Outer Banks သွား တောလား - ၁

ကျေးဇူးတော်ပိတ်ရက် ဗော်လန်တီယာအဖွဲ့ထဲက အမနဲ့ ခရီးသွားဖို့ နေရာရွေးရတာ အတော်ခက်တယ်။ ခရီးသွားဝါသနာပါကြသူတွေဆိုတော့ တော်တော်များများ ရောက်ဖူးပြီးသား။ ၂၀၁၃ ဝါရှင်တန်ဒီစီရုံးမှာတုန်းက လုပ်ဖော်ကိုင်ဖက်တယောက်က မြောက်ကာရိုလိုင်းနားပြည်နယ်က ပင်လယ်ထဲထိုးထွက်နေတဲ့ ကျွှန်းစုတွေကို သွားလည်တာ အရမ်းလှတယ်လို့ ကြားဖူးတယ်။ နေရာနာမည်ကို မမှတ်မိလို့ ဂူဂယ်မတ်မှာ ခဲတံနဲ့ဆွဲပြီးပြလိုက်တာ Outer Banks လင့်ခ်လေးပို့လာတော့မှ အဲ့တာအဲ့တာ။ သူ့ညီမလည်းလိုက်မှာမို့လို့ ရက်တွေညှိကြတော့ ကျေးဇူးတော်ပိတ်ရက် သွားလည်ဖြစ်တယ်။ ဝိုင်းက အရမ်းအရမ်းကို ဘီးစီးနေလို့ မလိုက်ဖြစ်ဘူး။ ၂၀၂၂ နိုဝင်ဘာ ၁၉ စနေနေ့ မနက် ၇ နာရီ နယူးယောက်ကနေမောင်းတာ ညနေစောင်းမှရောက်တယ်။ Delaware Costco မှာ ၂ နာရီလောက် ဝင်လည်ပြီး မနက်စာဟော့ဒေါ့စားတယ်။ $၁ကျပ်ကြီးများတောင် ပေးရတယ် မဆိုးပါဘူး။ Delaware ပြည်နယ်က Sales Tax မပေးရလို့ သက်သာတယ်။ မေရီလန်းပြည်နယ် ဗာဂျီးနီယားကမ်းခြေကိုကျော်တာနဲ့ မြောက်ကာရိုလိုင်းနားပြည်နယ်ထဲဝင်ပြီ။ ညနေ ၄ နာရီခွဲ Cape Charles ကတံတားအရှည်ကြီးမှာ နေဝင်ဆည်းဆာကြည့်တယ်။ မစနုက အလုပ်ပေါ်လာလို့ အချက်ပြမီးပြပြီး အလုပ်လုပ်နေတာ ရဲကတံခါးလာခေါက်တယ်။ တံတားပေါ်မှာ မီးကြီးပြပြီးရပ်နေလို့ ဘာများဖြစ်သလဲ ကူညီဖို့လာတာ။ နောက်တမိုင်လောက် မောင်းပြီးရင် တံတားအဆုံးရောက်ပြီ။ အဲ့ရောက်မှ အလုပ်လုပ်ပါတဲ့။ ဟိုတယ်မှာချက်ကင်ဝင်ပြီး ညနေစာဆိုင်လိုက်ရှာတာ ရာသီချိန်မဟုတ်လို့ ဆိုင်တော်တော်များပိတ်တယ်။ oyster အစိမ်းစားမလားမေးတော့ တွန့်သွားတယ်။ တခါစားဖူးတာ ညှီလွန်းလို့ မနည်းဖျစ်ညှစ်မျိုချဖူးတယ်။ စားကြည့်မယ်ဆိုပြီး စားလိုက်တာ ခုဆို raw fresh oyster တော်တော်ကြိုက်သွားပြီ။ နောက်နေ့မနက် ဟိုတယ်မှာမနက်စာစား ပင်လယ်ကဟိုတယ်နောက်လေးတင်။ ပင်လယ်ကြီးကို မြင်ရတာ စိတ်ချမ်းသာလိုက်တာ။ အေးတော့ အပြင်မှာအကြာကြီး မနေနိုင်ဘူး။

