ဒေါ်ဇစ်…

တောလားစီးရီးတွေ ရေးစရာမရှိတော့ တွေ့ကြုံဖူးတဲ့သူတွေထဲက ထူးခြားပြီး အမှတ်တရဖြစ်တဲ့သူတွေအကြောင်း ပြောရဦးမယ်။ ၂၀၀၆ သင်္ကြန်မှာ မှော်ဘီဝါးနက်ချောင်း ဗောဓိရိပ်ငြိမ်တောရမှာ ပထမဆုံးတရားစခန်းဝင်ဖြစ်တယ်။ လှည်းတန်းက ဆရာကြီးဦးမြကြိုင် အင်္ဂလိပ်စာသင်တန်းကျောင်းမှာ တက်နေတဲ့မကြီးသူငယ်ချင်းက ဆရာကြီးက တရားစခန်းဝင်ချင်တဲ့ရှိရင်ခေါ်ခဲ့ ဝင်မလားတဲ့။ တရားစခန်း တခါမှမဝင်ဘူးလို့ အဖေါ်ကောင်းတာနဲ့ လိုက်သွားတာတာ ဆရာတော်ကို ကြည်ညိုလို့ ၂၀၀၇ သင်္ကြန်မှာ သီလရှင်ဝတ်နဲ့ တရားစခန်းဝင်တယ်။ ဘုန်းကြီးကျောင်းကို သွားလေ့မရှိပေမဲ့ ဗောဓိရိပ်ငြိမ်ဆရာတော်ကို ကြည်ညိုလို့ အစ်မတွေဆွမ်းသွားကပ်မယ်ဆိုရင် လိုက်တယ်။ ဆရာတော်က နိုင်ငံခြားရောက်ရင် တရားအားထုတ်ဖြစ်မှာ မဟုတ်ဘူး အခုတရားအားထုတ်ထားလို့မိန့်တာ သိပ်မှန်တာပဲ။ ဆယ်နှစ်ကြာမှ ၂၀၁၇ ကျေးဇူးတော်ပိတ်ရက်မှာ မမီးခေါ်လို့ နယူးဂျာစီပြည်နယ်က မဟာစည်ရိပ်သာမှာ တရားစခန်းဝင်ဖြစ်တယ်။ ရွှေတိဂုံစေတီငယ် တည်ထားပြီး ဓမ္မာရုံ၊ ဆွမ်းစားဆောင်၊ အမျိုးသား၊ အမျိုးသမီးယောဂီဆောင် ကျယ်ကျယ်ဝန်းဝန်း၊ အလှုရှင်တွေကလည်း သဒ္ဓါတရားကောင်း၊ ဝေယျာဝစ္စ လိုလေးသေးမရှိ ပြည့်စုံတယ်။ အဲ ... အဆင်မပြေတာက ဓမ္မာရုံထဲမှာ တရားစုထိုင်ကြရင် အမျိုးသမီးယောဂီတယောက်က အိတ်ကိုဖွင့်လိုက်ပိတ်လိုက်လုပ်ပြီး ပစ္စည်းရှာတာ အတော်ဆိုးတယ်။ တရားထိုင်နေကျမဟုတ်လို့ မျက်စိမှတ်ထားပေမဲ့ စိတ်တွေက ဟိုရောက်ဒီရောက်။ ဂယောက်ဂယက် စုစည်းလို့မရ၊ နာကျင်တဲ့ဝေဒနာနဲ့ နပန်းလုံးနေရလို့ တရားမှတ်လို့မရတဲ့အထဲ ဇစ်သံကတမှောင့်။ တိတ်ဆိတ်နေတော့ ဇစ်သံကအတော့်ကို ကျယ်တယ် တခါတည်းဖွင့်တာလည်းမဟုတ်။ ဖွင့်လိုက်ပိတ်လိုက်နဲ့ အတော်အနှောင့်အယှက်ဖြစ်တယ်။ တစ်ရှူး၊ ပရုတ်ဆီယူမယ်ဆိုရင်လည်း ဇစ်ဖွင့်ထားလို့ ရပါတယ် တရားစခန်းမှာ ဘယ်သူမှမခိုးပါဘူး။ ဇစ်ကိုဖွင့်လိုက်ပိတ်လိုက်မလုပ်ရင် အိပ်ငိုက်ပြီးဟောက်သံက တခေါခေါ။ ဟောက်သံမခံမရပ်နိုင်အောင် ကျယ်လာလို့ ပခုံးကိုပုတ်ပြီး အသိပေးရတယ်။ အန်တီကြီးက အသက်ငါးဆယ်ကျော် ဖြူဖြူပုပု တရုတ်မ မျက်နှာလေးက ကလေးလေးလိုပဲ။ သူ့ဇစ်သံကြောင့် သူများ‌တွေ အနှောင့်အယှက်ဖြစ်မှန်း သိပုံမရဘူး။ ပြောလိုက်ချင်တာ မကောင်းတတ်လို့။ သဘောကောင်းပြီး ခင်မင်တတ်တဲ့ပုံပေါက်ပေမဲ့ သူ့ဇစ်သံကြောင့် မခင်ချင်တော့ဘူး။ ဒေါ်ဇစ်ကိုကြည့်ပြီး သူ့လိုမဖြစ်ချင်ဘူး၊ ကိုယ့်အပြုအမူကြောင့် သူတပါးစိတ် အနှောင့်အယှက်မဖြစ်စေချင်ဘူး၊ ဒေါ်ဇစ်ကိုကြည့်ပြီး သင်ခန်းစာရတယ်။ နယူးဂျာစီကျောင်းမှာ တစ်နှစ်တကြိမ်လောက် တရားစခန်းဝင်ဖြစ်ပေမဲ့ ဒေါ်ဇစ်နဲ့ နောက်တခါမှ မဆုံတော့ဘူး။ ဒေါ်ဇစ်ကြောင့် သူတပါးစိတ်အနှောင့်အယှက်ဖြစ်စေတဲ့ အပြုအမူတွေမလုပ်ဖို့ သတိထားဆင်ခြင်မိတယ်။

စန်းထွန်း

ဒီဇင်ဘာ ၁၈၊ ၂၀၂၀။

Isla del Sol (Sun Island), Lake Titicaca, Bolivia, 11/04/2019.

ပြိုင်မလား...

ကြီးကြီးစန်းထွန်းနဲ့ စကားပြောမလားလို့မေးရင် ကြီးကြီးပဲပြောလိုက်ပါ၊ နောက်မှပြောမယ်နော်ဆိုပြီး ငြင်းတတ်တဲ့ တူတော်မောင်ဟာ ဒီနေ့ကြီးကြီးစန်းထွန်းမွေးနေ့ ကြီးကြီးစန်းထွန်းနဲ့ စကားပြောမလားလို့မေးတော့ ပြောမယ်တဲ့။ ကြီးကြီးစန်းထွန်းကို ဟတ်ပီးဘတ်ဒေးဆိုပေးရအောင်ဆိုတော့ မဆိုချင်ဘူးတဲ့။ သားမွေးနေ့တုန်းက ကြီးကြီးစန်းထွန်းက ပီယာနိုတီးပြီး ဟတ်ပီးဘတ်ဒေးသီချင်းဆိုပေးတယ်။ ကြီးကြီးစန်းထွန်းမွေးနေ့ကျတော့ သားကဆိုပေးရမှာပေါ့လို့ပြောတော့ ဟတ်ပီးဘတ်ဒေးမဆိုချင်ဘူး တိုင်တန်းနစ်သီချင်းပဲ ဆိုမယ်တဲ့။ ဟတ်ပီးဘတ်ဒေးပဲ နားထောင်မယ် တခြားဟာဆို နားမထောင်ဘူး။ မွေးနေ့လက်ဆောင် တိုင်တန်းနစ်သင်္ဘောပုံ ဆွဲပေးမယ်တဲ့။ မလိုချင်ပါဘူး မွေးနေ့ကဒ်ဆိုရင်ယူမယ်။ မွေးနေ့ကဒ် သားမှမဆွဲတတ်တာ ကြီးကြီးခင်စန်း ဓာတ်ပုံပို့ပေးရင် သားဆွဲတတ်မှာပါ။ သားက မဆွဲတတ်ဘူး ပထမဆုံးဆိုတော့ အစမှာနည်းနည်းခက်မှာပေါ့။ ဘယ်ဟာပဲဖြစ်ဖြစ် အစမှာခက်တယ် နောက်လွယ်သွားလိမ့်မယ် စမ်းဆွဲကြည့်ရင်သိမှာပေါ့။ cup cake နဲ့ မိုးပျံပူဖောင်းဆွဲပေးတော့ ကြည့် သားသားဆွဲတတ်တယ်မလား နောက်ဆိုမစမ်းကြည့် မကြိုးစားကြည့်ဘဲနဲ့ ခက်တယ်လို့မပြောနဲ့။ ဟတ်ပီးဘတ်ဒေးကြီးကြီးစန်းထွန်းလို့ရေးလိုက် သားသားမှမရေးတတ်တာ။ နာမည်မရေးရင် ဘယ်သူ့မွေးနေ့လို့ ဘယ်လိုလုပ်သိမှာလဲ။ စာလုံးပေါင်းပြတော့ ကြီးကြီးခင်စန်း ကြီးကြီးစန်းထွန်းလို့ရေးတယ်။ ကြီးကြီးစန်းထွန်းမွေးနေ့လေ ကြီးကြီးခင်စန်းနာမည်ဖျက်လိုက် မဖျက်ဘူးလုပ်နေတယ်။ အဲ့ဒါဆိုမယူတော့ဘူး ဟတ်ပီးဘတ်ဒေးစန်းထွန်းလို့ မက်ဆင်ဂျာမှာ သားသားရေးလိုက်တယ်။ အဲဒါမလိုချင်ဘူး ကဒ်မှာရေးတာကို လိုချင်တာ။ ဟတ်ပီးဘတ်ဒေးသီချင်းမဆိုချင်၊ ဘတ်ဒေးကဒ်မရေးချင်တဲ့ တူတော်မောင်ကို အတင်းပြောလိုက်၊ ချော့လိုက်၊ နားလည်အောင် ပြောရတာ မောလိုက်တာ သူ့အဖေအတိုင်းပဲ ခေါင်းမာချက်။ သူပုံဆွဲနေတာကို ကိုယ်တွေကဝိုင်းပြောနေလို့ ကြီးကြီးတို့က ရှုပ်လိုက်တာတဲ့။ အေး ရှုပ်တယ်ဆိုရင် ဖုန်းချလိုက်မယ်ဆိုပြီး ဖုန်းချလိုက်တာ ပြန်ခေါ်တယ်။ အဖေက ကိုယ့်ကြီးကြီးတွေကို အဲ့လိုပြောရသလားလို့ပြောတော့ ဘာမှပြန်မပြောဘူး ငြိမ်နေတယ်။ သားက ဟတ်ပီးဘတ်ဒေးမဆိုပေးလို့ ကြီးကြီးစန်းထွန်းက အရမ်းဝမ်းနည်းနေတယ်လို့ပြောတော့ အဲလောက်လည်း ဝမ်းနည်းမနေပါနဲ့ဗျာတဲ့။ 

