ဆန်းကြယ်တဲ့ စိတ် - ၁

၂၀၂၂ ဇှုလှိုင် ၉ တနင်္ဂနွေနေ့ မနက် ၁၁ ခွဲ သွားဆေးခန်းဆီ အချိန်မှီရောက်ဖို့ ‌လောနေတုန်း မြေအောက်ရထားကနေ မြေပေါ်ဆီ လှေကားအတက် ကိုယ့်ရှေ့မှာ တွန်းလှည်းနဲ့ အဘွားတယောက်။ သူ့နောက်ကနေဆို နောက်ကျမယ် မြန်မြန်ရောက်ချင်ဇောနဲ့ သူ့ဘေးကလမ်းကြောင်းကို ရွေးလိုက်တယ်။ သူ့နောက်ကလူတယောက်က သူ့တွန်းလှည်းကို မြှောက်ပြီး ကူသယ်ပေးလိုက်တဲ့အခါ ဟာ..ခနဲ ဖြစ်သွားတယ်။ ကိုယ်က မကူညီဘဲ မြန်ချင်ဇောနဲ့ ဘေးကနေ ကျော်တက်ဖို့ ကြိုးစားနေချိန်မှာ ကူညီတတ်တဲ့သူက ပေ့ါပေ့ါပါးပါးလေး ကူညီသွားတာကို တွေ့လိုက်ရတဲ့အခါ ရှက်သွားတယ်။ ကူညီတဲ့သူကိုလည်း လေးစားချီးကျူးမိသလို ကြည့်စမ်း ဘာဖြစ်လို့ကူညီဖို့ မတွေးမိပါလိမ့်။ အဲ့ဒီလို ကူညီလို့ရတာပဲ နောက်တခါကျရင် အဲ့လိုကူညီမယ်လို့  တွေးမိတယ်။ အရင်တုန်းက အဲ့လိုအဖြစ်မျိုး မြင်ဖူးပေမဲ့ အဲ့ဒီလိုတွေးမတွေးမိဘူး။ မျက်စိထဲလည်းမမြင် စိတ်ထဲလည်းမရောက်၊ မျက်စိထဲမြင်ရင်တောင် စိတ်ထဲမရောက်တာမျိုး။ ခုတော့လည်း ဘာရယ်မဟုတ်ဘဲ အကျိုးအကြောင်း တိုက်ဆိုင်တဲ့အခါ သင်ခန်းစာ၊ သံဝေဂ၊ စဥ်းစားဆင်ခြင်၊ အတွေးလေးရလို့ ညဏ်လေးတချက် လက်သွားတာမျိုး။ စိတ်ဆိုတာ ဆန်းကြယ်ပါလား။

စန်းထွန်း

ဇူလှိုင် ၁၃၊ ၂၀၂၂။

June 18, 2022, Saturday, Central Park, New York