တော် တည်ဆောက်ခဲ့ပါတယ်။ ဟိုမှာ ကယ်ပီတယ်၊ ဒီမှာက အာကာသပြတိုက်ဆိုပြီး အချိန် ၂ နာရီ လည်ဖို့ ပေးပါတယ်။ အရင်တုန်းက ကယ်ပီတယ် အမိုးခုံးခုံးကြီးကို အိမ်ဖြူတော်လို့ ထင်နေတာ နောက်မှ ကယ်ပီတယ်မှန်း သိသွားတယ်။ ဆီးနိတ်၊ ဟောက်စ်၊ လွှတ်တော်အမတ်တွေ ငြင်းကြခုန်ကြ အဲလေ ဥပဒေတွေ ပြဋ္ဌာန်းတဲ့နေရာ ဆိုပါတော့။ ဒီစီမှာ ကျွန်မအကြိုက်ဆုံးနေရာ တစ်ခု။ ဒီစီရုံးက ကယ်ပီတယ်ဘေးမှာ နေ့လည်ထမင်းသွားစားရင် ကယ်ပီတယ်နားက ဖြတ်ရတယ်၊ တခါတလေ ကယ်ပီတယ်နားက ပန်းခြံမှာ နေ့လည်စာစား၊ ကလဲယားက ခေါက်လို့ရတဲ့ စက်ဘီးယူလာရင် ကယ်ပီတယ်နောက်မှာ စက်ဘီးသွားစီးတယ်။ တော်တော်လှတဲ့ အဆောက်အဦး အပြင်တင်လှတာ မဟုတ်ဘူး အထဲမှာလည်း တော်တော်လှတယ်။ အထဲကိုဝင်ဖို့ နာရီဝက်လောက် တန်းစီရတယ် ရေဘူး၊ မုန့် အကုန်လွှင့်ပစ်တယ်။ အထဲရောက်တော့လည်း နာရီဝက်လောက် တန်းစီရတယ်။ နံရံပြည့် ပန်းချီကားချပ်တွေ၊ အသက်ဝင် ပြောင်မြောက်တဲ့ ပန်းပုရုပ်တွေအကြောင်း ကယ်ပီတယ်တိုးဂိုက်က ရှင်းပြတယ်။ ၁ နာရီလောက် တန်းစီရကျိုးနပ်တယ်။ လွှတ်တော်အမတ်တွေနဲ့လည်း တွေ့ဆုံနိုင်ပါတယ်တဲ့။ ကယ်ပီတယ်က ပြုပြင်ထိန်းသိမ်းရေးတွေ လုပ်နေလို့ငြမ်းတွေဆင်ထားတော့ မလှဘူး။ ကယ်ပီတယ်ကနေ မိုးနှုးမတ်ကျောက်တိုင်၊ လင်ကွန်းမန်မိုရီယမ်၊ ပတ်တိုးမတ်မြစ်အထိ နေရှင်နယ်မောလ်လို့ ခေါ်ပါတယ်။