မကြီးပြောထားလို့ ကြီးကြီးရေ ဆောရီးပါ ဘာကိုဆောရီးတာလဲ ဟတ်ပီးဘတ်ဒေးသီချင်းမဆိုပေးတာ။ အေး နောက်ဆိုရင် ဘယ်သူ့ဘတ်ဒေးပဲဖြစ်ဖြစ် ဟတ်ပီးဘတ်ဒေးသီချင်းဆိုပေးရမယ်၊ မွေးနေ့ကဒ်ဆွဲပေးရမယ် မွေးနေ့ရှင် ပျော်သွားတာပေါ့။ နိုင်ငံခြားမှာဆိုရင် Teacher Day ၊ Mother Day နေ့ဆိုရင် ဆရာတွေ၊ မိဘတွေကို ကဒ်လေးပေးကြတယ်။ ကြီးကြီးခင်စန်းအတွက် အပင်စိုက်ပေးလို့ပြောတော့ စိုက်ပေးတယ်။ ကိုယ့်သစ်ခွနဲ့ peace lily ကိုပြတော့ သူကလည်းအားကျမခံ ကြီးကြီးခင်စန်းအတွက် စိုက်ထားတဲ့အပင်ပြပြီး ပြန်ကြွားတယ်။ တူတော်မောင်ဟာ ပုံဆွဲတော်တယ် ကိုယ်တို့အိမ်မှာ မကြီးတယောက်ပဲ ပုံဆွဲတော်တယ်။ ရွှေတိဂုံဘုရားနဲ့ သီတဂူဆရာတော်ကို အတော်ကြည်ညိုတယ်တဲ့။ အားရင် ဘုရားပုံပဲဆွဲနေတယ် ခုတိုင်တန်းနစ်ကို ဓာတ်ကျနေတယ်။ ဒီကောင် ဘုန်းကြီးဝင်စားတာလား၊ ဘုရားနဲ့နီးတဲ့ အသိုင်းအဝိုင်းက လာတာထင်တယ်။ လေသံက ဆရာကြီးသူသိသူတတ် သူ့အဖေက ဆရာကြီး သူ့အမေက ဆရာမဆိုတော့ ဒင်းတို့သားက ဆရာ့ဆရာကြီးဖြစ်နေတာပေါ့။ တနေ့ ပြောတာမကြားလို့ ကြီးကြီးနားမပါဘူးလားတဲ့ ကြည့် ကြီးကြီးခင်စန်းမှာ နားပါတယ်တွေ့လား ကြီးကြီးစန်းထွန်းမှာလည်း နားပါတယ် သားမှာလည်း နားပါတယ်။ နားမပါတဲ့သူလို့ သားမြင်ဖူးလား နောက်ဆို နားမပါဘူးလားလို့ ဘယ်သူ့ကိုမှ မပြောနဲ့ ကြီးတော်တွေကလည်း မလွယ်ဘူး။ ဖေ့ဘွတ်မက်ဆင်ဂျာမှာ voice message ပို့တာကိုသိသွားလို့ ပထမဆုံးပို့တာက ဟီးဟီးဟားဟား ဒုတိယမက်ဆေ့က ကြီးကြီးရေ ဒိန်ချည်ပုံပို့ထားတယ် တတိယမက်ဆေ့ကျတော့ "ကြီးကြီးရေ … သားလေ ကြီးကြီးကို သိပ်အရမ်းချစ်ပါတယ်”တဲ့။ ကြီးကြီးခင်စန်းမှာ မျက်ရည်တောင်ဝဲတယ်။ ကြီးကြီးသုံးယောက်ထဲမှာ ကြီးကြီးခင်စန်းကို အချစ်ဆုံးပဲ။ ကြီးကြီးခင်စန်းကလည်း သားသားကို အတော်ချစ်တာ။ ကြီးကြီးသိတဲ့ ကလေးတယောက်ဆို အဂင်္လိပ်၊ မြန်မာ၊ တရုတ်လို ဘာသာစကားသုံးမျိုး ပြောတတ်တယ်လို့ပြောတော့ အဲ့ဒီကလေးကို ရွှေတိဂုံဘုရားပုံပို့လိုက် သားနဲ့ပြိုင်ဆွဲမလားတဲ့ ရယ်လိုက်ရတာ။ သူဘာကိုလိုချင်တာ၊ ဘာကိုမကြိုက်တာ၊ သူတော်တဲ့ဟာကို တိတိကျကျသိပြီး ယုံကြည်မှုအပြည့်နဲ့ စိန်ခေါ်နေလေရဲ့…. 

စန်းထွန်း 

ဒီဇင်ဘာ ၁၁၊ ၂၀၂၀။

SanSan Htun · Gyi Gyi KS I love you very much by my nephew

Hallelujah...

Leonard Cohen ရဲ့ Hallelujah ... အရမ်းကြိုက်တဲ့ သီချင်းတပုဒ်..ဝိုင်းအခန်းဖော်တရုတ်မရဲ့ရည်းစားက ဝိုင်းတယောလေ့ကျင့်သံကို ဖုန်းထဲကနေကြားတော့ တော်တော်တိုးတက်လာတယ်လို့ ပြောတယ်။ မနှစ်က သူ့ခမျာ တော်တော်နားကလော်နေမှာပဲ ခုတော့ တို့တွေ နည်းနည်းတိုးတက်လာပြီကွ 1 out of 100 လို့ ပြောလို့ရပြီ။ အိမ်ရှင်သားနဲ့သူ့ရည်းစား အိမ်အပေါ်ထပ်ကို ပြောင်းလာကြတယ်။ သူတို့ခြေသံတဒုန်းဒုန်းကြောင့် ကိုယ်အိပ်လို့မရဘူးလို့ပြောတော့ ဝိုင်းက မင်း ပီယာနိုလေ့ကျင့်တာလည်း  သူတို့ကြားလိမ့်မယ်။ တယောများ သွားမလေ့ကျင့်နဲ့နော် တော်သေးတယ် မနှစ်ကပြောင်းမလာလို့ ကိုယ့်တယောသံများ ကြားရရင် ရဲခေါ်မလားမသိဘူး။ ရဲခေါ်တာက တော်သေးတယ် get out ဆိုပြီး အိမ်ပေါ်ကမောင်းချမှ ဒုက္ခဆိုပြီး ရယ်ရလိုက်တာ။ ငှက်စာကျွှေးတဲ့ခွက် လေတိုက်ပြီးကွဲသွားလို့ အသစ်ဝယ်တယ် အစာခွက်လေးက အိမ်ပုံစံချစ်စရာလေး။ ပထမနှစ်ရက်လောက် ငှက်တွေ မသိလာမစားဘူး။ အစာတွေလျော့မနေလို့ ကိုယ့်မှာ စိတ်တောင်မကောင်းဘူး။ အမေက သူတို့မသိသေးလို့ နှစ်ရက်လောက်ဆိုသိမှာ ငှက်တွေက လူကိုမှတ်မိတယ်တဲ့။ ဟုတ်မှာ ကိုယ်အိမ်ထဲနေထွက်လာရင် အော်ကြဟစ်ကြတာ ဆူညံနေတာပဲ။ ဘယ်သူရေ ဘယ်ဝါရေ ဒီမှာအစာကျွှေးနေပြီလို့ သူတို့အဖော် မိသားစုတွေကို လှမ်းခေါ်နေကြတာနေမှာ။ ငှက်တွေ အစာစားနေတာမြင်တော့ စိတ်ချမ်းသာရတယ်။ ရေကိုတော့ နှစ်ရက်တခါလဲပေးတယ်။ ငှက်တွေက ရေချိုးကြ ဆော့ကြတယ်တဲ့ အမေပြောတာ ဟုတ်မှာ။ ငှက်ရေခွက်ထဲမှာ ငှက်မွှေးတွေတွေ့တယ်။ အိမ်ကကြောင် အစာမစားလို့ အမေက စိတ်မကောင်းဘူး ငါးဝယ်ပြီးပြုတ် ထမင်းနဲ့နယ်ကျွှေးတော့ စားတယ်တဲ့။ ငှက်တွေကို ဆန်ကျွှေးတာမစားလို့ ဆန်ကွဲဝယ်ကျွှေးတော့ စားတော့တယ်တဲ့။ အသစ်ဝယ်လာတဲ့ သစ်ခွနဲ့ peace lily အပင်လေးတွေ မြင်ရတာ စိတ်ချမ်းသာတယ်။

