စိတ်ကူးယဉ် သိပ္ဗံဝထ္ထုဇာတ်လမ်းတွေကနေ inspiration အိုင်ဒီယာတွေရ တီထွင်ကြံဆ ကြိုးစားအားထုတ်မှုတွေကြောင့် လူသားတွေ လကမ္ဘာရောက်ခဲ့ပြီ။ ခုလည်း မားစ်ဂြိုလ်သွားမလို့ ကြံစည်နေကြလေရဲ့။ ၁၉၉၇ ဟောလိဝုဒ်ရုပ်ရှင် FACE/OFF မှာ နစ်ကိုးလပ်ကေ့ချ်နဲ့ ဂျွှန်ထရာဗိုတာ ပါဝင်သရုပ်ဆောင်ထားတယ်။ နစ်ကိုးလပ်က အကြမ်းဖက်သမား ကေစတာထရိုင်၊ ဂျွှန်ထရာဗိုတာက အက်ဘီအိုင်အေးဂျင့် ရှောင်အာရှာ။ ရှောင်က ကေစတာ့မျက်နှာကို ခွဲစိတ်အစားထိုး ထောင်ထဲဝင်ပြီး ဗုံးထောင်ထားတာ ဘယ်မှာလဲဆိုတာ စုံစမ်းဖို့တာဝန်ပေးခြင်းခံရတယ်။ ရှောင် ထောင်ထဲရောက်နေတုန်း coma ကိုမာဖြစ် သတိမေ့နေတဲ့ ကေစတာက ပြန်နိုးလာတော့ မျက်နှာယူသွားတယ်ဆိုတာ သိသွားတယ်။ နောက်တော့ ရှောင့်မျက်နှာကို ခွဲစိတ်အစားထိုးပြီး ရှောင့်အိမ်သွားနေ အက်ဘီအိုင်အေးဂျင့်လုပ်ပြီး ဒုက္ခတွေပေး။ ရှောင် ကေစတာကို ဘယ်လိုပြန်တိုက်ခိုက်ပြီး မျက်နှာကို ပြန်အရယူသလဲဆိုတာ ရင်တမမနဲ့ ကြည့်ရတယ်။ အထိုးအသတ် အတိုက်အခိုက် ဦးစားပေးတဲ့ဇာတ်လမ်းဆိုပေမဲ့ ကြည့်လို့ကောင်းသား။ အနှစ်၂၀ကြာတဲ့အခါမှာတော့ တကယ်ပဲမျက်နှာကို အစားထိုးလဲလှယ်လို့ရပြီ။ ကျောက်ကပ်၊ နှလုံးအစားထိုးတာကတော့ ကြားဖူးနေကြဆိုတော့ မထူးဆန်းတော့ဘူး။ မျက်နှာအစားထိုး လဲလှယ်တာကတော့ နည်းတယ်။ အေဘီစီသတင်း 20/20 တီဗီရှိုးမှာ မျက်နှက်အစားထိုး လဲလှယ်တဲ့အကြောင်း ကြည့်လိုက်ရတာ အင်မတန်စိတ်ဝင်စားဖို့ကောင်းတယ်။ မီးလောင်ကျွှမ်းလို့ မျက်နှာတခုလုံး ဆိုးဆိုးရွားရွား ပျက်စီးသွားတဲ့ မီးသတ်သမား၊ depression စိတ်ဓာတ်ကျရောဂါကြောင့် မျက်နှာကိုသေနတ်နဲ့ပစ် သေကြောင်းကြံစည်တဲ့ လူငယ်လေးတွေကို ဒုတိယအကြိမ်မွေးဖွားပေးလိုက်တဲ့ ခွဲစိတ်မှု။ မျက်နှာအစားထိုးလဲလှယ်ဖို့ လှုဒါန်းသူနဲ့ လက်ခံသူ သွေးအမျိုးအစား၊ အသားအရောင်၊ မျက်နှာပုံစံ တူဖို့လိုပါတယ်တဲ့။ ခွဲစိတ်မှုဟာ၂၈ နာရီကြာပြီး အင်မတန်ခက်ခဲ ရှုပ်ထွေးပါတယ်။ ပြီးရင် physical therapy နဲ့ စကားပြော၊ အစာစားတာ၊ မျက်နှာလေ့ကျင့်ခန်းတွေ လုပ်ရပါတယ်။ organ အလှုရှင်မိသားစုနဲ့ လက်ခံရရှိသူမိသားစု တွေ့ဆုံကြတဲ့အခန်းဆို မျက်ရည်ဖြိုင်ဖြိုင်ကျ။ ကိုယ်လည်း organ လှုထားတယ်၊ ခန္ဓာကိုယ်ကို သုတေသနလုပ်ရာမှာ သုံးဖို့လှုထားတယ်။ ကိုယ်သေတဲ့အခါ အထဲက organ တွေက လှုနိုင်လောက်တဲ့အထိ ကောင်းသေးရဲ့လားမသိ။ တဦးတယာက်အတွက် အကျိုးမရှိခဲ့ဘူးဆိုရင်တောင်မှ သုတေသနလုပ်ငန်းအတွက်တော့ သုံးလို့ရသေးတာပဲ။ ပြာဖြစ်တာထက်တော့ အကျိုးရှိပါတယ်လေ။ မျက်နှာအစားထိုးလဲလှယ်တာ စိတ်ဝင်စားရင်တော့ အောက်ကလင့်ခ်မှာ သွားဖတ်သွားကြည့်လို့ ရပါတယ်။
စန်းထွန်း
ဧပြီ ၆၊ ၂၀၁၉ ။
 |
| photo credit : ABC news 20/20 |
 |
| photo credit : ABC news 20/20 |
https://abcnews.go.com/Health/unprecedented-face-transplant-surgery-firefighter-hope-life/story?id=35218667
https://abcnews.go.com/Health/26-year-man-shares-incredible-face-transplant-journey/story?id=59200940
https://www.facebook.com/ABC2020/videos/friday-on-2020-the-life-changing-face-transplant-surgery/260964691282736/
https://www.facebook.com/ABC2020/videos/youngest-face-transplant-recipient-on-the-life-changing-procedure/175022320075183/
https://abc.go.com/shows/2020/episode-guide/2018-11/16-brave-new-face
No comments:
Post a Comment