၂၀၂၁ နိုဝင်ဘာ ၂၀ တနင်္ဂနွေနေ့ ဟိုတယ်က ကျွှန်းတွေရဲ့အလယ်မှာ တောင်ဖက်ကို မောင်းချသွားတာ Rodnthe Hatteras Island အဆုံးမောင်းသွားတာ ဖယ်ရီဆိပ်ရောက်သွားတယ်။ ဖယ်ရီက ဘယ်ကိုသွားမှာလဲ Ocracoke Island သွားမှာ တနာရီကြာမယ် ဖရီး အခုထွက်တော့မှာ တက်တက်ဆိုတာနဲ့ ဖယ်ရီပေါ်တက်လိုက်သွားတယ်။ လေကအရမ်းသန့်တယ် အေးလွန်းလို့ အပြင်မှာအကြာကြီး မရပ်နိုင်ဘူး။ ကျွှန်းအဆုံးကို မိနစ် ၂၀ လောက် မောင်းရတယ်။ ဖယ်ရီတနာရီစီးပြီးမှ ရောက်တဲ့ကျွှန်းဆိုတော့ လူနေအိမ်ခြေနည်းတယ်။ ပင်လယ်ကမ်းခြေက အပန်းဖြေအိမ်လေးတွေ။ မီးပြတိုက်နဲ့ ဓာတ်ပုံရိုက်။ ကျွှန်းကိုတပတ်ပတ်ကြည့်။ တနေရာမှာ မြင်းလေးတွေတွေ့လို့ ဝင်ကြည့်။ ပင်လယ်ဖက်ဆီသွားတဲ့ တံတားပေါ်လမ်းလျှောက်။ ရေစီးကြောင်းပြင်းလို့ သတိပေးဆိုင်းဘုတ် ကပ်ထားတယ်။ ကိုယ်တွေငယ်ငယ်တုန်းက မော်တင်စွှန်းမှာ အရက်လေးမြုံ့လိုက် ဘောကွင်းစီးရင်း လှိုင်းပုတ်တာလေး တငြိမ့်ငြိမ့်နဲ့ ပင်လယ်ထဲမျောပါသွားတဲ့သူတွေကို စက်လှေနဲ့သွားကယ်ရတယ်။ ရေတက်ရေကျချိန် ကိုယ်တွေရေကူးနေရင် အိမ်ကတယောက် အမြဲစောင့်ရတယ်။ ဒီမှာတော့ ပင်လယ်ဆိုတော့ လှိုင်းတွေကြီးမှာပေါ့။ ပင်လယ်စာတွေ ကောင်းမှကောင်း။ ဖယ်ရီက တနာရီတစင်းထွက်တာ ၂၄ နာရီ တနှစ်ပတ်လုံးတဲ့။ မစနုက တချိန်လုံးမောင်းပြီး ကိုယ်ကတော့ ကျောပိုးအိတ်လေးပဲ ပါတယ်။ အဝတ်အစား ၂စုံ၊ ဂျက်ကဒ်တထည် ဝိုင်းပြောသလို Miss one jacket။ ချမ်းလို့ဘွတ်ဖိနပ်စီးသွားတာ ဟန်ကျတာပဲ ဖိနပ်ထဲသဲမဝင်ဘူး။ နောက်နေ့ဘယ်တွေ သွားလည်မှာလဲဆိုတော နောက်ပို့စ်မှပဲ တင်ပါတော့မယ်။

Happy Memorial Day! Happy Traveling!

စန်းထွန်း

မေ ၂၇၊ ၂၀၂၃။

Dinner at Kitty Hawk. November 19, 2022, Saturday.