စန်းထွန်း

နိုဝင်ဘာ ၄၊ ၂၀၂၀။

ဖီလင် - ၃၈

နိုဝင်ဘာ ၂၄ မှာ ကိုယ့်အသက် ၃၈ ပြည့်ပြီ။ မွေးနေ့ဆိုရင် ဝိုင်းနဲ့ ဟော့ပေါ့သွားစားကြလေ့ရှိပေမဲ့ ဒီနှစ်တော့ ကိုဗစ်ကြောင့် ဆိုင်မှာမစားရဲဘူး။ မတ်လကတည်းက အပြင်မထွက်တာ ၉ လလောက်ရှိပြီ။ နွေရာသီတုန်းက ကူးစက်နှုန်းတော်တော်ကျလို့ အပြင်သုံးခါထွက်တယ်။ ဆောင်းရာသီ ဖလူရာသီချိန် fatigue အပြင်မထွက်ရတာကြာလို့ အပြင်ပြန်ထွက်ကြ ခန့်မှန်းထားတဲ့အတိုင်း ကူးစက်နှုန်း ကြောက်မခန်းလိလိ တက်နေတယ်။ ဒီဇင်ဘာ ၁ ရက်နေ့ နယူးယောက်မှာ လော့ဒေါင်းစမယ်တဲ့။ ဆူနမ်က မွေးနေ့မှာ ဘာလုပ်သလဲ ... ဘာမှမလုပ်ဘူး ခါတိုင်းနေ့တွေလိုပဲ အလုပ်လုပ်နေတယ်။ အသက်ဘယ်နှစ်နှစ်ပြည့်တာလဲ ၁၈ နှစ်… ၁၆ နှစ်လို့ပြော... အေး… ၁၆ နှစ်။ ဝိုင်းက အသက်ဆိုတာ just a number လို့ပြောတော့ သဘောကျပြီး ရယ်လိုက်ကြတာ။ ကျန်းမာတယ်၊ အလုပ်ရှိတယ်၊ စားစရာရှိတယ်၊ မိသားစု၊ မိတ်ဆွေ၊ သူငယ်ချင်းတွေ ကျန်းမာနေတယ်ဆိုရင်ပဲ ကံတော်တော်ကောင်းနေပြီ။ အလုပ်ပြုတ်တဲ့သူ၊ လစာလျော့ခံရတဲ့သူတွေ အများကြီး ကြားရတဲ့သတင်းတွေက သတင်းကောင်းကို မရှိဘူး။ ခေတ်ပျက်ကြီးဆိုတော့ စိတ်ဖိစီးမှုများတယ်။ ကိုယ့်ဘာသာ အဆင်ပြေအောင်၊ ကျန်းမာအောင်၊ စိတ်ချမ်းသာအောင် ကြိုးစားပါတယ်။ ဖေ့ဘုတ်သုံးချိန်လျော့ပြီး စာပိုဖတ်ဖို့ ကြိုးစားနေတယ်။ ဝိတ်တက်လာလို့ ညဖက်စားတာလျော့ပြီး ယောဂလေ့ကျင့်ခန်းလုပ်တယ်။ အပင်လေးတွေကို ပိုဂရုစိုက်ဖြစ်တယ်။ ပီယာနိုတီး လေ့ကျင့်တယ်။ skin care ပိုလုပ်ဖြစ်တယ်၊ OSIM နဲ့ အနှိပ်ခံတယ်။ Guided Meditation Video နဲ့ ဝင်လေထွက်လေမှတ်ရင် အိပ်ပျော်တယ်။ တီးလုံးသံလေးတွေ နားထောင်ဖြစ်တယ်။ မိသားစုနဲ့ စကားပိုပြောဖြစ်တယ်။ မွေးနေ့အလှုအဖြစ် ‌မှော်ဘီဝါးနက်ချောင်းက ဗောဓိ‌ရိပ်ငြိမ်တောရကျောင်းမှာ ဆွမ်းလှုတယ်။ St.Jude ကလေးကင်ဆာသုတေသနဆေးရုံကို လှုတယ်။ အဖေ၊ အမေက အိမ်နီးနားချင်းတွေကို မုန့်လှုတယ်။ ကိုယ်ကျန်းမာ စိတ်ချမ်းသာစွာနဲ့ နေ့ရက်တိုင်းကို အဓိပ္ပာယ်ရှိရှိ ဖြတ်သန်းချင်ပါတယ်။

Happy Birthday to me!

Happy Thanksgiving!

စန်းထွန်း

နိုဝင်ဘာ ၂၇၊ ၂၀၂၀။

ဓာတ်ပုံမရိုက်ဖြစ်တာ ကြာပြီ

St.Jude Donation ECard

‌မွေးနေ့လက်ဆောင် ကိုယ့်ဘာသာပေးတာ

‌မွှေးနေ့လက်ဆောင် ကိုယ့်ဘာသာပေးတာ...

အဲ့လို classical music ကို အရမ်းကြိုက်တယ်…

အိပ်ခါနီး အမြဲနားထောင်တယ်...

၂၀၂၀ ရွေးကောက်ပွဲ…

နိုဝင်ဘာ ၃ ရက်နေ့ အမေရိကန်နိုင်ငံမှာ ရွေးကောက်ပွဲ ကျင်းပတယ်။ ရွေးကောက်ပွဲကို ၄ နှစ်တစ်ကြိမ် ကျင်းပပြီး သမ္မတသက်တမ်း နှစ်ဆက် ၈ နှစ် တာဝန်ထမ်းဆောင်ခွင့် ရှိတယ်။ ၂၀၁၆ တုန်းက ဟီလာရီကို နိုင်မယ်ထင်နေတာ ထရန့်နိုင်သွားတယ်။ ပြည်သူတွေပေးတဲ့ ပေါ်ပြူလာမဲမှာ ဟီလာရီက အနိုင်ရပေမဲ့ တကယ်အဆုံးအဖြတ်ပေးတဲ့ electoral college ကရွေးတဲ့မဲမှာ ထရန့်နိုင်တယ်။ ပေါ်ပြူလာမဲမှာနိုင်ပြီး electoral votes မှာရှုံးတာ ရှားတယ်။ ၂၀၁၀ တုန်းက အယ်လ်ဂိုးက ပေါ်ပြူလာမဲမှာနိုင်ပြီး electoral votes မှာ ဂျော့ဒဗလျူဘုချ့်ကို ရှုံးတယ်။ သူဌေးတုန်းက တီဗွီမှာသိပ်မပါပေမဲ့ သမ္မတဖြစ်တော့ နေ့တိုင်းသူ့သတင်းချည်းပဲ။ သတင်းအမြဲနားထောင်တဲ့ကိုယ် ထရန့်စိတ်ဓာတ်၊ အပြုအမှု၊ အပြောအဆိုကို မကြိုက်လို့ သူသမ္မတဖြစ်ပြီးကတည်းက သတင်းကိုမကြည့်တော့တာ။ အိတ်ချ်ဝမ်းဘီအလုပ်ဗီဇာကို တင်းကျပ်တာ၊ စီတီဇင်တွေရဲ့ ဆွေမျိုးတွေကို ခေါ်ခွင့်မပြုတော့တာ၊ ဒုက္ခသည်လက်မခံတော့တာ သူ့လုပ်ဆောင်ချက် ကောင်းတာထက် သူ့ကိုမကြိုက်တာက များနေတယ်။ ခုရွေးကောက်ပွဲမှာ ဂျိုးဘိုင်ဒန်ကို နိုင်စေချင်တာ။ ရီပါဘလင်ကန်ပါတီကို မကြိုက်လို့မဟုတ်ဘူးနော် နှစ်ပါတီစလုံးက တိုင်းပြည်ကောင်းအောင်လုပ်မဲ့ပါတီဆိုတာ ယုံကြည်ပါတယ်။ ရီပါပလင်ကန်ပါတီထက် ထရန့်ကိုမကြိုက်လို့။ ရီပါပလင်ကန်ပါတီက သမ္မတလောင်းက တခြားတယောက်ဆိုရင် မူဝါဒကိုကြည့်ပြီး ထောက်ခံချင်ထောက်ခံမလားမသိဘူး။ ဘာပဲဖြစ်ဖြစ် မြန်မာပြည်အစိုးရနဲ့ ပူးပေါင်းလုပ်ဆောင်မဲ့ သမ္မတလောင်းကို ထောက်ခံမှာပါပဲ။ သမ္မတလောင်း၊ ဒုသမ္မတလောင်းနှစ်ယောက် စကားစစ်ထိုးပွဲကို တကမ္ဘာလုံးက စောင့်ကြည့်ရတယ်။ တချို့ပြည်နယ်တွေက ကြိုတင်မဲပေးလို့ရတယ် တချို့ပြည်နယ်တွေက မရဘူး။ ကိုဗစ်ဖြစ်နေလို့ စာတိုက်ကနေ မဲပေးလို့ရတယ်။ ယူတာ့၊ ကော်လိုရာဒိုစတဲ့ ပြည်နယ် ၇ ခုမှာ စာတိုက်ကနေမဲပေးလာတာ ၈ နှစ်ရှိပြီ။ မဲခိုးမဲလိမ်တာ မရှိဘူး စာတိုက်ကနေ မဲပေးတဲ့စနစ် အောင်မြင်တယ်။ ကော်လိုရာဒိုပြည်နယ်ဆို ၇၅ % မဲပေးတဲ့အထိ မဲပေးတဲ့လူများတယ်။ ဂျိုးဘိုင်ဒန်ကို ထောက်ခံတဲ့သူတွေက စာတိုက်ကနေ မဲပေးကြပြီး ထရန့်ကိုထောက်ခံတဲ့လူတွေက လူကိုယ်တိုင်မဲပေးကြတယ်။ ကိုဗစ်ဖြစ်နေလို့ မဲထွက်ပေးကြပါ့မလား ထင်နေတာ စံချိန်တင်မဲပေးကြတယ်။ Electoral College ဆိုတာကို ဒီနှစ်မှပဲ သေသေချာချာ ဖတ်ဖြစ်တော့တယ်။ အီလက်ထရိုရယ်ကောလိပ်မှာ ၅၃၈ မဲရှိပြီး ၂၇၀ မဲရတဲ့သူက နိုင်ပါတယ်။ ပြည်နယ်တိုင်း ဆီနိတ်တာ၊ representative လွှတ်တော်ကိုယ်စားလှယ်၂ မဲရပါတယ်။ Electoral votes ကတော့ လူဦးရေပေါ် မူတည်ပြီး ပြည်နယ်တခုနဲ့တခု ကွာခြားပါတယ်။ elector တွေကို ပါတီက ရွေးချယ်တယ်။ နယူးယောက်ဆို ပြည်နယ်ကသေးပေမဲ့ ၂၉ electoral votes ရတယ်။ မြေပုံကိုကြည့်လိုက်ရင် အနီများပေမဲ့ အပြာရောင်နယူးယောက်ပြည်နယ်က အနီရောင်ပြည်နယ် လေးခုလောက်နဲ့ ညီမျှတယ်။ ကယ်လီဖိုးနီးယားပြည်နယ်က မဲ ၁၇ သန်းကို ၂ ရက်လောက်နဲ့ မြန်ဆန်တိကျစွာ ရေတွက်ပြီးပေမဲ့ ဘေးကနီဗားဒါးပြည်နယ်ကတော့ မဲ ၁၃ သိန်းကို ၄ ရက်လောက် အချိန်ယူလို့ ကမ္ဘာပေါ်မှာ အနှေးဆုံးသတ္တဝါ sloth ကာတွန်း၊ အမျိုးမျိုးရယ်စရာလုပ်ပြီး troll ကြတယ်။ ထရန့်ကနိုင်သွားလိုက် ဂျိုးဘိုင်ဒန်ကသာသွားလိုက်နဲ့ ရွေးကောက်ပွဲရလဒ်ကို စောင့်ကြည့်ရတာ အတော်ရင်ခုန်ဖို့ကောင်းတယ်။ 