White House

နေရှင်နယ်မောလ်တလျှောက် ဘေးတဖက်တချက်စီမှာ  ပြတိုက်တွေချည်းပဲ။ ပြတိုက်တွေက ဝင်ကြေးအခမဲ့။ ကျွန်မအကြိုက်ဆုံးကတော့ National Air & Space Museum ၊ National Museum of American History၊ National Gallery of Art ပြတိုက်တွေပါ။ ပြတိုက်တခုလုံးရဲ့ အထပ်တိုင်း အခန်းတိုင်းကို နှံ့ဖို့ဆိုရင် ၄ ၊ ၅ နာရီလောက် အချိန်ပေးရမယ်။ နေရှင်နယ်မောလ်ကိုလည်း ပြုပြင်ထိန်းသိမ်းရေး လုပ်နေတယ်။ အမေ ကယ်ပီတယ်ကို  သိလားမေးတော့ သိတယ် အမေရိကန်ဗီဇာမှာ အဲဒီ့ပုံပါတယ် သတင်းမှာလည်း အမြဲတွေ့တယ်တဲ့။ သမ္မတကျမ်းကျိန်ပွဲ၊ မာတင်လူသာကင်း ချီတက်ပွဲတွေလုပ်တာ နေရှင်နယ်မောလ်မှာပေါ့။ သမ္မတရွေးချယ်ပွဲဆိုလို့ ၂၀၁၆ အမေရိကန်သမ္မတ ရွေးချယ်ပွဲကတော့ တကယ့်ကို အကျိတ်အနယ်ပဲ။ ရီဘာပလင်ကန်ဖက်က ဂျက်ဘုရှ်၊ ရွန်ပေါ၊ ခရစ်စတီး၊ Cruz ၊ Trump .... ၁၆ ယောက် ဘောလုံးတသင်းစာထက်တောင် များနေသေးတယ်။ ဒီမိုကရက်ဖက်က ဟီလာရီကလင်တန်၊ ဆန်ဒါ တကယ့်ကို ပွဲကြီးပွဲကောင်းပဲ။ ကယ်ပီတယ်ပေါ်မှာ လက်နက်ကိုင် အစောင့်တွေရှိတယ်။ ကမ္ဘာပေါ်မှာ လုံခြုံရေးအတင်းကျပ်ဆုံး နေရာထဲမှာ ကယ်ပီတယ်နဲ့ အိမ်ဖြူတော်ပါတယ်။ အမေရိကန်အင်ဒီးယန်းပြတိုက်ရှေ့မှာ ဓာတ်ပုံရိုက်ကြတယ် အဲဒီပြတိုက်ကို မရောက်ဖူးသေးဘူး။ နောက်တော့ အာကာသပြတိုက်ကို သွားလည်ကြတယ်။

The Monument 

၁၉၆၉  ဂျူလှိုင် အမေရိကန်အာသာယာဉ်မှုး နေးလ်အမ်းစထရောင်း လကမ္ဘာပေါ်မှာ ခြေချနိုင်တာကို အမေရိကန်တွေ သိပ်ဂုဏ်ယူတယ်။ အာကာသယာဉ်မှုးတွေ ဝတ်တဲ့ဝတ်စုံ၊ အာကာသယာဉ်တွေ၊ ဒစ်ကာဘာအာကာသယာဉ်၊ အာကာသစခန်းအကြောင်း၊ ဝှိုက်ညီနောင်ရဲ့ ပထမဆုံးလေယာဉ်ကနေ ဒုတိယကမ္ဘာစစ်အတွင်းမှာ သုံးခဲ့တဲ့လေယာဉ်တွေနဲ့ အတော်စိတ်ဝင်စားဖို့ကောင်းတယ်။ ညနေ ၄ နာရီ ထိုးခါနီးပြီမို့ ပြတိုက်ရှေ့မှာ တိုးကားကို သွားစောင့်တော့ မတွေ့ဘူး။ ဟိုနားရှာကြည့်လိုက်၊ ဒီနားရှာကြည့်လိုက်နဲ့ တိုးကား အစအနကို မမြင်ရဘူး တိုးကားများ နောက်ကျနေတာလား။ တိုးဂိုက်ဟယ်လင်က ဖုန်းဆက်လာတယ် ဘယ်မှာလဲ ပြတိုက်ရှေ့မှာ တိုးကားကို စောင့်နေတာ သူတို့လည်း ပြတိုက်ရှေ့မှာပဲတဲ့ ချပေးခဲ့တဲ့ နေရာမှာလေ ပြတိုက်ရှေ့နားမှာပဲ ချပေးခဲ့တာ ဒါပေမဲ့ ဒီနေရာတော့ မဟုတ်ဘူး။ ငါးမိနစ်လောက် စောင့်ပေးလို့ရမလား မရဘူး တက္ကစီငှားပြီး နောက်တနေရာကို လိုက်ခဲ့တော့။ တက္ကစီပေါ် ရောက်နေပြီ လိပ်စာကို မက်ဆေ့စ်ပို့ပေးပါ။ ကားဆရာကိုပြတော့ ခရူသင်္ဘောတွေ ရှိတဲ့နေရာ နှစ်ခုရှိတယ် သူသိတယ်တဲ့။ သူလည်း တိုးဂိုက်လုပ်ဖူးပါတယ် ဧည့်သည်တွေကို စောင့်ရမှာပေါ့တဲ့ ကားဆရာက အမည်း။ ဂူဂယ်မတ်မှာ ကားက သွားရမဲ့နေရာနဲ့ ပြောင်းပြန်ကြီး သွားနေလို့ ကားဆရာကိုမေးတော့ ကလေးမ ငါသိပါတယ်တဲ့ နေရာလည်းရောက်ရော သင်္ဘောနဲ့တူတာတောင် မတွေ့ဘူး။ ဂူဂယ်မတ်အတိုင်း မောင်းပေးလို့ မရဘူးလား ငါသိတယ် ကလေးမ ငါ ပင်ပန်းနေတယ် သင်္ဘောထွက်ချိန်က ဘယ်အချိန်လဲ ၄ နာရီခွဲ။ မှီအောင် မောင်းပေးမယ် တိုးဂိုက်က မရောက်သေးဘူးလားလို့ ဖုန်းဆက်လာတယ်။

