ယိုးဒယားသွား တောလား - ၁

ယိုးဒယားသွားဖို့ မစီစဥ်ထားဘဲ မထင်မှတ်ဘဲ သွားဖြစ်သွားတယ်။ အဖေတို့က နှစ်စဥ်ဆေးစစ်တာ စင်္ဂကာပူ၊ ယိုးဒယားမှာ စစ်တယ်။ ဒီနှစ်မှာတော့ စင်္ဂကာပူကို လေယာဥ်လက်မှတ် မရတာနဲ့ ဘန်ကောက်သွားစစ်ဖြစ်တယ်။ ဗီဇာလျှောက်စရာ မလိုပေမဲ့ ကိုဗစ်ကာလဆိုတော့ ဘန်ကောက်ရောက်တာနဲ့ သတ်မှတ်ထားတဲ့ ဟိုတယ်ကိုတန်းသွား။ ပီစစ်အာစစ် နောက်နေ့ နက်ဂတစ်အဖြေရရင် ကိုယ်တည်းမဲ့ဟိုတယ်ကိုပြောင်း။ ရန်ကုန်ကနေ မထွက်ခင် ၃ ရက်အလို ပီစစ်အာစစ်ရ တော်တော်အလုပ်ရှုပ်တယ်။ တူတော်မောင်ကို လိုက်မလားမေးလိုက်တာ လိုက်မယ်ဆိုလို့ ပတ်စ်ပို့စ်အပြေးအလွှားလုပ်။ လေယာဥ်၊ ဟိုတယ်၊ ခရီးစဥ်အားလုံး မကြီးစီစဥ်တာ။ သူက အဖေတို့ဆေးခန်းပြတိုင်း၊ လေယာဥ်ခသက်သာလို့ဆိုပြီး ဘန်ကောက်တဂျိမ်းဂျိမ်း သွားနေတာ။ မိသားစုဆုံမှာ မတွေ့တာလဲ သုံးနှစ်လောက်ရှိပြီ လာခဲ့ဆိုတာနဲ့ ကိုယ်လည်း ကမန်းကတန်း သွားဖို့စီစဥ်။ family emergency ဆိုပြီးခွင့်တင် အင်္ဂါနေ့ လေယာဥ်လက်မှတ်ဝယ် စနေနေ့ ဘန်ကောက်ထွက်လာတော့တာပဲ။ အဲ့ဒီအချိန်တုန်းက တိုက်ခန်းဝယ်ဖို့ကိစ္စအတွက် အင်မတန်အလုပ်များနေတာ။ ဘဏ်က ပိုက်ဆံချေးဖို့အတွက် တင်ထားတဲ့စာရွက်စာတမ်း၊ တိုက်ခန်းကို စစ်ဆေးနေတဲ့အချိန်။ နေ့တိုင်း ဘဏ်၊ ရှေ့နေ၊ တိုက်ခန်းအုပ်ချုပ်ရေးအဖွဲ့ ကို ဖုန်းဆက်ပြီး လိုက်နေရတဲ့အချိန်။ ကူညီပေးတဲ့ အသိညီမလက်ထဲ အပ်ထားခဲ့ပြီး ထွက်လာလိုက်တယ်။ တိုက်ခန်းဝယ်တဲ့အကြောင်း နောက်မှပို့စ်ရေးဦးမယ်။ ThaiPass က မသွားခင် ၃ - ၇ ရက်အတွင်း တင်ရတာကို မကြီးက ၂ ရက်မတိုင်ခင်ကမှတင်။ သတ်မှတ်ထားတဲ့ ဟိုတယ်မှာဘွတ်ပြီးမှ ThaiPass လျှောက်လို့ရတယ်။ အချိန်ဆွဲတတ်တဲ့ မကြီးက နောက်ဆုံးမှလျှောက်တယ်။ သောကြာနေ့ပဲ လေယာဥ်စီးရတော့တယ် ThaiPass မရသေးဘူး။ ဘာမင်ဂရပ်ဆေးခန်း အပွိုင့်မန့်က မရသေးလို့မရမကတောင်း။ အဖေက နှလုံးအရေးတကြီးပြစရာရှိလို့ ThaiPass အမြန်ဆုံးရအောင် လုပ်ပေးပါဆိုပြီး အရေးပေါ်အီးမေးလ်ပို့။ ဘန်ကောက်ရောက်နေတဲ့ ကိုယ့်သူငယ်ချင်းရဲ့အေးဂျင့်ကိုလှမ်းမေး ဗြောင်းဗြောင်းဆန်။ သောကြာနေ့လေယာဥ်စီးမှာ ကြသပတေးနေ့မှရတယ်။ ThaiPass မရရင် လေယာဥ်ပေါ်မတက်ရမှာကို စိတ်ပူနေတာ။ ThaiPass ရမှပဲ ဟင်းခနဲ သက်ပြင်းချနိုင်တော့တယ်။