Swing ပြည်နယ်တွေက အဆုံးအဖြတ်ပေးတာပါပဲ။ ၂၀၁၆ တုန်းက ထရန့်နိုင်ခဲ့တဲ့ ဝစ်ကွန်ဆင် ၊ မစ်ချီကန်မှာ ဂျိုးဘိုင်ဒန်နိုင်လို့ အဖြေပြောင်းသွားတယ်။ အဲ့ဒီပြည်နယ်ကို Blue wall လို့ တင်စားကြတယ်။ နောက်ဆုံးကျန်တဲ့ အရီဇိုးနား၊ ‌‌ဂျော်ဂျာပြည်နယ်တွေကို မဲရေတွက်ချိန်ဟာ ရေချိန်အမြင့်ဆုံး။ အဆုံးအဖြတ်ပေးတဲ့ ပန်ဆယ်ဗေးနီးယားပြည်နယ်မဲကို ရေတွက်ပြီးချိန် နိုဝင်ဘာ ၇ စနေနေ့ နေ့လည် ၁၁ နာရီလောက်မှာ သတင်းဌာနတွေက ဂျိုးဘိုင်ဒန် အပြတ်အသတ်နိုင်ပြီလို့ ကြေငြာလိုက်ချိန်မှာ ပြည်သူတွေလမ်းပေါ်ထွက် အောင်ပွဲခံကြတယ်။ သူတို့အပျော်တွေက တီဗွီကနေတဆင့် ကိုယ့်ဆီကူးဆက်လာတယ် ကိုယ်လည်း အိမ်ထဲမှာ အောင်ပွဲခံတယ်။ ဂျိုးဘိုင်ဒန်ဖက်က အေးဆေးပေမဲ့ အရှုပ်ထုပ်ထရန့်ကတော့ သူ့နိုင်တဲ့ပြည်နယ်မှာဆို မဲကိုဆက်ရေတွက်တဲ့ ရှုံးတဲ့ပြည်နယ်တွေဆို မဲရေတာရပ်တဲ့။ မဲခိုးတယ်၊ မဲလိမ်တယ်၊ မဲရေတာကို စောင့်ကြည့်ခွင့် မပေးဘူး၊ သူ့ရှုံးတဲ့ပြည်နယ်တွေကို တရားစွဲမယ်နဲ့ ဒရာမာကွင်း။ ကိုရီးယားကား ဒရာမာများတယ်ဆိုတာ ထရန့်ကိုဘယ်မှီပါ့မလဲ။ ထရန့်တရားစွဲတဲ့ပြည်နယ်တွေကလည်း သူတို့မဲရေတွက်တာ စနစ်တကျ မှန်မှန်ကန်ကန် ပွင့်လင်းမြင်သာမှုရှိတယ်လို့ ပြန်ချေပ။ မဲခိုးမဲလိမ်စောင့်ကြည့်ခွင့်မပေးဘူးဆိုရင် သက်သေအထောက်အထားပြလို့ ပြည်နယ်တရားရုံးတွေကပြောတယ်။ ထရန့် ရှုံးလို့ပြသနာရှာ ရှုံးပါတယ်လို့ ဝန်မခံဘူး သူနိုင်ခဲ့တယ် သူနိုင်မယ်ဆိုတာကြီးပဲ။ ဒုသမ္မတလောင်း ကမာလာဟဲရစ်ကို သဘောကျတယ်။ ရာထူးအမြင့်ဆုံး ပထမဆုံးအမျိုးသမီး၊ ပထမဆုံးလူမည်း၊ ပထမဆုံးတောင်အာရှသူ။ ကမလာဟဲရစ်ရဲ့အဖေက ဂျမေကာလူမည်း၊ အမေကအိန္ဒိယ၊ ယောကျ်ားကဂျူး၊ အမေရိကန်ပြောင်းရွေ့အချေသူတွေရဲ့မျိုးဆက်။ ချောမောလှပပြီး ထက်မြက်တဲ့ ကမာလာကို ပထမဆုံးအမျိုးသမီးသမ္မတ ဖြစ်စေချင်တယ်။ နိုဝင်ဘာ ၈ မြန်မာနိုင်ငံမှာ ရွေးကောက်ပွဲ ကျင်းပတယ်။ အယ်လ်နယ်ဒီမှာ နိုင်မှာကိုသိပေမဲ့ စိတ်ပူနေတယ်။ ကိုဗစ်ဖြစ်တော့ မဲမှထွက်ပေးပါ့မလားလို့ စိတ်ပူနေတာ စံချိန်တင်မဲပေးတယ် အပြတ်အသတ်နိုင်ပါတယ်။ ကိုယ့်အသိုင်းအဝိုင်းမှာ အစိမ်းတွေကို ထောက်ခံအားပေးတဲ့သူမရှိတာ ကံကောင်းခြင်းတမျိုးပဲ။ မဲသွားမပေးတဲ့သူတွေကို တိုင်းပြည်တာဝန် မကျေတဲ့သူတွေလို့ မြင်တယ်။ ငါးနှစ်မှတကြိမ် မဲပေးရတာကို တိုင်းပြည်အတွက် ဒါလေးတောင် မလုပ်ပေးနိုင်ဘူးလား။ အမေရိကန်နိုင်ငံမှာလို ပါတီတိုင်းက တိုင်းပြည်အတွက် လုပ်ပေးတဲ့ပါတီတွေပဲဆိုတော့ မဲမပေးလည်း ဘာအရေးလဲ ဘယ်ပါတီပေးပေး အတူတူပဲ။ ကိုယ့်တိုင်းပြည်မှာက အယ်လ်နယ်ဒီနိုင်မှဖြစ်မှာ မဲတပြားစီတိုင်းက အရေးပါတယ်။ ဒါရိုက်တာမင်းထင်ကိုကိုကြီးပြောတာ သဘောကျလိုက်တာ။ “ဘယ်ပါတီတက်တက် အတူတူပဲလို့ မပြောပါနဲ့ … ကိုယ်အသိညဏ်နည်းတာကို ပြရာရောက်တယ်… တောင်ကိုရီးယားနဲ့ မြောက်ကိုရီးယားကို ကြည့်ပါလား… ကိုရီးယားနိုင်ငံသား လူမျိုးအတူတူ ဘာသာစကားအတူတူ…. အုပ်ချုပ်တဲ့အစိုးရကွာတော့ ပြည်သူတွေရဲ့ အဆင့်အတန်း ဘယ်လောက်ကွာသလဲ…. ဘယ်အစိုးရတက်တက် အတူတူပဲ ကိုယ်လုပ်မှကိုယ်စားရတာ…. ဟုတ်ပါတယ် ကိုယ်လုပ်မှကိုယ်စားရတာ…စင်္ကာပူက အိမ်သာဆေးတဲ့သူနဲ့ မြန်မာပြည်က အိမ်သာဆေးတဲ့သူ … အိမ်သာဆေးတဲ့အလုပ် အတူတူပဲ… ဒါပေမဲ့ နိုင်ငံချမ်းသာတာ၊ ဆင်းရဲတာကွာတော့ အလုပ်တူတာခြင်းတောင် ဘဝအခြေအနေ ဘယ်လောက်ကွာသလဲ” ။ မဲမထည့်တဲ့သူတွေ၊ ဘေးထိုင်ဘုပြောတဲ့သူတွေ၊ တိုင်းပြည်ကိုဖျက်နေတဲ့ အရှုပ်ထုပ်တွေ သိပ်အမြင်ကပ်တယ်။ ၂၀၂၀ ရွေးကောက်ပွဲနှစ်ခုမှာ ကိုယ်နိုင်စေချင်တဲ့သူတွေ အနိုင်ရလို့ ပျော်ရွှင်ရပါတယ်။

