ပုဂံသွား တောလား - ၂

မနေ့ကဝယ်ဝတ်တဲ့ အဖြူရောင်အင်္ကီျလေး ဝတ်လို့ကောင်းလို့ အဖေက သူ့တပည့်တွေ၊ ဘော်ဒါတွေကို လက်ဆောင်ပေးဖို့ ထပ်ဝယ်တယ်။ တော်ကြာ ဘယ်သူ့ကို မေ့နေပြန်ပြီ တော်ကြာ ဘယ်သူ့ကိုပေးပြီး ဘယ်သူ့ကို မပေးရင် ဘယ်ကောင်းပါ့မလဲနဲ့။ များများသာဝယ်လို့ အမေက ရွေးပေးတယ်။ နန်းမြင့်မျှော်စင်ကိုတက်ဖို့ တယောက် ၂၀၀၀ ပေးရတယ်။ နန်းမြင့်မျှော်စင်ကနေ မြင်ရတဲ့ ပုဂံနေဝင်ဆည်းဆာချိန် အင်မတန်လှတယ်။ မောင့်ကျက်သရေခေါင်းပေါင်း၊ တိုက်ပုံအင်္ကီျဝတ်ထားတဲ့ အစ်ကိုတစ်ယောက်က စောင်းတီးပြီး ဖျော်ဖြေနေတယ်။ ဘေးနားမှာ နားထောင်နေတဲ့  ဘိုကြီးက အင်မတန်သဘောကျနေတာ။ သူက အနုပညာတက္ကသိုလ်ကဆရာတဲ့။ ဓာတ်ပုံရိုက်လို့ရလားမေးတော့ ရတယ်တဲ့။ သီချင်းဆုံးတဲ့အခါ စောင်းနဲ့ဓာတ်ပုံရိုက်လို့ရလားမေးတော့ ရတယ်။ လက်အနေအထား ပြင်ပေးတယ်။ အန်တီစု နိုဗယ်ဆုယူတော့ စောင်းပညာရှင်တယောက် နာမည်မေ့နေတယ်။ မေတ္တာရွှေစောင်းဆိုတဲ့ သီချင်းတီးတာ အင်မတန်နားထောင်ကောင်းတယ်။ စောင်းသံ အင်မတန်သာယာတယ်။ ဦးနေဝါနဲ့တူတယ် ဟုတ်တယ် ဟုတ်တယ်။ စောင်းကြိုးကိုရေနေတော့ ၁၆ ကြိုးတဲ့ အယ်မလေး ... တယော ၄ ကြိုးကို မနည်းသင်နေတာ ၁၆ ကြိုးဆိုရင်တော့လား။ တနေ့နေ့မှာတော့ စောင်းတီးသင်ချင်သေးတယ်။ ဘယ်မှာနေတာလဲ စတိတ်မှာနေတာ အဲ့ဒီမှာ သင်ပေးတဲ့သူတွေ ရှိမှာပါ။ ခက်သလားဟင် သိပ်တော့မခက်ပါဘူး သင်ကြည့်မှသိမှာပေါ့ သင်ကြည့်ပါ။ ကိုယ်တို့က မနက်ဖြန်ရန်ကုန်ပြန်မှာ ဖြိုးတို့က နောက်ထပ်နှစ်ရက် ဆက်နေတယ်။ ဖြိုးတို့က ညောင်ဦးနားကဟိုတယ်ကို ပြောင်းသွားကြတော့ ရွှေတိုင်းကျော်မှာ ထမင်းသွားစားတဲ့အခါ ကိုယ်တို့မိသားစု လေးယောက်တည်း။ ရုပ်သေးရုပ်လေးတွေ၊ ယွန်းဆွမ်းအုပ်လေးတွေနဲ့ ဧည့်ခန်းကိုအလှဆင်ချင်ပေမဲ့ ခုနေတဲ့အိမ်မှာ ထားစရာနေရာမရှိလို့ ဝယ်ချင်စိတ်ကို မျိုသိပ်ထားရတယ်။ နောက်နေ့မနက် ခေါင်မိုးပေါ်မှာ မနက်စာစားတော့ လေကြောင်းကျလို့ မီးပုံပျံတွေ ကိုယ်တို့ခေါင်းပေါ်ကနေ ပျံသွားကြတယ်။ မီးပုံပျံခြင်းတောင်းထဲကသူတွေကို လက်တွေပြ။ တသက်မှာတခါလောက် Balloons Over Bagan စီးချင်မိသား ယူအက်စ်ဒေါ်လာ ၂၀၀ ကနေ ၃၀၀ ကြားလောက် ကုန်မယ်။ တစ်နှစ်လောက်ကြို ဘွတ်ရတယ်ကြားတယ်။ ရာသီချိန်ကလည်း ခြောက်လတည်း။ မီးပုံပျံကုမ္ဗဏီသုံးခုထဲမှာ Balloons Over Bagan က သက်တမ်းအကြာဆုံး စိတ်အချရဆုံးတဲ့။