Lincoln Memorial
ဒီပုံကတော့ wide angle lens နဲ့ ရိုက်ထားတာပါ... ဒါကြောင့် မြင်ကွင်းကျယ်ကျယ် မြင်ရတယ်..

Lincoln Memorial
ဒီပုံကတော့ အိုင်ပတ်နဲ့ ရိုက်ထားတာ

ဟိုမှာ ကျွန်မတို့ တိုးအဖွဲ့ မြင်ရပေမဲ့ တဖက်လမ်းမှာ ဒီလမ်းက တလမ်းမောင်းလမ်း ဟိုဖက်ကို တမျှော်တခေါ်ကြီး မောင်းပြီးမှ ရောက်မှာ စိတ်မပူနဲ့ ကလေးမ မှီအောင် မောင်းပေးမယ်။ ၄ နာရီ မိနစ် ၂၀ ရှိနေပြီ မှီပါ့မလား ကားဆရာက သူလည်း မသေချာဘဲနဲ့ ဂူဂယ်မတ်အတိုင်း မောင်းပေးပါဆိုတော့လည်း ပင်ပန်းနေတယ်လေး ဘာလေးနဲ့ တော်တော်ဆိုးတဲ့ ကားဆရာ။ ၄ နာရီခွဲ အတိမှာပဲ သင်္ဘောဆိပ်ကို ရောက်တယ် တိုးဂိုက်ဆီက လက်မှတ်ယူ သင်္ဘောပေါ်တက်တာနဲ့ စထွက်တယ် ကျွန်မတို့ကို စောင့်နေတာကိုး။ သင်္ဘောအပြင်ဖက်တန်းမှာ ထိုင်နေရာကနေ မိုးဖွဲဖွဲလေး ရွာလာလို့အထဲကို ဝင်ထိုင်တာ မှန်သွားတယ်။ နောက် မိုးသည်းလာလို့ လူတွေအားလုံး အတွင်းထဲ ဝင်လာတယ်။ ရာသီဥတုသာ ကောင်းမယ်ဆိုရင် ပတ်တိုးမတ်မြစ်အတိုင်း စုန်ဆင်းတဲ့ ခရူစ်သင်္ဘောခရီးစဉ်က အင်မတန် သာယာမှာ ခုတော့ မိုးက သည်းသည်းမည်းမည်း ရွာနေလို့ ဘာမှမမြင်ရဘူး။ ဟိုဟာက ပတ်တဂွန်၊ ဟိုဟာက ရိုနယ်ရီဂွန်လေဆိပ်လို့ပဲ အဖေတို့ကို ပြလိုက်တယ်။ ပြီးတော့ အိမ်ဖြူတော်ရှေ့သွားပြီး ဓာတ်ပုံရိုက်ကြတယ်။ အိမ်ဖြူတော်ဆိုလို့ အကြီးကြီးထင်နေတာ ကိုယ်တို့အိမ်ထက်တောင် သေးလှချည်လားလို့ တချို့တရုတ်တွေက ပြောကြတယ်တဲ့။ ကိုရီးယားမှာတော့ အိမ်ပြာတော်တဲ့။ နောက်တော့ လင်ကွန်းမန်မိုရီယမ်ဆီ သွားကြတယ် ဒီတခါတော့ ကားရပ်ပေးတဲ့နေရာကို အသေအချာ မှတ်ထားတယ်။ အမေက သမီး တိုးဂိုက်က မစောင့်တာလား မဟုတ်ဘူးအမေ သမီးက ကားရပ်ထားတဲ့နေရာကို မမှတ်မိတာ တိုးဂိုက်အမှားမဟုတ်ဘူး သမီးအမှား။