စန်းထွန်း

နိုဝင်ဘာ ၂၀၊ ၂၀၂၀။

Whistle Blower…

နှစ်စဉ်နှစ်တိုင်း ရုံးမှာ Enthics & Code၊ Cyber Security သင်တန်းတွေ တက်ရတယ်။ Cyber Security က မသိတဲ့အီးမေးလ်မှာပါတဲ့ attachment ဖိုင်တွေကိုဖွင့်ပြီး login မဝင်ဖို့၊ အရေးကြီးတဲ့အချက်အလက်တွေကို ဆိုဒ်တွေမှာမသိမ်းထားဖို့။ တခုခုသံသယရှိရင် cyber security team ကိုဆက်သွယ်ဖို့သင်တယ်။ စတိတ်ကျောင်းမှာ မွေးနေ့၊ SSN နံပါတ်တွေ မပေးဖို့သင်တယ်။ အလုပ်အေးဂျင့်က SSN နံပါတ်တောင်းတော့ မပေးဘူး။ ကျောင်းက advisor ကိုမေးကြည့်တော့ နောက်ဆုံး ၄ လုံး၊ ၆ လုံး ပေးလို့ရတယ်တဲ့။ ကိုယ့်ရုံးက အစိုးရရုံးဆိုတော့ Enthics & Code သင်တန်းက အရေးကြီးတယ်။ သင်တန်းမှာ ဒေါ်လာ ၂၀ အထက် လက်ဆောင်ပစ္စည်းမယူရဘူး၊ ရုံးကိုအသုံးချပြီး ကိုယ့်စီးပွားရေးအတွက် မလုပ်ရဘူး၊ discrimination ခွဲခြားနိမ့်ချဆက်ဆံတာ၊ sexual harrassment လိင်ပိုင်းဆိုင်ရာ စော်ကားတာ၊ မတရားတာ လုပ်နေတာကို မြင်ရသားနဲ့ မပြောရင် ပြစ်မှုကျူးလွန်းရာ ရောက်တယ်တဲ့။ မတရားတာကို ထုတ်ဖော်သတင်းပေးတဲ့သူကို whistle blower လို့ခေါ်တယ်။ မြန်မာလို ဘယ်လိုဘာသာပြန်ရမလဲ မသိဘူး။ whistle blower ကို ဥပဒေနဲ့ အကာအကွယ်ပေးတယ်။ အမှန်တရားဖောက်ထုတ်တဲ့သူတွေကိုမှ ကာကွယ်မပေးရင် ဘယ်လိုလုပ် အမှန်တရားဖော်ထုတ်တော့မလဲနော်။ အမေရိကန်အစိုးရအေဂျင်စီတွေရဲ့ ထောက်လှမ်းရေးပရိုဂရမ်တွေကို ဖွင့်ချလိုက်တဲ့ အက်ဝတ်စနိုဒန်ဟာ whistle blower ပါပဲ။ ၂၀၁၉ ဒီဇင်ဘာ တရုတ်နိုင်ငံ ဝူဟန်ပြည်နယ်မှာ ကိုဗစ်စဖြစ်တော့ မီဒီယာကနေ သတိပေးတဲ့ ဆရာဝန်ကို ဒေသခံအစိုးရ တာဝန်ရှိသူတွေက နှိပ်ကွပ်တယ်။ စောစောစီးစီး ပြည်သူတွေကို သတိပေးပြီး အစိုးရနဲ့ပြည်သူ ပူးပေါင်းဆောင်ရွက်ကြရင် ရောဂါကိုမြန်မြန် ထိန်းချုပ်နိုင်ပြီး သေတဲ့လူအရေအတွက် နည်းမယ်။ တရုတ်အစိုးရက သတင်းထိန်ချန် ပွင့်လင်းမြင်သာမှုမရှိပေမဲ့ ၃ လတည်းနဲ့ ရောဂါထိန်းချုပ်နိုင်တယ်။ အမေရိကန်မှာတော့ သမ္မတထရန့်က ကိုဗစ်ကိုအလေးမထား ပြောချင်ရာပြော လုပ်ချင်ရာလုပ်။ မတ်လ၊ ဧပြီလတုန်းကဆို နယူးယောက်မှာ အခြေအနေအတော်ဆိုးတယ်။ နယူးယောက်ပြည်နယ်အုပ်ချုပ်ရေးမှုးက တော်တယ် မတ်စ်မတပ်မနေရ၊ ဆိုင်တွေပိတ်၊ လူစုလူဝေးမလုပ်ဖို့ တင်းတင်းကျပ်ကျပ် ကိုင်တွယ်လိုက်လို့ ထိန်းနိုင်သွားတာ။ နယူးယောက်မှာ အခြေအနေဆိုးတုန်းကဆို ဆေးရုံမှာကုတင်မရှိတော့လို့ အသက်မရှုနိုင်တော့ဘူး သေပါတော့မယ်ဆိုမှ ဆေးရုံကို လာခိုင်းတယ်။ မြန်မာပြည်မှာတော့ အစိုးရက ငွေကြေးမပြည့်စုံဘူး၊ ပစ္စည်းကိရိယာ မပြည့်စုံဘူးဆိုပေမဲ့ ခေါင်းဆောင်က ပြည်သူတွေကို ချစ်တယ်။ ဂရုစိုက်တယ် တတ်နိုင်သလောက် ကူညီစောင့်ရှောက်တာ အမေရိကန်အစိုးရထက် သာတယ်။ မတ်စ်တပ်ခိုင်းလို့ ဆန္ဒပြ၊ အိမ်မှာနေခိုင်းလို့ ဆန္ဒပြ၊ ဆိုင်တွေမဖွင့်လို့ ဆန္ဒပြ၊ Black Live Matter အတွက် ဆန္ဒပြနဲ့ ကူးစက်နှုန်းက ကြောက်မခန်းလိလိ။ ထရန့်က ကာကွယ်ဆေးတွေ့ရင် နယူးယောက်ကို နောက်ဆုံးမှပေးမယ်တဲ့။ နယူးယောက်ပြည်နယ် အုပ်ချုပ်ရေးမှုးက ထရန့် နယူးယောက်ကို မခြိမ်းခြောက်နဲ့တဲ့။ နိုင်ငံရေးသမားတွေ ရန်ဖြစ်ကြတာ ရယ်ဖို့လည်းကောင်း စိတ်ညစ်ဖို့လည်းကောင်း။ ဆောင်းရာသီ တုပ်ကွေးရာသီ ပိုဆိုးမယ်တဲ့။ ရာသီဥတုကလည်း အေးလာပြီမို့လို့ ဘယ်မှမသွားဖြစ်တော့ဘူး။ ဆေးခန်းပြဖို့တောင် ကူးစက်နှုန်းကိုကြည့်ပြီး သွားသင့်မသွားသင့် စဉ်းစားနေရတယ်။ ခုတော့ တရုတ်ပြည်မှာ ဆေးလောကအတွက် whistle blower ဥပဒေကို အတည်ပြုလိုက်ပြီလို့ကြားတယ်။ လိုတဲ့ဥပဒေတွေပြဌာန်း ပြင်သင့်တဲ့ဥပဒေတွေကိုပြင်နဲ့ တိုင်းပြည်ကောင်းဖို့အတွက် လုပ်ကြတယ်။ မြန်မာပြည်မှာလည်း ၂၀၀၈ အခြေခံဥပဒေပြင်ဖို့ လိုသေးတယ်။ ပြည်သူတွေ မရွေးခြယ်ဘဲ လွှတ်တော်ထဲ ခပ်တည်တည် ဝင်ထိုင်နေတဲ့ အစိတ်သားတွေမပါတဲ့  ပြည်သူတွေအတွက် လိုအပ်တဲ့ ဥပဒေတွေကို ပြဌာန်းနိုင်တဲ့ ၁၀၀% ဒီမိုကရေစီလွှတ်တော်ဖြစ်မဲ့တနေ့ကို မျှော်မှန်းရင်း…

စန်းထွန်း

နိုဝင်ဘာ ၁၃၊ ၂၀၂၀။

နေသာတဲ့နေ့ အပင်တွေကို နေပြ… sun kissed plants

လက်ဆောင်ပေးခြင်း အနုပညာ…

မိသားစု၊ သူငယ်ချင်း၊ မိတ်ဆွေ၊ ချစ်သူတွေကြား လက်ဆောင်ပေးကြလေ့ ရှိပါတယ်။ လက်ဆောင်ဆိုတာ ချစ်ခင်မှုကိုပြတဲ့ သင်္ကေတတစ်ခုပါ။ လက်ဆောင်ပစ္စည်း ကြီးကြီးသေးသေး ကိုယ့်ကိုချစ်လို့ပေးတာ  လက်ဆောင်ရတော့ ပျော်တာပေါ့။ မကြီးနဲ့တောင် ပြောနေသေးတယ် NLD မတ်စ်တပ်ပြီး ဓာတ်ပုံရိုက်ချင်တယ်လို့။ မကြာပါဘူး မခိုင် မတ်စ်လက်ဆောင်ပေးတော့ ကြိုက်လိုက်တာ။ NLD အင်္ကျီ၊ မတ်စ်တပ်ပြီး သုံးယောက်အတူတူ ဓာတ်ပုံရိုက်မယ်လို့ စိတ်ကူးထားပေမဲ့ အဲ့ဒီတုန်းက မတ်စ်ကို မလျှော်ရသေးတော့  မတပ်ရဲဘူး။ မတ်စ်လှလား … ဘလော့ကနေ ကြွားမယ်နော့… ။

စကားမစပ်… ၂၀၂၀ နိုဝင်ဘာ ၄ အမေရိကန်မှာ မဲပေးပွဲပြီးလို့ မဲတွေရေတွက်နေပြီ။ ထရန့်နိုင်မယ်ထင်နေရာကနေ ဂျိုးဘိုင်ဒန်ဖက် မဲသွားသာလို့ ထရန့်က မဲခိုးတယ်၊ မဲလိမ်တယ်၊ သူရှုံးတဲ့ပြည်နယ်တွေကို တရားစွဲမယ်တဲ့။ အဲ့ဒီပြည်နယ်တွေကလည်း မဲရေတွက်တာ ပွင့်လင်းမြင်သာမှုရှိတယ် မမှားဘူးလို့ ပြန်ငြင်း။ ထရန့်ကိုထောက်ခံတဲ့သူတွေက မကျေနပ်လို့ ဆန္ဒပြကြနဲ့ ပွဲကြီးပွဲကောင်း။ ထရန့်က မဲသာလိုက်၊ ဂျိုးက မဲသာလိုက်နဲ့ ရင်ခုန်စိတ်လှုပ်ရှားစရာ။ ထရန့်ပြောတာဆိုတာ စိတ်ဓာတ်ကို မကြိုက်လို့ ဂျိုးဘိုင်ဒန်ကို နိုင်စေချင်တာ။ အမေရိကန် ရွေးကောက်ပွဲပြီးရင် မြန်မာပြည်က ရွေးကောက်ပွဲ။ နိုဝင်ဘာဟာ ရင်ခုန်စိတ်လှုပ်ရှားစရာတွေနဲ့ ပြည့်နေတယ်။

စန်းထွန်း
နိုဝင်ဘာ ၆၊ ၂၀၂၀။

Can’t Help Falling in Love...