ကိုယ့်အမက ခရီးစဥ်အကုန်လုံး စီစဥ်တာတော်ပေမဲ့ အဲ့လိုအချိန်ဆွဲတတ်တယ်။ ၂၀၁၈ အောက်တိုဘာ လန်ဒန်သွားတုန်းကလည်း စနေနေ့ပဲ လေယာဥ်စီးရတော့မယ် ဗုဒ္ဓဟူးနေ့အထိ တိုးမရွေးမဘွတ်လို့ နင်မရွေးရင် ငါ့ဘာသာရွေးပြီး ဘွတ်လိုက်မယ် ဒီနေ့ဘွတ်ကိုဘွတ်ရမယ်လို့ အော်တော့မှရွေးတာ။ ချက်ကင်ဝင်တော့ ကိုဗစ်ကာကွယ်ဆေးထိုးပြီးကဒ်၊ ThaiPass တောင်းတယ်။ နီပေါသွားမဲ့ အမေရိကန်တယောက် ကိုဗစ်ကာကွယ်ဆေးမထိုးထား ဝက်ဆိုဒ်မှာ ကိုဗစ်စစ်စရာမလိုဘူးဆိုလို့ မစစ်လာဘူး။ ဒီရောက်တော့မှ ပီစီအာစစ်ဖို့လိုတယ်ဆိုတော့မှ သွားစစ်။ အနည်ဆုံး ၄-၅ နာရီ ကြာမှာဆိုတော့ ဒီလေယာဥ်တော့မမှီလောက်ဘူး။ ၂၀၂၂ ဧပြီ ၂၃ စနေနေ့ နယူးယောက်ကနေ ဒိုဟာ ၁၆ နာရီ လူမပြည့်ဘူး ခုံ ၂ ခုခြားပြီး ထိုင်ရတယ်။ ခုံလေးခုံလွတ်တဲ့နေရာမှာ သွားအိပ်တယ် နိုးရင်ရုပ်ရှင်ကြည့်တယ် ပြီးရင်ပြန်အိပ်တယ် ကျွှေးတာအကုန်စားတယ်။ နယူးယောက်ကနေ ၁၁ နာရီထွက်ရမှာ ၄၅ မိနစ်နောက်ကျထွက်တော့ ကာတာကို တနာရီနောက်ကျပြီးမှရောက်တယ်။ ထရန်စစ် တနာရီပဲအချိန်ရှိတော့ စိတ်ပူနေတာ ကာတာလေကြောင်းလိုင်းက လေယာဥ်နံပါတ်ဆိုင်းဘုတ်ကိုင်ပြီး လာစောင့်နေတယ်။ ဝန်ထမ်းနောက်ကိုလိုက်တော့မြန်တယ် ကိုယ့်ဘာသာဆို ဘယ်တာမင်နယ် ဘယ်ဂိတ်ဆိုပြီး ရှာနေရမှာ အချိန်ကြာတယ်။ ဘန်ကောက်ကို ၆ နာရီ လူအပြည့်ဘဲ။ ၂၀၂၂ ဧပြီ ၂၄ တနင်္ဂနွေနေ့ ည ၅ နာရီခွဲ အင်မီဂရေးရှင်းဖြတ် ဟိုတယ်ကဇုန်အလိုက်ဆိုတော့ ဇုန်ရှာ ဟိုတယ်ရှာ ချက်ကင်ဝင်။ သတ်မှတ်ထားတဲ့ app ကိုဒေါင်းပြီး နာမည် ပတ်စပို့စ်နံပါတ်ထည့်။ အဲ့ဒီ app ပြပြီး ဆင်းကဒ်တောင်း ဝိုင်ဖိုင်ချိတ်။ ဖုန်းတွေလိုက်ခေါ် ဆေးခန်းဝင် ပီစီအာစစ် ဟိုတယ်ရောက်တော့ ချက်ကင်ဝင်ပြီး သူတို့ပေးတဲ့ညစာစားနား။ မနက်စောစော ပီစီအာအဖြေသွားယူ မနက်စာစား အဖေတို့ကိုစောင့်။ ဟိုးအဝေးက တူတော်မောင်က ကိုယ့်ကိုမှတ်မိတယ်။