မိုးနှုမတ်ကျောက်တိုင်နဲ့ ကယ်ပီတယ်ကို လင်ကွန်းမန်မိုရီယမ်ရှေ့မှ မြင်ရစဉ်

လင်ကွန်းမန်မိုရီယမ်ရောက်တော့ မတက်တော့ဘူး အောက်ကနေပဲ ဓာတ်ပုံရိုက်တော့တယ်။ လူမည်းတွေ မဲပေးခွင့်ရအောင် တိုက်ပွဲဝင်ခဲ့တဲ့ မာတင်လူသာကင်းရဲ့ နာမည်ကျော် I have a dream မိန့်ခွန့်ကို လင်ကွန်းမန်မိုရီယမ်ကနေ နေရှင်နယ်မောလ်အပြည့်ဖြစ်နေတဲ့ လူအုပ်ကြီးကို ပြောခဲ့တာပါ။ "I have a dream" လို့ ကျောက်ပြားမှာ ထွင်းထားတယ်။ လင်ကွန်းမန်မိုရီယမ်ကနေကြည့်ရင် မိုးနှုးမတ်ကျောက်တိုင်၊ ကယ်ပီတယ်ကို လှမ်းမြင်ရတယ်။ တိုးဂိုက်က ဒီစီမှာ သူ့အကြိုက်ဆုံးနေရာက လင်ကွန်းမန်မိုရီယမ်၊ ဆူနမ်က ဒုတိယကမ္ဘာစစ်မန်မိုရီယမ်တဲ့ ကျွန်မကတော့ ကယ်ပီတယ်လို့ ရွေးမိမှာ အသေအချာပဲ။ တနာရီလောက် မောင်းပြီးတော့ ညနေစာစားဖို့ တရုတ်ဘူဖေးဆိုင်ကို သွားတယ်။ ဒီလမ်းတွေ ငါသိပါတယ်လို့ တွေးနေတာ ဆူနမ်တို့အိမ်နားက ကျွန်မတို့ သွားစားနေကျ ဘူဖေးဆိုင် ဖြစ်နေတယ်။ ည ၉  နာရီလောက်မှာ ဟိုတယ်ကို ရောက်ပါတယ်။ Standard Zoon EF - S - 18 - 135 mm Lens က လေးလို့  Wide Angle Lens EF -S - 10 - 18 mm pancake Lens နဲ့ပဲ ရိုက်ဖြစ်တယ်။ wide angle lens  နဲ့ ရိုက်တဲ့ဓာတ်ပုံတွေမှာ မြင်ကွင်းကျယ်ကျယ် မြင်ရတယ်။ ကော်နင်းမှန်ပြတိုက်၊ ဝတ်ကင်ဂလမ်းအမျိုးသားဥယျာဉ်ကို သွားရောက်လည်ပတ်တဲ့အကြောင်းကတော့ အပိုင်း ၃ အနေနဲ့ ရေးတင်ပါဦးမယ်။

စန်းထွန်း
သြဂုတ် ၁ ၊ ၂၀၁၅။

ရေးခဲ့ပြီးတာတွေက
ဖီလာဒဲပီးယားသွား တောလား 
All About DC - 1
All About DC - 2