လူတိုင်းသိကြတဲ့ အဲဗစ်ပရက်စလေရဲ့ ဂန္တဝင်မြောက်သီချင်းတစ်ပုဒ်။ ချစ်သူရှေ့မှာ ဆိုပြလိုက်ရင် ကြွေဆင်းသွားစေမဲ့သီချင်း။ အဲဗစ်ပရက်စလေဆိုတုန်းက သိပ်မကြိုက်ဘဲ Andre Rieu က စန္ဒရား၊ တယောနဲ့ တီးပြလိုက်တော့မှပဲ ကြိုက်လိုက်တာ အမြဲနားထောင်နေတော့တယ်။ အလွယ်ဆုံးဗာရှင်းရှာပြီး တီးတတ်အောင်ကျင့် ဖေ့ဘွတ်မှာတင်တယ်။ သီချင်းနာမည်ကို ပဟေဠိဖွက်တော့ ဩဇီကကျောင်းနေဖက်သူငယ်ချင်းက ကွန့်မန့်မှာလာရေးသွားတယ်။ ပျော်လိုက်တာ ငါ့တီးတာ မဆိုးဘူးဟ သီချင်းကိုခန့်မှန်းလို့ရသားပဲ။ ဝိုင်းက တယောတီးတာ တော်တော်တိုးတက်လာပြီ တယောအသစ် ဝယ်ထားတယ်။ သူတယောလေ့ကျင့်တာလေးတွေ ပို့ပြီးကြွားတယ်။ မင်းတီးတဲ့သီချင်းက အဲဗစ်ပရက်စလေရဲ့ Love me tender လားမေးတော့ ဝိုင်းတော်တော် ပျော်သွားတယ်။ သူတီးတာမဆိုးဘူး သီချင်းကိုခန့်မှန်းလို့ရသားပဲ ဒါတိုးတက်မှုတခုဆိုပြီးတော့လေ။ ခု ကိုယ်လည်း အဲ့ဒီလိုဖြစ်နေတာ။ Love me tender သီချင်းကို သိသွားတာက တယောသင်တန်းမစခင် ကျောင်းတံခါးဝမှာ စောင့်နေကြတုန်း တရုတ်ကလေးအမ်းဒရူး တီးပြလို့သိတာ။ အမ်းဒရူးက ငယ်ငယ်ကတည်းက စန္ဒရားတီးတတ်တယ်။ တယောသင်တန်းထဲမှာ အတော်ဆုံး အကြိုးစားဆုံး တနေ့တနာရီ လေ့ကျင့်တယ်။ သူ သီချင်းအသစ်တက်ရင် ကိုယ်တို့ကိုတီးပြပြီး ကြွားလေ့ရှိတယ်။ ကိုယ်တို့ကလည်း ဘာသီချင်းလဲ၊ နုတ်ပို့ပေးပါလို့ တောင်းဆိုကြတယ်။ ကိုယ်လည်း အတူတူပါပဲ သီချင်းအသစ်တပုဒ် တီးတတ်ရင် ဖေ့ဘွတ်၊ ဘလော့ကနေ ကြွားရတာအမော။ မိသားစု၊ သူငယ်ချင်း၊ မိတ်ဆွေ၊ တူတော်မောင်ပါမကျန် ဗွီဒီယိုပို့ပြီးကြွားတယ်။ ခုလည်း ဘလော့ကနေ ကြွားလိုက်ဦးမယ်နော့... 

Wise men say
Only fools rush in
But I can't help falling in love with you
Shall I stay?
Would it be a sin
If I can't help falling in love with you?
Like a river flows
Surely to the sea
Darling, so it goes
Some things are meant to be
Take my hand
Take my whole life too
For I can't help falling in love with you
Like a river flows
Surely to the sea
Darling, so it goes
Some things are meant to be
Take my hand
Take my whole life too
For I can't help falling in love with you
For I can't help falling in love with you

စန်းထွန်း
အောက်တိုဘာ ၃၀၊ ၂၀၂၀။

လှုဒါန်းခြင်း အနုပညာ…

၂၀၂၀ အောက်တိုဘာ ၇ ရက်နေ့ ဒေါ်ခင်ကြည်ဖောင်ဒေးရှင်းမှာ သုံးသိန်းတသောင်း လှုဒါန်းပါတယ်။ ဒေါ်ခင်ကြည်ဖောင်ဒေးရှင်းမှာ လှုချင်နေတာကြာပြီ နိုဝင်ဘာမွေးနေ့ကျမှ လှုမလို့ကို အမေက ခုကိုဗစ်ဖြစ်လို့ အလှုငွေပိုလိုအပ်တယ်။ နိုဝင်ဘာအထိ မစောင့်ပါနဲ့ ခုလှုလိုက်ပါ သုံးသိန်းအတိမလှုနဲ့ အစွန်းထွက်လေးနဲ့လှုလို့ပြောလို့ အမေစိတ်ချမ်းသာအောင် လှုလိုက်ပါတယ်။ ဒေါ်ခင်ကြည်ဖောင်ဒေးရှင်းက အလှုငွေလက်ခံတဲ့ ဘဏ်မှာအကောက်မရှိလို့ မကြီးယောင်းမက ကူညီလုပ်ဆောင်ပေးပါတယ်။ ၂၀၂၀ အောက်တိုဘာ ၁၁ တနင်္ဂနွေနေ့ ပန်ဆယ်ဗေးနီးယားပြည်နယ် ဘတ်သလေဟမ်မြို့ သစ္စာနန္ဒ ဓမ္မစင်တာကျောင်း ပါချုပ်ကျောင်းလို့ ခေါ်ကြတဲ့ ဘုန်းကြီးကျောင်းက ဆရာတော်တွေကို မခိုင်က တနင်္ဂနွေနေ့တိုင်း ဆွမ်းကပ်လှုတယ်။ နယူးယောက်ကို လာတုန်းက ကိုယ်ထည့်ပေးလိုက်တဲ့ ကြက်ဆီထမင်းကို ကြိုက်တယ်တဲ့။ အဲမဟာ့ရထားဘူတာနားက ယိုးဒယားကြက်ဆီထမင်းဆိုင်က ကြက်ဆီထမင်း တမျိုးတည်းရောင်းတယ်။ စနေနေ့ ဆုံကြမယ်ဆိုတော့ မခိုင်က ဆရာတော်တွေကို ဆွမ်းကပ်ဖို့ ကြက်ဆီထမင်းမှာတယ်။ ဆွမ်းမကပ်ရတာ ကြာပြီမို့လို့ ကိုယ့်အစားဆွမ်းကပ်ပေးပါလို့ပြောတော့ ကပ်ပေးမယ်တဲ့။ ဆွမ်းတင်မကဘဲ ဆရာတော်နှစ်ပါးအတွက် နဝကမ္မအလှုငွေ၊ ကျောင်းအတွက်ပါလှုလို့ မခိုင်က အကြံပေးတယ်။ ဆရာတော့်ကို ဓာတ်ပုံပြတော့ မှတ်မိတယ်တဲ့ ၂၀၁၈ လောက်တုန်းက အသိအစ်မနဲ့လိုက်သွားဖူးတယ် ပထမဆုံးရောက်ဖူးတာ။ ရခိုင်လူမျိုးပါ မခိုင်နဲ့သိတယ်လို့ ပြောဖူးလို့ မှတ်မိတာနေပါ။ ဆရာတော်က အသက် ၃၀ ကျော်ပဲရှိသေးတယ် အင်္ဂလိပ်လိုပြောတတ်တယ်။ နွေရာသီ ကလေးတွေကို ယဉ်ကျေးလိမ္မာသင်တန်းတွေ သင်ပေးတယ်။ ဆရာတော်က သပိတ်ထဲကိုထည့်ပြီး ဆွမ်းဘုန်းပေးတယ်။ ဆရာတော်ကို ဆွမ်းကပ်တာ ဗွီဒီယိုနဲ့ပြပေမဲ့ အဲ့ဒီအချိန်ကိုယ်က ရထားပေါ်မှာဆိုတော့ ကွန်နက်ရှင်မကောင်းလို့ မကြည့်လိုက်ရဘူး။ အလှုဖြစ်မြောက်အောင် လုပ်ဆောင်ပေးတဲ့ မခိုင်ကြောင့် လှုဖြစ်ခဲ့ပါတယ်။ ကိုယ်လှုချင်တာ ကိုယ်ဖြစ်ချင်တာ ဘာမဆိုကူညီပံ့ပိုးလုပ်ဆောင်ပေးတဲ့ မိသားစု၊ မိတ်ဆွေသူငယ်ချင်းရှိတာ ကံကောင်းခြင်းတမျိုးပါပဲ။ သူများ ကုသိုလ်ကောင်းမှုလုပ်တာကို ကြည်နူးပီတိဖြစ်ပြီး ဝမ်းမြောက်ဝမ်းသာ သာဓုခေါ်ရင် အလှုရှင်နဲ့ထပ်တူ ကုသိုလ်ရနိုင်တာမို့ ဝမ်းမြောက်ဝမ်းသာ သာဓုခေါ်ဆိုနိုင်ပါစေ။ ပြုလုပ်သမျှ ကောင်းမှုကုသိုလ်တွေကို နေ့စဉ်မောင်မောင့်အား ရည်စူးပြီး အမျှအတန်း ပေးဝေပါတယ် ရောက်ရာဘုံဘဝကနေ သာဓုခေါ်ဆိုနိုင်ပါစေ။ 

