၂၀၂၃ အောက်တိုဘာ ၁ တနင်္ဂနွေနေ့ ဝိုင်းနဲ့ စင်ထရယ်ပါ့ခ်သွားလည်းတယ်။ ဝိုင်းက ဇွန်တုန်းက အီဂျစ်ပြောင်းသွားတာ ခုနယူးယောက်မှာ သင်တန်းလာတက်တာ။ ကိုယ့်အိမ်မှာတည်းတာ မနက် ၇ နာရီလောက် ရုံးသွားပြီး ည ၈၊ ၉ နာရီမှ ပြန်လာတော့ ပင်ပန်းနေပြီ။ စနေနေ့က မိုးတအားရွာလို့ နေ့လည်လောက်မှာ ယိုးဒယားဘုန်းကြီးကျောင်း၊ ကော်စကိုသွားကြတယ်။ ဝိုင်းက ယိုးဒယားက မှာ ၂ နှစ်လောက်နေပြီး Assumption University မှာ မာစတာတက်ခဲ့တာဆိုတော့ ယိုးဒယားအစားအစာ ကြိုက်တယ်။ စထရယ်ပါ့ခ်ကနေ တရုတ်တန်းမှာ ဟော့ပေါ့သွားစားတယ်။ ပြီးတော့ ဘရွှတ်ကလင်းတံတားကိုလမ်းလျှောက် မက်ဟန်တန်စကိုင်းလိုင်းကိုငေး။ အဲ့ဒီနေ့က ၆ မိုင်လောက် လမ်းလျှောက်လိုက်တော့ ဒူးနာသွားတယ်။ ဘရွှတ်ကလင်းတံတားမှာ ဆုံလည်ဝိုင်းပေါ် မတ်တပ်ရပ် သီချင်းလေးနဲ့က အိုင်ဖုန်းနဲ့ပတ်ပတ်လည် လှည့်ရိုက်ပေးတဲ့ဆိုင်တွေ အများကြီးပဲ။ ဝိုင်းက ဆူနမ်နဲ့ ပါရင် အဲ့လိုရိုက်ကြမယ်တဲ့။ နယူးယောက်မှာ ၉ နှစ်နေခဲ့ပြီး ထွက်သွားတာ ၃ လပဲရှိသေးတဲ့သူက နယူးယောက်ကို ကြိုက်တယ် ကြိုက်တယ်လို့ အော်နေတော့တာပဲ။
Happy New Year!
စန်းထွန်း
ဒီဇင်ဘာ ၃၀၊ ၂၀၂၃။
