The eye...

မင်း မျက်လုံးက အညိုရောင်နော်...

ဟု ဆိုလာသောအခါမှ မှန်ယူပြီး အသေအချာ ကြည့်မိသည်။ အနက်ရောင်ဟု ထင်ခဲ့သော မျက်လုံးများသည် အညိုရောင် ဖြစ်နေခဲ့သည်။  အနက်ရောင်တွင် အညိုရောင် မျက်ဆံများကြောင့် လုံးဝ ညိုညိုကြီးတော့ မဟုတ်။ ညိုတိုတိုဟု ဆိုရမည်။ မျက်လုံးအညိုရောင်သည် ဖေ့ဆီမှ ဖြစ်ပြီး မျက်အိမ်ကြီးကြီးသည် မေ့ဆီမှ အမွေရလိုက်ဟန် တူသည်။

မျက်လုံး နက်နက်ဝိုင်းဝိုင်းများကို နှစ်သက်သောသူသည် အနည်းငယ် ပိတ်သယောင်ထင်ရသော မျက်လုံးများကို နှစ်သက်သွားသောအခါ ထိုမျက်လုံးများသည်လည်း ဆွဲဆောင်မှုတမျိုးရှိကြောင်း သိသွားခဲ့သည်။ ကိုယ်တို့ နယ်မြို့လေးတွင် ပြာလဲ့လဲ့ မျက်လုံးပိုင်ရှင် အန်ကယ်ကြီးကို မူရင်းနာမည်တော့မသိ တမြို့လုံးက ကြောင်မျက်လုံးဟုသာ ခေါ်ကြသည်။

နိုင်ငံရပ်ခြားသို့ ရောက်သောအခါ ခံစားချက်မဲ့နေသော မျက်လုံးဗလာများကို ကြုံရသည်။ မြန်မာ၊ ထိုင်း၊ လာအို၊ ကမ္ဘောဒီးယား၊ ဖိလစ်ပိုင်၊ အင်ဒိုနီးရှား၊ မလေးရှားတို့၏ မျက်လုံးများသည် ပုံသဏ္ဍန် တူညီသည်။ ထိုမျက်လုံးများတွင် စပ်စုတတ်သော၊ ကူညီတတ်သော၊ သနားကြင်နာတတ်သော၊ နွေးထွေးသော ခံစားချက်များကို တွေ့ရသောကြောင့် ဖြစ်သည်။ ဗီယက်နမ်၊ တရုတ်၊ ဂျပန်၊ ကိုရီးယားတို့သည် အသားအရောင်၊ မျက်လုံးသဏ္ဍန် တူညီသည်။ ဘင်္ဂလားဒေ့ရှ်မှစ၍ အရှေ့အလယ်ပိုင်းအထိ မျက်လုံးသဏ္ဍန် တူညီသည်။

နီပေါလူမျိုးများ၏ မျက်လုံးများသည် မြန်မာဖြင့် ဆင်တူသော်လည်း အညိုရောင်ဖြစ်သည်။ အပြာနု၊ အပြာရင့်၊ မီးခိုးရောင်၊ အစိမ်းရောင် ရောင်စုံမျက်လုံးများကို တွေ့ရသည်။ ထိုမျက်လုံးများသည်လည်း ဗလာမျက်ဝန်းဖြစ်သည်။  မည်သည့်ခံစားချက်ကိုမှ ထိုမျက်ဝန်းများတွင် မတွေ့ရတတ်။

ပင်လယ်ပြာရောင် မျက်လုံးများက လှပသော်လည်း  ရွှေရောင်မျက်ခုံးများကြောင့် အလှဖျက်သလို ခံစားမိသည်။ အပြာရင့်ရင့် မျက်ဝန်းများကို မျက်ခုံးခုံးနက်နက်၊ မျက်တောင်နက်နက်များက အနားသတ်ပေးထားသောအခါ လှလိုက်တာဟု ငေးနေခဲ့ဖူးသည်။ ဥရောပမှ မျက်ခုံး၊ မျက်ဝန်း နက်နက်၊ ရွှေညိုရောင်ဆံကေသာကိုတော့ အရှေ့တိုင်းနှင့် အနောက်တိုင်းကို ပေါင်းစပ်ထားသည့်အလှဟု တွေးခဲ့ဖူးသည်။

မျက်လုံးအရောင်စုံတွေကြား ရောက်သောအခါ မျက်ဝန်းနက်နက်လေးများကို ပိုတမ်းတမိသည်။ နိုင်ငံမတူသော်လည်း မျက်လုံးအရောင်၊ ပုံသဏ္ဍန်တူသော မျက်ဝန်းနက်နက်များက ကိုယ့်လူမျိုးကြားထဲ ရောက်နေသယောင် ခံစားမိစေသည်။

စပ်စုတတ်သော၊ ကူညီတတ်သော၊ သနားကြင်နာတတ်သော၊ နွေးထွေးသော မျက်ဝန်းနက်နက်လေးများကို ကိုယ် တကယ် လွမ်းနေခဲ့ဖူးသည်။

စန်းထွန်း
ဇွန် ၁၅၊ ၂၀၁၂။