စန်းထွန်း 

အောက်တိုဘာ ၂၃၊ ၂၀၂၀။

ခင်မင်ခြင်း အနုပညာ…

၂၀၂၀ အောက်တိုဘာ ၁၀ စနေနေ့မနက် နယူးယောက်မြန်မာသံရုံးမှာ ကြိုတင်မဲသွားပေးတယ်။ ၂၀၁၅ မဲပေးတုန်းက နိုဝင်ဘာလမှာ မဲပေးရတာထင်တယ် အေးလို့ ဒေါင်းကုတ်ကြီး ဝတ်သွားရတာ မှတ်မိတယ်။ ၂၀၁၅ တုန်းက သတ်မှတ်ရက်အတွင်း မဲမပေးရမှာစိုးလို့ စင်္ကာပူကမြန်မာတွေ လမ်းပေါ်မှာညအိပ်စောင့်ပြီး မဲပေးကြတယ်။ စင်္ကာပူမှာ မြန်မာတွေများတော့ လူအင်အားတောင့်တယ် စည်းလုံးကြတယ်။ သံရုံးအဝမှာ အိတ်တွေသိမ်းထားပေးတယ်။ ဒီနှစ်တော့ ကိုဗစ်ကြောင့် ခြောက်ပေခွာ လက်ဆေးရည်ဗူးတွေ ချထားပေးပြီး လက်အိတ်ဝတ်ခိုင်းတယ်။ သံရုံးအဝမှာ အပူချိန်တိုင်းတယ်။ အဝင်ဝမှာ လိပ်စာ၊ နာမည်ပြောတော့ စာအိတ်တအိတ်ရတယ်။ လက်မှတ်ထိုးယူပြီး စာအိတ်ဖွင့်လိုက်တော့ ၃မဲရပြီး တိုင်းရင်းမဲမပါလို့ ကွန်ပလိမ်းတက်ချင်တယ် ဘယ်ကိုတိုင်ရမှာလဲလို့မေးတော့ သံရုံးအကြီးအကဲကို ပြောပေးမယ်တဲ့။ မဲအိတ်စုတ်ပြဲနေမနေစစ်၊ မြို့နယ်မှန်မမှန်စစ်၊ မဲထည့်ချင်တဲ့ပါတီနားမှာ အမှန်ခြစ်၊ စာအိတ်ကိုကော်ကပ်ပြီး ပုံးထဲသေချာထည့်တယ်။ ပယ်မဲဖြစ်နေမှာစိုးလို့ နှစ်ခါစစ်တယ်။ ကွန်းပလိန်းတက်ဖို့ သံရုံးအကြီးဆုံးက လာတွေ့တယ် ကိုယ့်ရှေ့က လေး၊ ငါးယောက်လောက်လည်း တိုင်းရင်းသားမဲမပါလို့ ကွန်ပလိမ်းတက်တယ်တဲ့။ ဘယ်လိုလုပ်ပေးမလဲမေးတော့ ရွေးကောက်ပွဲကော်မရှင်ကို တင်ပြပေးမယ်။ မဲအခြေအနေကို နေ့တိုင်းရွေးကောက်ပွဲကော်မရှင်ကို သတင်းပို့ရတယ်။ သံရုံးက မဲအိတ်တွေကို ဖောက်စစ်ခွင့်မရှိဘူး။ မဲပေးမဲ့သူလာမှ စာအိတ်ထုတ်ပေးရတာဆိုတော့ သူတို့လည်းမသိဘူးတဲ့။ မဲတမဲ အလကားမဆုံးချင်လို့။ ကွန်ပလိမ်းတက်တာကို ကျေးဇူးတင်ပါတယ် ဒါမှလည်းနောက် ဒီလိုမမှားအောင် ပြင်လို့ရတာပေါ့တဲ့။ အဲ့ဒီစကားကြားတော့ အံ့သ◌ြသွားတယ် နည်းနည်းတိုးတက်လာပြီ။ ရွေးကောက်ပွဲကလည်း နှစ်ကြိမ်ပဲရှိသေးတော့ လိုအပ်ချက်တွေ ရှိနေသေးတာ နားလည်ပါတယ်။ မဲပေးရတာ အရမ်းအဆင်ပြေပါတယ် အဝေးကြီးကနေလာပြီး မဲပေးကြတဲ့သူတွေကို ချီးကျူးတယ်။ အထွက်မှာ လက်ကို မှင်သုတ်ပါတဲ့။ လက်သန်းမှင်စွန်းခဲ့ပြီ နိုင်ငံသားတယောက်ရဲ့တာပွန် ကျေပွန်ခဲ့ပြီ။ ကိုယ်ကြိုက်တဲ့အစိုးရကို ကိုယ့်လက်နဲ့ရွေးချယ်ခွင့်ရတာ ဘယ်လောက်ကောင်းလိုက်သလဲ။ အနှစ်သုံးဆယ်လောက် ဒီလိုရွေးချယ်ခွင့် မရခဲ့ဘူး။ နိုင်ငံသားတွေက အုပ်ချုပ်မဲ့အစိုးရကို မဲပေးရွေးချယ် ရွေးချယ်လိုက်တဲ့အစိုးရက တိုင်းပြည်အတွက် အလုပ်,လုပ်။ နိုင်ငံသားတွေက နိုင်ငံသားအလုပ်လုပ် အစိုးရက အစိုးရအလုပ်,လုပ်။ ငါးနှစ်မှတခါ ပေးရတဲ့မဲကို မဲသွားမပေးလည်း ဘာမှမဖြစ်ပါဘူး၊ မဲပေးဖို့ စိတ်မဝင်စားတဲ့သူတွေ၊ မဲသွားမပေးတဲ့သူတွေကို အသည်းယားတယ်။ တမဲလည်းတမဲအလျောက် အရေးကြီးတယ်။ မမီးက ဘူတာရုံမှာ လာကြိုတယ် ပြီးတော့ မှာထားတဲ့ အိန္ဒိယအစားအစာယူပြီး ပန်းခြံကိုသွားတယ်။ မခိုင်က ရောက်နေတာ တနာရီကြာနေပြီ။ မခိုင်က အဲ့ဒီနေ့က 5K ကို နာရီဝက်နဲ့ပြေးပြီး သူ့အသက်အရွယ်တန်းမှာ ပထမဆုရတယ် ကွန်ကရက်ကျူလေးရှင်း။ မခိုင်က ပြေးတာ မိုင်တထောင်ကျော်နေပြီ။ မခိုင်အမျိုးသားက half marathon ပြေးတယ်။ ကိုယ်လည်း တပတ်နှစ်ရက် မနက်ရုံးမတက်ခင် တမိုင်သွားပြေးတယ်။ ပြေးပြီး ရေချိုးလိုက်တဲ့အခါ ပေါ့ပါးလန်းဆန်းသွားတဲ့ ဖီလင်ကိုကြိုက်တယ်။ အစားအသောက်တွေကလည်း အတော်ကောင်း ဗိုက်ဆာဆာနဲ့ စားလိုက်ကြတာ။ အိန္ဒိယစာမကြိုက်တဲ့ကိုယ်တောင် အတော်စားဖြစ်တယ်။ မမီးနဲ့မတွေ့တာ အတော်ကြာပြီ တစ်နှစ်လောက်ရှိပြီ။ မကြာခင်အေးတော့မှာ အိမ်တွင်းအောင်းရတော့မယ် ရှေ့နှစ်နွေဥ◌ီးလောက်မှပဲ ပြန်တွေ့ကြတော့မှာမို့လို့ ဆုံဖို့ချိန်းလိုက်ကြတာ။ မြစ်ဘေးနားက တောလမ်းလေးမှာ တမိုင်ကျော် လမ်းလျှောက်တယ်။ ညနေစောင်းကျတော့ မမီးနဲ့ မြစ်ကမ်းဘေးနားက ပန်းခြံဆီကို သုံးမိုင်လောက် လမ်းလျှောက်ကြတယ်။ သာယာအေးချမ်းလှပတယ် နယူးဂျာဆီမှာ နေချင်စိတ်ပေါက်သွားတယ်။ အဖေနဲ့အမေဆို အရမ်းသဘောကျမှာ မနက်၊ ညနေတိုင်း လမ်းလျှောက်နေကြမှာ။ အဖေနဲ့အဖေက ကိုယ်နေခဲ့တဲ့ နယူးဂျာဆီအိမ်ကို သဘောကျတယ် ကွင်းကိုသိပ်မကြိုက်ဘူး။ မြစ်ကမ်းဘေးမှာ ငါးတကောင်ကမ်းပေါ်တင်နေလို့ မြစ်ထဲပြန်လွှတ်ပေးခဲ့ရတယ်။ အဖေက ငါးက အခုန်လွန်လို့ ကမ်းစပ်ပေါ်ရောက်လာတာနေမှာတဒ့။ အဲ့ဒီနေ့က ခြေလှမ်းပေါင်း တသောင်းသုံးထောင် ည ၈ နာရီခွဲနဲ့ အိပ်ငိုက်တယ်။ ည ၉ ခွဲက အိပ်လိုက်တာ မနက် ၇ နာရီခွဲမှနိုးတယ်။ ကိုဗစ်ကာလအတွင်း မနက်၂နာရီမှ အိပ်ပျော်ပြီး မနက် ၈ နာရီခွဲမှထတယ်။ Fibit က အိပ်တာမဆိုးပါဘူးလို့ပြောပေမဲ့ အိပ်ရေးမဝသလိုဘဲ။ ပိတ်ရက်ဆိုရင် နေ့လည်အထိအိပ်တော့ အိပ်ရေးဝတယ်။ အသက်ကွာပေမဲ့ နေ့တိုင်းမတ်ဆေ့ပို့ပြီး ချက်ပြုတ်တာလေးတွေ အပြိုင်အဆိုင်ကြွားကြ စကြနောက်ကြတဲ့ ကိုယ်တို့သုံးယောက်။ ဖတ်ပြီးသွားတဲ့ The Prayer Box စာအုပ်ထဲက နှစ်သက်မိတဲ့စာသားလေးက Sisters are created not by blood, but by love တဲ့။ 

စန်းထွန်း
အောက်တိုဘာ ၁၆၊ ၂၀၂၀။

လက်သန်းမှင်စွန်းခဲ့ပြီ… နိုင်ငံသားတယောက်ရဲ့ အရေးကြီးတဲ့တာဝန်ကို ဒုတိယအကြိမ် ကျေပွန်ခဲ့ပြီ… 

Let vote Myanmar 2020 !