အရင်တုန်းက မီးပုံးပျံ ပဲခင်းထဲဆင်းလို့ လျော်ရတယ်တဲ့။ ၂၀၀၂ ကျောင်းလေ့လာရေး ခရီးတုန်းက မီးပုံးပျံတခုလောက်ပဲတွေ့တယ်။ ဒီနေ့ မီးပုံးပျံ ၃၈ လုံးတဲ့ အဖေက ရေထားတယ်။ တယောက်တည်း  ခရီးထွက်လာတဲ့ အင်ဒိုနီးရှားကောင်လေးနဲ့ ဓာတ်ပုံတယောက်တလှည့် ရိုက်ပေးတယ်။ သူ အီးဘိုက်ငှားတာ ကိုယ်တွေထက်တောင် သက်သာသေးတယ်။ ပြီးရင် အင်းလေးသွားမှာတဲ့ အားကျလိုက်တာ ငယ်ငယ်ရွယ်ရွယ်နဲ့ ကမ္ဘာပတ်နေတာ။ ကားဂိတ်ကနေ ဟိုင်းလတ်ကားလေးနဲ့ လာခေါ်တယ်။ လိုက်မဲ့သူတွေကို ပတ်ခေါ်တာ ပုဂံတခွင်အနှံ့ပဲ။ ကားပေါ်မှာပါတဲ့ ပုဂံသူအန်တီကြီးတယောက်နဲ့ စကားပြောတော့ ညောင်ဦးဖက်က ဟိုတယ်ခ၊ စားသောက်စရိတ် သက်သာတယ်တဲ့။ ဟိုင်းဝေးလမ်းက မညက်ညောဘူး တချို့အိမ်သာတွေက မသန့်ဘူး။ ပုဂံမှာ တရက်တည်းဆိုပေမဲ့လည်း မိသားစု၊ သူငယ်ချင်းတွေနဲ့ သွားခဲ့တဲ့ခရီးမို့လို့ အင်မတန်ပျော်ဖို့ ကောင်းပါတယ်။ အမှတ်တရရှိနေမဲ့ ခရီးလေးပါပဲ။

Happy Traveling !
Happy birthday to Magyi ! Wish you be happy & healthy !
သြဂုတ် ၁၀၊ ၂၀၁၉ ။

နန်းမြင့်မျှော်စင်
တယောကြိုးလေးချောင်းကိုတောင် မနည်းသင်နေရတာ စောင်းကြိုး ၁၆ ချောင်းဆိုရင် ....

၂၀၁၂ ဇွန် ၆ နော်ဝေးနိုင်ငံ အော်စလိုမြို့အမေစုကို နိုဘယ်ဆုချီးမြှင့်တဲ့ အခမ်းအနားမှာ
ဖျော်ဖြေခဲ့တဲ့ စောင်းနေဝါရဲ့ မေတ္တာရွှေစောင်း စောင်းလက်သံ...
‌စောင်းသံဟာ အင်မတန် သာယာပါတယ်...နားဆင်ကြည့်ပါ...

No comments: