အလွဲများ.....

မြန်မာပြည်မှာတုန်းကတော့ အတင်းတုတ်မယ်ဆိုရင် တပါးသူ မသိရလေအောင် လေသံတိုးတိုးလေးနဲ့ အတင်းတုတ်ကြတာ။ သိသွားရင် မျက်နှာ ပူစရာကြီးကိုး။ စလုံးမှာတော့ ရွှေမဟုတ်ဘူးလို့ ထင်ရင် လေသံလည်းမတိုး မကြည့်ဘဲ သူ့အကြောင်း မပြောသရောင် ခပ်တည်တည် ခပ်ပြောင်ပြောင် အတင်းတုတ်ကြတာ။

တခါက MRT(မီးရထား)မှာ ခုံနေရာမရသေးတော့ ရှေ့မှာထိုင်နေတဲ့ ကုလားကို ဒီကုလားက မထသေးဘူး၊ ဘယ်တော့များမှ ဆင်းမှာပါလိမ့်နဲ့ ပြောနေလိုက်ကြတာ ဆင်းခါနီး ကိုယ်တော်ချောက "ကျွှန်တော်လည်း ရွှေကုလားပါ"လို့ ပြောသွားတော့ အတင်းတုတ်တဲ့သူတွေခမျာ မျက်နှာပူပူ ပါးစပ်ဟောင်းလောင်းလေးနဲ့ ကျန်ခဲ့တာများ...

ဘူတာရောက်ခါနီး တံခါးဝမှာ အသင့်နေရာယူထားပေမဲ့ ဂိမ်းအဆော့မပျက်တဲ့ အတန်းထဲက ဂိုးမတ်တမ်ကြီးကို စလုံးထင်ပြီး အတင်းတုတ်ပုံက "ဒီကလေးမသာလေးကလည်း ဆင်းခါနီးတောင် ဂိမ်းဆော့မပျက်" တဲ့။

ကျောင်းမှာ Parallel Programming သင်တဲ့ ပရော်ဖက်ဆာ Bruce Lester က MIT(Massachusetts Institute of Technology) ကနေ Ph.D ရထားတာပါ။ ဇူလှိုင်လတုန်းက လန်ဒန်မှာ ကျင်းပခဲ့တဲ့ Parallel and Distributed Computing နိုင်ငံတကာညီလာခံမှာ the Best Paper Award of The 2011 ရထားပါတယ်။ ဒီအကြောင်း စကားစပ်ပြီး ပြောကြတော့

စန်းထွန်း း "Lester is bachelor."
မိုင်း း "No. He is Ph.D."

ဆူနမ်၊ ရာမား နဲ့ စန်းထွန်းတို့မှာ ရယ်လိုက်ကြတာ မျက်ရည်တောင် ထွက်တယ်။ bachelor ဆိုတာ ဘွဲ့ရလို့တင် အဓိပ္ပာယ်ရတာ မဟုတ်ဘဲ လူပျိုကြီးလို့လည်း အဓိပ္ပာယ်ရပါတယ်။

လွဲလွဲလေးလည်း ရယ်ရပါတယ်... းD

စန်းထွန်း
သြဂုတ် ၂၃၊ ၂၀၁၁။