မမီးနဲ့မတွေ့တာ တစ်နှစ်ရှိပြီ… ဗိုက်ဆာဆာနဲ့ စားလိုက်ကြတာ...

Three musketeers...

5K သုံးမိုင်ကို နာရီဝက်နဲ့ ပန်းဝင်ပြီး သူ့အသက်အရွယ်ပိုင်းမှာ ပထမဆုရတဲ့ မခိုင်… ကွန်ကရက်ကျူလေးရှင်း….

သာယာတယ်နော်…. ဓာတ်ဖမ်းဆရာက မမီး...

သစ်ပင် ရေအိုင် မြစ်ချောင်း စိမ်းစိုနေတာလေးတွေ မြင်တာနဲ့တင် ပျော်နေတော့တာ… 

မျက်နှာဖုံးအောက်က ကိုယ့်အပြုံးကို သူမြင်နိုင်ပါစေ...

စိုက်ပျိုးခြင်း အနုပညာ…

ပြောတော့ဖြင့် အငြိမ်းစားယူရင် အပင်လေးတွေ စိုက်စားမယ်ဆိုပြီး မြက်နဲ့ကြက်သွန်မြိတ်ပင်ကိုတောင် မခွဲတတ်ဘူးဆိုတော့ ဘယ်လိုလုပ်ကြမလဲ။ ဒီအိမ်မှာ နှစ်နှစ်ကျော်ပြီ နွေရာသီဆိုရင် တလတခါ အိမ်ရှေ့လမ်းမက အပင်တွေနှုတ် မြက်တွေရိတ်ပေးတယ်။ တလောက ငှက်စာကျွှေးတဲ့ခွက် လေတိုက်လို့ ပြုတ်ကျပြီး ကွဲသွားတယ်။ အဲ့ဒီတော့ ခေါင်းရင်းက အဆောင်အောက်မှာ ငှက်စာကျွှေးရင်း အပင်တွေကို ကြည့်မိတယ်။ အသီးတွေတော့ သီးပါရဲ့ ဘာအပင်မှန်းမသိဘူး။ တလောကလည်း ပန်းပွင့်နေတဲ့အပင်ကို မြက်ပင်ထင်ပြီး ခုတ်လိုက်တာ အိမ်ရှင်က အဲ့ဒါ ၈၀ တောင် ပေးရတဲ့ ဒေလီယာပန်းပင် နောက်မခုတ်နဲ့တဲ့။ မခိုင်လာတော့ အပင်တွေကိုကြည့်ပြီး ဒီအသီးက တည်သီးစားလို့ရတယ်၊ အဲ့ဒီအပင်က chives၊ ဒါက ပူစီနံတဲ့။ chives တွေကို မြက်ပင်ထင်ပြီး နှုတ်ပစ်နေတာ ပူစီနံနဲ့တူတယ်လို့တော့ ထင်သား။ အပင်မှာ အပွင့်လေးတွေပွင့်နေလို့ အဖေတို့ကို ဘာအပင်လဲလို့ ဓာတ်ပုံပြပြီးမေးတော့ ဘေးချေ(ဦးလေး)က စိန်ပန်းပင်တဲ့။ နောက်တော့မှ ခရမ်းခဆော့သီးပင် ဖြစ်နေတယ်။ ခူးစားမလို့ဟာ အသီးတွေက မည်းနေလို့ မခိုင်က မစားပါနဲ့သမီးရယ် ဘာသီးတွေမှန်းမသိဘူးတဲ့။ မခိုင် ပြောတော့မှပဲ ခေါင်းရင်းကတည်သီးပင်ကို သွားသွားကြည့်တယ်။ ဝါလာရင်ခူးပြီး အုပ်ထားတယ် စားလို့မကောင်းဘူး ဖန်တန်တန်နဲ့။ အသီးတွေကို တနေ့တနေ့ သွားကြည့်တာအမော။ ဝါလာရင် ငှက်၊ ရှဉ့်တွေနဲ့အပြိုင် လုခူးတယ်။ ခုတော့ စားမကောင်းလို့ မခူးတော့ဘူး။ မနက်တိုင်း ငှက်ကလေးတွေကို အစားကျွှေးတယ်။ မနက် ၈ နာရီခွဲ ကိုယ်အစားကျွှေးတဲ့အချိန်ဆိုရင် ကျွှတ်ကျွှတ်ညံနေကြပြီ။ ကိုယ်ထွက်လာရင် ဘယ်သူရေ ဘယ်ဝါရေ ဒီမှာအစာကျွှေးနေပြီလို့ သူ့ဘော်ဒါတွေကို လှမ်းခေါ်ကြလေသလား မသိဘူး။ တချို့ငှက်က မကြောက်ဘူး ကိုယ့်အနားအထိ ပျံဝဲပြီးကြိုတယ်။ ရုံးပိတ်ရက် အိပ်ယာထနောက်ကျပြီး ကျွှေးရမဲ့အချိန် မကျွှေးရင် ကျွှတ်ကျွှတ်ညံနေကြပြီ။ အံမယ် … ငှက်တွေက အစားကျွှေးတဲ့သူနေတဲ့ အခန်းကိုသိတယ်တဲ့။ ရေလောင်းတာများလို့ သေသွားတဲ့ ZZ အပင်ကို အပြင်မှာထုတ်ထားတာ ပြန်ရှင်လာတယ် သေရွာပြန်ပင်။ စံပယ်ပင်ကတော့ သုံးနှစ်လောက်ရှိပြီ သေလိုက်ရှင်လိုက်နဲ့ အပွင့်လုံးဝမပွင့်ဘူး။ သစ်ခွခရမ်းရောင်လေးက သုံးခါလောက်ပွင့်ပြီး ကြက်ဥရည်တွေလောင်းတာ များသွားလို့ သေသွားတယ်။ ယုဇပင်ကတော့  အားအရဆုံးပဲ အတော်ပွင့်တယ် ပွင့်ရင်မွှေးလွန်းလို့ အိပ်ယာဘေးနား ထားအိပ်တယ်။ လေသန့်ပေးတဲ့ snake plant ထပ်ဝယ်ထားတယ်။ Golden Photos အရွက်နုလေးတွေထွက်လာရင် ပျော်နေတာ ခုပြန်ညှိုးနေပြန်ပြီ။ အပင်တွေမှာလည်း သူတို့ကြိုက်တဲ့နေရာ၊ မကြိုက်တဲ့နေရာရှိတယ်။ ကြိုက်တဲ့နေရာဆို ရွက်နုတွေဝေလို့ မကြိုက်တဲ့နေရာဆိုရင် အရွက်ကို ညှိုးနေတော့တာ။ အပင်ကို သတိထားကြည့်တဲ့သူဆိုရင် သိတယ်။ အိမ်တွင်းအိမ်ပြင် သစ်ပင်လေးတွေနဲ့ စိမ်းလန်းပြီး ပန်းရနံ့လေးတွေနဲ့ မွှေးထုံနေတဲ့အိမ်လို့ စိတ်ကူးယဉ်ပေမဲ့ ခုထိတော့ ဝယ်လိုက်၊ စိုက်လိုက်၊ သေလိုက် ဝယ်စိုက်သေ ဖြစ်နေတုန်း။ 

စန်းထွန်း 

အောက်တိုဘာ ၉၊ ၂၀၂၀။

တည်သီး… ဆင်ခရမ်းချည်သီးနဲ့တူတယ်…ကြိုက်တယ်

ခရမ်းခဆော့သီးနဲ့တူတယ်

မြက်လို့ထင်နေတာ Chives တဲ့

Chives ပါပဲ

ပူစီနံ တွေ့လား ရှာကြည့်

ငှက်စာနဲ့ရေ

သုံးနှစ်ရှိပြီ မကြီးမပွင့်တဲ့ စံပယ် ဘွန်ဆိုင်း

အသီးတွေ ဝါလာရင် ငှက်တွေ၊ ရှဥ◌့်တွေနဲ့အပြိုင် လုရတယ်…ခုတော့ မလုတော့ဘူး

၂၀၁၄ ကတည်းက လူစီတာ ပေးခဲ့တဲ့ Golden Photos
၊ လွန်ခဲ့တဲ့နှစ်ပတ်ကမှ ဝယ်ထားတဲ့ Snake Plant

သေရွာပြန် ZZ Plant ... သုံးနှစ်လောက်ရှိပြီ

အဆုပ်လိုက်ပွင့် မွှေးရနံ့သင်းပျံ့တဲ့ ယုဇန...သုံးနှစ်လောက်ရှိပြီ