Breakfast at Buxton, November 20, 2022, Sunday

Lunch at Rodanthe, November 20, 2022. Sunday

Rodanthe

Ferry from Hatteras Island to Ocracoke Island

Dinner at Rodanthe, November 20, 2022. Sunday

Photo Essay - 1

၂၀၂၂ ဇူလှိုင် ၂၇ မှာ အိမ်အသစ်ကို ပြောင်းတယ်။ ကိုယ်တိုက်ခန်းအသစ်က ကျဥ်းတယ် စတိုခန်းသေးသေးပဲပါတယ်။ California Closet က ဒီဇိုင်နာနဲ့ စိတ်ကြိုကဒီဇိုင်းဆွဲပြီး အော်ဒါမှာထားတာ။ မကြီးနဲ့ အသိညီမက ဒီဇိုင်းဆွဲတာမှာ ကူညီပေးတယ်။ ကိုယ့်အိမ်ရဲ့ စျေးအကြီးဆုံးပရိဘောဂ။ နောက်ပိတ်မပါတာ အောက်တိုဘာ ၃၁ လာတပ်ပေးတော့မှသိတယ်။ တသက်ဝရမ်တီပေးထားလို့ အိမ်ပြောင်းရင် ဖြုတ်ပြီးသယ်ပေးမယ်တဲ့။ California Closet ဆိုဒ်မှာ ဒီဓာတ်ပုံလေးနဲ့ ရီဗျူးတင်ပေးထားတာ တော်တော်ကြည့်ကြတယ်။

အိမ်အသစ်ပြောင်းပြီး ပထမဆုံးလာလည်တဲ့သူက ဆူနမ်။ နင်နေသမျှအိမ်ထဲမှာ ဒီအိမ်ကို ငါအကြိုက်ဆုံးပဲဆိုပြီး ၁၀ ရက် နေသွားတယ်။ ကုလားတန်းနဲ့ လည်း နီးနီးလေးပဲ ၁၀ မိနစ်ပဲဝေးတယ်။ မနက်စာ၊ နေ့လည်စာ၊ ညစာ ကုလားတန်းက ဝယ်စားတယ်။ သူအရမ်းကြိုက်တဲ့ နီပေါဆိုင်ပိတ်သွားလို့ ဝမ်းတွေနည်း။ နင်အိမ်ဝယ်တာ ငါ့အတွက်ဖြစ်နေပြီ ခဏခဏလာမယ်တဲ့။ ဆူနမ် နင်ငါ့ကိုခင်လို့ လာတာမဟုတ်ဘူး ကုလားတန်းက အစားအသောက်တွေ စားချင်လို့ လာတာမလား၊၊ နင့်အကြောင်းငါသိပါတယ်လို့ပြောတော့ တဟဲဟဲနဲ့ ရယ်နေလေရဲ့။ အမေရိကားမှာ ဆယ်နှစ်ကျော်ကြာပြီ နယူးယောက်၊ ဒီစီမရောက်ဖူးသေးတဲ့ မိုင်းဖန်ကို ဗွီဒီယိုနဲ့ပြပြီး လာလည်ဖို့ခေါ်။ စီနီယာဗီယက်နမ်ကိုလည်း နယူးယောက်လာခဲ့ စန်းစန်းလိုက်ပို့လိမ့်မယ်ခေါ်နဲ့ ဆူနမ်တယောက် မောင်းတီးပြီး ကြေငြာနေလေရဲ့။ ၂၀၂၂ နိုဝင်ဘာ ၅ ဆူနမ်ကို ဒီစီဘတ်စ်ကားဂိတ်လိုက်ပို့ရင်း ၃၄ လမ်းက The Wave မှာ ရိုက်ထားတာ။

၂၀၂၂ နိုဝင်ဘာ ၇ နယူးယောက်မှာ ဂီတပွဲ လင်းနစ်၊ ဆော်လမွန်၊ အိန်ဂျယ်လမုန် လာဆိုတယ်။ ဂီတပွဲမသွားပေမဲ့ ကချင်ကမ်ပိန်းအတွက် ဆွေးနွေးစရာရှိလို့ အိန်ဂျယ်နဲ့ ညစာသွားစားကြတာ လင်းနစ်၊ ဆော်လမွန်တို့ ပါလာတယ်။ လင်းနစ်သီချင်းတွေကို ကြိုက်ပေမယ့် လူချင်းတွေ့တဲ့အခါ နှုတ်မဆက်၊ စကားမပြောဘူး။ အဲ့လို ကိုယ်က ပေါင်းသင်းဆက်ဆံရေးက တအားကောင်းတာ။ စားပြီးတဲ့အချိန်ကြည့်လိုက်တော့ ညသန်းခေါင်ကျော်နေပြီ။ အမလေး ဒီညသန်းခေါင် အလုပ်ရှိတာ သေပါပြီဟ။ အိမ်ပြန်ရောက်မှ အလုပ်လုပ် မနက်တနာရီကျော်မှ အိပ်ရတယ်။ မနက်တနာရီအထိ ရုပ်ရှင်ကြည့်ရင် ဘာမှမဖြစ်ဘူး။ အလုပ်လုပ်တော့ ခေါင်းတွေကိုက်။

