အလွဲများ (၃)...

စတိတ်ရဲ့မြို့ကြီးတွေမှာသာ ဘတ်စ်ကား၊ မီးရထားရှိပြီး တနေရာနဲ့ တနေရာ ဝေးတော့ ကားမှ မမောင်းတတ်ရင် လမ်းလျှောက်လို့လဲမရ။ ကျောင်းမပြီးခင် လိုင်စင်ရအောင် ကြိုးစားရပါတယ်။ ပထမဆုံး သင်မောင်းလိုင်စင် အရင်ဖြေရပါတယ်။ အိုင်အိုဝါမှာတော့ ကွန်ပျူတာနဲ့ ဖြေရပြီး အင်ဒီးယာနား ဖို့ဝိန်းမှာတော့ စာရွက်ပေါ်မှာ ဖြေရပါတယ်။ အိုင်အိုဝါမှာ သင်မောင်းလိုင်စင်ရပြီးတာနဲ့ လိုင်စင်ဖြေလို့ရပေမဲ့ အင်ဒီးယာနားမှာတော့ ၆လကြာမှာ လိုင်စင်ဖြေလို့ ရပါတယ်။ ပြည်နယ်ရဲ့ ဥပဒေပေါ် မူတည်ပါတယ်။ စတိတ်မှာ ကားမောင်းလိုင်စင်ကလည်း အရေးကြီးတာမို့ စန်းထွန်းတယောက် ခြေထောက်ကို ဘီးတတ်နိုင်အောင် ကြိုးစားနေပါတယ်။

လိုင်စင်ရပြီး ကျောင်းကနေ မကြာခင် ထွက်ခွာကြတော့မဲ့ ဆူနမ်တို့ဆီကနေ အတင်းလည်ပင်းညှစ် ဈေးလျော့ခိုင်းပြီး ဟွန်းကလွဲရင် ကျန်တာအကုန်မြည်တဲ့ ဖွတ်ချက် ဖွတ်ချက်ကားလေးတစီး ဝယ်ထားရပါတယ်။ ဆူနမ်တို့ကတော့ "ကားက အပြင်ပန်းသာ မကောင်းတာ စက်က အတော်ကောင်းတယ်" ဆိုပြီး ဈေးသည်အိုက်တင်နဲ့ ပြောလေ့ရှိပါတယ်။ နိုဝင်ဘာလလယ်လောက်ဆိုရင် နှင်းထုက ၈လက်မလောက်ရှိမှာမို့ ကားမောင်းကျင့်ဖို့ မလွယ်တော့ပါဘူး။ ဒီတော့လည်း " နိုဝင်ဘာလလယ် နှင်းမကျမှီ လိုင်စင်ရရေး ဒို့အရေး..." လို့ ကြွေးကြော်ရင်း နေ့တိုင်း အားရင်အားသလို ကားမောင်းသင်နေရပါတယ်။ ဆရာကတော့ ဆူနမ်ပေါ့။

ကားကို ကျွှမ်းကျင်စွာ မောင်းတတ်ဖို့လိုသလို လမ်းမှာရှိတဲ့ ဆိုင်းဘုတ်တွေ ညွှန်တဲ့အတိုင်း အတိအကျလိုက်နာဖို့လည်း လိုအပ်ပါတယ်။ ကားမောင်းတော့မယ်ဆိုရင် ပြည်နယ်ဥပဒေနဲ့ လမ်းအညွှန်းဆိုင်းဘုတ်တွေ သိဖို့ လိုအပ်ပါတယ်။

အနီရောင်၊ လိမ္မော်ရောင်က သတိပေးဆိုင်ဘုတ်၊ အဝါရောင်က ရှေ့ကလမ်းအခြေအနေကို သတင်းပေးတာ၊ အပြာရောင်က ရှေ့မှာ ဓာတ်ဆီဆိုင်၊အစားအစာရှိတယ်ဆိုတာ သတိပေးတာ၊ အစိမ်းရောင်ကတော့ ဘယ်မြို့ မိုင်ဘယ်လောက်။