၂၀၁၉ ဇွန် ၃ သူ့အဖေဆုံးတုန်းက သူက လေးနှစ်အရွယ် ကလေ။း ခု ၇ နှစ်အရွယ် ကလေးကြီး အရပ်အတော်ရှည်လာပြီး လူကြီးလေးဖြစ်လာပြီ။ ခေါင်းမိုးထပ်က ရေကူးကန်မှာ တူတော်မောင်နဲ့ မကြီး ရေကူးကြတယ်။ နေပူလွန်းလို့ butterfly rush ဖြစ်မှာစိုးလို့ မကူးတော့ဘူး။ ၂၀၁၅ ဇူလှိုင် ဘော်စတွန်ခရူ ခေါင်မိုးထပ် နေပူကြဲတောက်မှာ နှစ်နာရီစီးလိုက်တာ မျက်နှာ butterfly rush ဖြစ်သွားလို့ ကုရတာ နှစ်နှစ်ကျော်ကြာတယ်။ အဲ့ဒီကတည်းက နေပူကြဲတောက်ဆို ရှောင်တယ်။ ဘာမင်ဂရပ်ဆေးရုံကို မိနစ် ၂၀ လောက် လမ်းလျှောက်ပြီး အဖေ၊ အမေတို့ကို ဆေးခန်းပြ။ တူတော်မောင်နဲ့ကိုယ်က ဟိုတယ်ပြန်လာ လမ်းတလျှောက် ဓမ္မစေတီကသူရဲအကြောင်း ကိုယ့်ကိုပြောပြ ဆရာကြီးလုပ်နေတာများ သူ့အဖေနဲ့ တပုံစံတည်းပဲ။ ဒီခေတ်ကလေးများ အတော်မလွယ်ချက် ကလေးအမေတွေကို ကိုယ်ချင်းစာမိသွားတယ်။ ဟိုတယ်ရောက်တော့ ချက်ကောက်လုပ် ဟိုတယ်ကကျွှေးတဲ့ နေ့လည်စာကို သူ့ကိုကျွှေး။ လူကြီးတယောက်စာ နီးပါးလောက်စားတယ် ကိုယ့်ဖုန်းနဲ့ သူ့ကိုဂိမ်းဆော့ခွင့်ပေ။း သူမေးတာပြောတာတွေကိုနားထောင် ရှင်းပြသင်ပေးနဲ့ တချက်မှမအားရဘူး။ နောက်နေ့ဘယ်တွေကို သွားလည်တယ်ဆိုတာကတော့ နောက်အပတ်မှလာမည်။

Happy Traveling!

စန်းထွန်း

အောက်တိုဘာ ၁၊ ၂၀၂၂။