၂၀၁၇ နယူးဂျာစီ ဘုန်းကြီးကျောင်းက ဝယ်လာတဲ့ ယုဇန..နွေရာသီရောက်တိုင်း ပွင့်တော့...ခုတော့ သေသွားရှာပြီ

အပင်တွေ ဝယ်လိုက်၊ ရှင်လိုက်၊ သေသွားလိုက်၊ ဝယ်လိုက်နဲ့ လုံးချာလည်။ အခန်းတိုင်းမှာ ပန်းပင်၊ ပန်းပေါင်းစုံဖူးပွင့်တဲ့ပန်းခြံ၊ ကျေးငှက်သံတညံညံနဲ့ စိမ်းစိုနေတဲ့ဥယျာဥ်။ နွေရာသီနေ့လည်ခင်းတွေဆို သစ်ပင်ကြီးအောက်က ဒန်း၊ ပုခက်ပေါ်မှာ စာအုပ်ဖတ်ရင်း အိပ်မယ်လို့ စိတ်ကူးယဥ်သား။

ဘယ်ရယ်မယ်မယ်ရရမရှိဘဲ ဓာတ်ပုံများကပြောသော စတိုရီများသာ။

စန်းထွန်း

မေ ၂၀၊ ၂၀၂၃။

Watkins Glen သွား တောလား - ၂

၂၀၂၂ အောက်တိုဘာ ၃၀ Robert H. Treman State Park ကို မနက် ၉ နာရီရောက်တယ်။ ကားမောင်းရင် သူ့ရှေ့က GPS ကို ကြည့်နေရင်းနဲ့ကို ကွေ့ရမှာလား ကွေ့ရမှာလားလို့ အကြိမ်ကြိမ်မေးတတ်တဲ့ဆူနမ်ကြောင့် ကားမောင်းတဲ့သူအလား ပင်ပန်းတယ်။ ရာသီဥတုက အေးစိမ့်နေပြီး စောနေသေးလို့ တောင်တက်သမား နှစ်ယောက်လောက်ပဲတွေ့တယ်။ ဆူနမ်အတွက် အရေးအကြီးဆုံးဖြစ်တဲ့ အိမ်သာအရင်ရှာ။ အတိုဆုံးနဲ့အသက်သာဆုံး တောင်တက်လမ်းကိုရွေးတတ်။ ရေတံခွန်တခုကတော့ အတော်လှတယ်။ ဆောင်းတွင်းတောင် ဒီလောက်ရေများတာ နွေရာသီဆို ပိုများမှာပဲ။ မြစ်ဘေးတလျှောက် တောင်တက်လမ်းတွေက အများကြီး။ ဒီနှစ်တော့ တောင်မတက်ဖြစ်ဘူး။ ဆူနမ်ရွေးထားတဲ့အထဲက Ithaca မြို့ Connell University နားက ပန်းခြံကိုသွားမယ်လို့ ရွေးလိုက်တယ်။ ကားပါကင်ဖိုးပေးမလို့ကို booth ကလည်း အလုပ်မလုပ်၊ အွန်လိုင်းကလည်း အလုပ်မလုပ်လို့ ဖြတ်သွားတဲ့အန်ကယ်ကြီးကို မေးကြည့်တော့ ပိတ်ရက်ဆိုဖရီးတဲ့ တနယ်လုံးသစ်ပင်တွေ ကြွေပြီးပေမဲ့ ဒီမှာတော့ ဝေနေတုန်း။ အတော်လှတယ် ဓာတ်ပုံရိုက်လို့မဝ။ ဝိုင်းရေ ဒီတခါလည်း ငါတို့ရွေးခြယ်လိုက်တာ မှန်တယ်ကွဆိုပြီး ရယ်ရသေးတယ်။ တက္ကသိုလ်ကျောင်းသား ကျောင်းသူလေးတွေ တွေ့တယ်။ ဒီမှာကျောင်းတက်ရတဲ့ ကလေးတွေ ကံကောင်းတယ်။ စိတ်ညစ်ရင် တောင်တက်လိုက် ရေတံခွန်၊ စမ်းချောင်းလာပြီး ရေစီးသံနားထောင်လိုက်။ ကျောင်းနဲ့လည်း နီးနီးလေး။ ၁၂ ခွဲ တောင်အောက်ဆင်းပြီး မြို့ထဲမှာ ဆိုင်တွေလိုက်ရှာတာ ဆူနမ်စားချင်တဲ့ဆိုင်ကပိတ်။ ဆူနမ်က တနာရီကျော် ကမ္ဘောဒီးယားဆိုင် သွားစားချင်လို့တဲ့။ ကမ္ဘောဒီးယားတွေက ငါးပိ၊ ငံပြာရည်တွေနဲ့ နင်ကြိုက်မှာမဟုတ်ဘူး။ တနာရီဆိုပေမဲ့ လမ်းမှား၊ ကားပါကင်ရှာရမှာနဲ့ ၂ နာရီလောက် ကြာမယ်။ နယူးယောက်ကို ၆ နာရီလောက် မောင်းရမှာမို့ အနီးအနားက ယိုးဒယားဆိုင်မှာပဲစားပြီး ပြန်ကြရအောင်။ နေ့လည် ၂ နာရီခွဲလောက်ကတည်းက မောင်းလိုက်တာ လမ်းတွေပိတ်နေလို့ အိမ်သာတောင် မဝင်ခဲ့ရဘူး။ ဟော်လန်မြေအောက်လှိုဏ်ခေါင်းကနေ မက်ဟန်တန်ဝင်တာ ကွေ့တာမှားသွားလို့ မန်ဟက်တန်မြို့လယ်ကောင်ရောက်။ ဆူနမ် မန်ဟက်တန်မှာ မောင်းရမှာ ကြောက်ပါတယ်ဆိုမှ မန်ဟက်တန်နဲ့ တည့်တည့်တိုး။ မန်ဟက်တန်မှာ ကားတွေက ကျပ်ညှပ်အတင်းကျော်တက် အတင်းနေရာတောင်း။ မီးပွိုင့်က စိမ်းနေပေမဲ့ ရှေ့မှာကားတွေပိတ်နေလို့ မောင်းလို့မရ ဟွန်းသံတညံညံ လူတွေကလည်း မီးနီလည်းဖြတ်။ ဆူနမ်တယောက် စိတ်တွေတို ယောက်ယက်ခတ်။ ကိုယ်တွေကလည်း ဘေးကနေ အတင်းကပ်ထား နေရာမပေးနဲ့ ဟွန်းတီးလည်း စိတ်ထဲမထားနဲ့။ သူတီးကိုယ်တီး အပြန်အလှန်တီးပဲ။ မန်ဟက်တန်ကျော်လို့ ကွင်းက JFK လေဆိပ်သွားတဲ့အခါမှာလည်း အမြန်လမ်းဆိုတော့ exit တခုမှားရင် မလွယ်လို့သတိထားရတယ်။ အရေးထဲ GPS က ခုပဲညာကပ်ခိုင်း ခုပဲဘယ်ကပ်ခိုင်းနဲ့ အိမ်ကို ည ၁၁ ကျော်မှ ပြန်ရောက်တယ်။ ဆူနမ်ကတော့ ရှူးမပေါက်ဘဲ ၈ နာရီ နေနိုင်တယ်ဆိုတဲ့ စံချိန်သစ်တင်သွားလေရဲ့။ ၂၀၂၂ နိုဝင်ဘာလကုန် မြောက်ကာရိုလိုင်းနားပြည်နယ် Outer Banks ကိုသွားလည်တဲ့အကြောင်းကတော့ နောက်ပို့စ်မှပဲ တင်ပါတော့မယ်။

Happy Traveling!