ပုံ ၉ - လမ်းဆုံလမ်းခွတွေမှာ STOP ဆိုင်းတွေ့ရင် ကားကို လုံးဝရပ်။ အရင်ရောက်တဲ့သူ အရင်ထွက်။

ပုံ ၂ - ကတော့ ဟိုင်းဝေးလမ်းမကြီး။

ပုံ ၄ -SPEED LIMIT 50 တွေ့ရင် ၄၅နဲ့ ၅၀ ကြား မောင်းရပါတယ်။ ၅၀ထက် ကျော်လို့မရ။

ပုံ ၁၁ -YIELD ဆိုင်းတွေ့ရင် အရှိန်လျော့ပြီး ရပ်ဖို့အသင့်ပြင်။

ပုံ ၃၈ - SCHOOL ZONE ဆိုင်းတွေ့ရင် အရှိန်လျော့ပြီး  သတိထား ရပ်ဖို့ ရယ်ဒီပြင်။

ပုံ ၂၃၊ ၄၁ - လိမ်း(LANE)ချိန်းချင်ရင် အလယ်လိမ်းကို အသုံးပြ ု။


လိမ်းချိန်းတော့မယ်ဆိုမယ်ဆိုရင် မှန်တွေကနေ နောက်ကားကို ကြည့်။ တခါတလေ နောက်ကားက အရမ်းကပ်နေရင် မှန်မှာ မမြင်ရဘူး BLIND SPOT လို့ ခေါ်ပါတယ်။ နောက်ကို လှည့်ကြည့်ဖို့လည်း လိုပါတယ်။

ပုံ ၁၈ - မိန်းလမ်းမကြီးပေါ် တက်လာမဲ့ ကားတွေရှိတော့ သတိပြ ု။ ကွေ့တိုင်း SIGNALပြဖို့ လိုပါတယ်။




NO PASSING ZONE ဆိုင်းတွေ့ရင် ကွေ့လို့ မရတော့ပါဘူး။ ပုံ ၄၆ - အဝါရောင်တုံးလေးတွေဆိုရင် ကွေ့လို့ရပြီး အဝါရောင်လိုင်းဆိုရင် ကွေ့လို့ မရပါ။

 

  SCHOOL BUS က STOP ဆိုင်းပြထားရင် မီတာ ၁၀၀ လောက်ကနေ ရပ်ရပါမယ်။ SCHOOL BUS ကို ကျော်တက်လို့ မရပါဘူး။ လူနာတင်ယာဉ်၊ရဲကားတွေ ဥသြဆွဲပြီး လာရင် ညာကပ် လမ်းရှင်းပေးပြီး ရပ်ပေးရပါတယ်။

လိုင်စင်ရအောင် ကြိုးစားကြတဲ့အခါ တခေါက်တည်းနဲ့ ရသွားတဲ့သူက အရမ်းရှားပါတယ်။ အနည်းဆုံး ၃၊၄ ခေါက်တော့ ဖြေကြရပါတယ်။ ဒီလို ကြိုးစားကြရင်း ကြံကြုံရတဲ့ အလွဲလေးတွေကတော့...

တရုတ်ပြည် ဝူဟန်ပြည်နယ်မှာ ကားမောင်းခဲ့တဲ့ ကျုံန်းချီးတယောက် လိုင်စင် သွားဖြေတော့ ၂ လ ဖြေဆိုခွင့် ဘမ်းလိုက်ပါတယ်။ များသောအားဖြင့် ၂ ပတ်၊ ၃ ပတ် ပဲ ဘမ်း(၃ပတ်ကြာမှာ လာဖြေဆိုခွင့် ပြုခြင်း)တာ သူ့ကျမှ ဘာလို့ ၂ လ ဘမ်းတာပါလိမ့်လို့။ သူများလမ်းကြောင်းဆီကို မှားဝင်သွားလို့တဲ့။ ဘမ်းလည်း ဘမ်းချင်စရာပါပဲ။ critical error မကပဲ fatal error ဖြစ်နေလို့ပါ။

အကွေ့မှာ စစ်ကနယ်ပြဖို့ မေ့သွားတဲ့ ဆူနမ်ကတော့ ၃ ကြိမ်မြောက်နဲ့ လိုင်စင်ရခွင့်ကို လက်လွတ်ခဲ့ပါတယ်။

မိန်းလမ်းမကြီးပေါ်ကနေ ရှေ့မှာ STOP ဆိုင်းလည်း မရှိဘဲ လမ်းသွယ်လေးတွေမှာ STOP ဆိုင်းရှိလို့ ရပ်နေတဲ့ ကားတွေကို လက်ကလေးပြကာ အရင်သွားလို့ ဦးစားပေးလိုက်တဲ့ ယောင်းချန်ခမျာ ၃ ပတ် ဘမ်းခံလိုက်ရပါတယ်။ လမ်းသွယ်က STOP ဆိုင်းမှာ ရပ်ပြီး မိန်းလမ်းက ကားရှင်းအောင် စောင့်နေတဲ့ ကားတွေခမျာ မိန်းလမ်းက ကားက ရုတ်တရတ် လက်လေးပြကာ ဦးစားပေးတော့ ဘယ်နဲ့ဟာပါလိမ့်ဆိုပြီး အူကြောင်ကြောင်တွေ ဖြစ်လို့။ ‌ယောင်းကို တွေ့တိုင်း "You are so kind."လို့ စကြတော့တာပါပဲ။

မလေးရှားလေး ဂျွှန်နဲ့ ရုရှား‌ရှားလေး အီလီယာ၊ ဆာကေး ၊ ဗလာဒီမာ တို့ အဖြစ်ကတော့ ဒီလို..။ ဂျွှန့်မှာ သင်မောင်းလိုင်စင်ရှိပြီး အီလီယာမှာတော့ ရုရှကားမောင်းလိုင်စင် ရှိပါတယ်။ လိုင်စင်ဖြေပြီးပြန်လာရင် ဂျွှန်က လိုင်စင်ရ၊ အီလီယာက သင်မောင်းလိုင်စင်ရလို့ လိုင်စင်ရသူ ဂျွှန်က ကားကို မိန့်မိန့်ကြီး မောင်းလို့.... သူတို့အတွေးက ဒီလို။ အလာတုန်းက လိုင်စင်ရှိသူကတယောက်က မောင်းလာပြီး ဂဂျွှန်က သူလိုင်စင်ရမှာလို့ တထစ်ချ ယုံကြည်ပြီး ပြန်ခိုင်းလိုက်ပါတယ်။ လိုင်စင်ဖြေပြီးချိန်မှာတော့ ဂျွှန်က လိုင်စင်မရ၊ အီလီယာကလည်း သင်မောင်းလိုင်စင်မရတော့ ပြန်ဖို့ အခက်ကြုံပါတယ်။ ရာမားလိုင်စင်ဖြေတာကို လိုက်ပို့ပေးတဲ့ ဆူနမ်ခမျာ ကံထူးသွားပါတယ်။

ဂျွှန်က သူလိုင်စင်မအောင်တာကို မခံမရပ်နိုင်ဖြစ်လို့။ လိုင်စင်ရမှာလို့ တထစ်ချ ယုံကြည်ထားတာ။ မလေးရှားမှာ ကားကို ကျွှမ်းကျွှမ်းကျင်ကျင် မောင်းနိုင်ပေမဲ့ မလေးရှားက စင်္ကာပူလို ဘယ်မောင်း။ STOP ဆိုင်းကျော်မှ ကားကို ရပ်လို့ဆိုင်းဘုတ်မတိုင်ခင် ရပ်ရကြောင်း၊ SPEED LIMIT 45 ဆိုင်းတွေ့တာ ၂၅ မိုင်နှုန်းနဲ့ မောင်းနေလို့၄၀ ကနေ ၄၅ ကြား မောင်းရကြောင်း ဆူနမ်က သင်ပေးခဲ့ရပါတယ်။ ဥပဒေကို နားမလည်ဘဲ ဘယ်လိုများ ကားမောင်းလိုင်စင် လာဖြေပါလိမ့်၊ လိုင်စင် တခါတည်းနဲ့ ရမယ်လို့ ဘာဖြစ်လို့တထစ်ချ ယုံကြည်နေပါလိမ့်လို့ ဆူနမ်ခမျာ အံ့တွေ သြလို့။ ကားကို ကျွှမ်းကျွှမ်းကျင်ကျင် မောင်းနိုင်ပေမဲ့ ဥပဒေကို နားမလည်လို့ ကျတာလို့ တို့တွေ သဘောပေါက်ပေမဲ့ လက်မခံနိုင်တဲ့ ဂျွှန့်ကို မြင်ရတော့ over confident လို့ မှတ်ချက်ပြုကြတယ်။

STOP ဆိုင်းတွေ့ပေမဲ့ GO လို့ ပြောတဲ့ လိုင်စင်စစ်တဲ့ အန်တီကြီးရဲ့ စကားကို နားယောင်မိတဲ့ မိုင်းခမျာ ကျတော့တာပဲ။ ဒါကြောင့် STOP ဆိုင်းတွေ့လို့ မိုင်းကို စချင်တိုင်း လက်ကလေးကို ရှေ့ထုတ်ကာပြပြီး "STOP means full stop." လို့ စလေ့ရှိပါတယ်။

မီးပွိုင့်မှာ မီးစိမ်းပေမဲ့ မီးနီနေလို့ ရပ်နေတဲ့ မော်တော်ဆိုင်ကယ်ကို လက်ကလေးပြကာ ဦးစားပေးရှာတဲ့ ရာဂျက်ကို လိုင်စင်စစ်သူ အန်တီကြီးက မီးစိမ်းလေးကို ညွှန်ပြရင်း "Green means go." လို့ သတိပေးကာ ၃ပတ် ဘမ်းလိုက်ပါတယ်။ ရာဂျက်ကို တွေ့တိုင်း "Green means go. Red means stop." လို့ ဟားလေ့ရှိပါတယ်။ မခံချင်စိတ်နဲ့ ကြိုးစားလိုက်တော့လားမသိ နောက်တကြိမ်မှာ လိုင်စင်ရပါတယ်။ လိုင်စင်ရသွားပြန်တော့လည်း ရာဂျက်တယောက် "Green means go. Red means stop." ဆိုတာ တကယ်သဘောပေါက်သွားပြီနဲ့တူတယ်လို့ ဟားကြပြန်တယ်။ ရာဂျက်လိုင်စင်ရတော့ တို့တွေမှာ ဝမ်းနည်းပက်လက်တွေ ဖြစ်လို့ စရမဲ့သူ မရှိတော့လို့လေ။

လိုင်စင်ရပြီးသားသူတွေနဲ့ လိုင်စင်မဖြေရသေးတဲ့သူတွေက ဟားနိုင်ပေမဲ့ လိုင်စင်ဖြေနေဆဲသူတွေကတော့ မချိသွားဖြဲ။ နောက်ဆို စန်းထွန်းလည်း မချိသွားဖြဲ ရတော့မှာ...:D ။ ကိုင်း...ကြိတ်လိုက်စမ်း...စန်းထွန်းရေ.... အလှည့်ကျရင် မနွဲ့မတမ်း....:P ။

စန်းထွန်း
စက်တင်ဘာ ၁၈၊ ၂၀၁၁။