စန်းထွန်း

မေ ၁၃၊ ၂၀၂၃။

Watkins Glen သွား တောလား - ၁

လွန်ခဲ့တဲ့ ၂ နှစ် အိမ်ဝယ်ပြီးကတည်းက နီပေါကလွဲရင် ဘယ်မှခရီးမထွက်နိုင်တဲ့ ဆူနမ်ကို ဝိုင်းကအကြံပေးလို့ နယူးယောက် အပ်စတိတ်ဖက် တညအိပ် ၂ရက်ခရီးလေး ထွက်ဖြစ်ပါတယ်။ တိုးကားနဲ့သွားရင် နိုင်အာဂရာရေတံခွန်သွားတိုင်း Watkins Glen ဝင်လည်တာဆိုတော့ ကိုယ်က လေးခေါက်ရောက်ပြီးပြီ။ သွားတိုင်းနွေရာသီ ဆောင်းဦးရာသီတော့ တခါမှမသွားဖြစ်ဘူး။ သစ်ရွက်တွေလည်း ကြွေကုန်ပြီ။ ပိတ်ရက်ခရီးတိုလေး ထွက်သလိုပေါ့။ ကား၊ ဟိုတယ်၊ သွားလည်မဲ့နေရာတွေကို ဆူနမ်ပဲ စိတ်ကြိုက်ရွေးပါတယ်။ ၂၀၂၂ အောက်တိုဘာ ၂၉ JFK လေဆိပ်မှာ ကားသွားယူ။ ဆူနမ် မက်ဟန်တန်မှာ ကားမောင်းရမှာ ကြောက်ပါတယ်ဆိုနေမှ GPS က မန်ဟက်တန်ထဲကနေ ခေါ်သွားတယ်။ ဘေးကနေ GPS ကြည့်ပေးရင်း ချောချောမောမောပဲ မက်ဟန်တန်ကို ကျော်ဖြတ်သွားတယ်။ မြို့ပြင်ထွက်တာနဲ့ သစ်ပင်တွေနဲ့ သာယာလိုက်တာ။ နေ့လည်စာကို Subway ဝင်စား နေ့လည် ၂ နာရီခွဲလောက်မှာရောက်တယ်။ ကားပါကင်ရှာ လူများတော့ တောင်တက်လမ်းကို အလွယ်တကူ ရှာတွေ့ပါတယ်။ တောတောင်စိမ့်စမ်းတွေနဲ့ သာယာပါတယ်။ တိုးကားနဲ့ဆိုရင် အပေါ်ကနေဆင်း အောက်မှာတိုးကားက စောင့်နေတယ်။ ခုတော့ အပေါ်တက်ပြီး အောက်ကိုပြန်ဆင်း အတက်က နာရီဝက်သာသာပါပဲ။ ဆူနမ်ကတော့ သူသွားချင်တဲ့ ရေခဲမုန့်ဆိုင်က ပိတ်သွားလို့ ကြိတ်မနိုင်ခဲမရတွေဖြစ်။ ဝိုင်းပြောလို့ ဖုန်းဆက်ကြည့်တော့လည်း ဆိုင်ကပိတ်နေပြီ။ နယ်တွေမှာ ဆိုင်တွေစောစောပိတ်တယ်။ ရေတံခွန်ကိုသွားလည်တော့ ရေကနည်းနေပြီ။ ရေကန်ကိုသွားလည်ပြီး ဝိုင်သောက်မလို့ကို ဆိုင်ကပိတ်ထားတယ်။ ဆူနမ်က ငါကိုကကံဆိုးတာ ငါသွားချင်တဲ့နေရာမှန်သမျှ အကုန်ပိတ်။ နောက်နေ့ဘယ်ကို သွားမလည်ဆိုတာကတော့ နောက်ပို့စ်မှပဲ တင်ပါတော့မယ်။

Happy Traveling!

စန်းထွန်း

မေ ၆၊ ၂၀၂၃။