ကျွှန်မ၏ သစ်ပင် ...

ဆရာမဂျူး၏ ကျွန်မ၏သစ်ပင် ဝထ္ထုထဲကလို နီနီဇော်၏ အုပ်စိုးဆိုသော သက်ရှိလူသား သစ်ပင်လေး မဟုတ်ခဲ့ပါ။ စန်းထွန်း၏ သစ်ပင်လေးကတော့ တကယ့်သစ်ပင်လေး ဖြစ်နေခဲ့သည်။

တိုရှီဘာ သစ်ပင်စိုက်ပျိုးပွဲကို NUS နဲ့ NTU ကျောင်းသားကျောင်းသူများ ဆင်နွှဲကြမှာမို့လို့ လုပ်အားပေးလိုသူများ ဆက်သွယ်ကြရန်ဆိုတဲ့ အီးမေးလ်ရလာတော့ ကျောင်းပြီးလို့ အလုပ်ရှာနေတုန်း ဖလမ်းဖလမ်းထဖို့ အခွင့်အရေးပေါ်လာပြန်သည်။ မိစိမ့်၊ သော်သော်တို့ကို အဖော်ညှိတော့ ဒီကောင်တွေက စိတ်မဝင်စား။ ကိုယ့်လို ဖလမ်းမလမ်းထချင်သူက မြန်မာမိန်ကလေးထဲမှာ အတော်မြင့်မားတဲ့ အရပ်ပိုင်ရှင် ၅ပေ၊ ၈ လက်မခန့် မော်ဒယ်လေးလို ပိန်သွယ်တဲ့ ရည်မွန်။ I am the most beautiful girl in the class. လို့  သူ့ team member Liang Yi  ကို စရင် Liang Yi ကလည်း No. No. You are the tallest girl in the class. လို့ ပြန်နောက်တတ်ပါတယ်။

၂၀၀၉ စက်တင်ဘာ ၂ တခုသော သောကြာနေ့မှာ စာမေးပွဲကျင်းပရာ ခန်းမရှိသော၊ ဘောလုံးကွင်းဘေးနား၊ ရေကူးကန်ရှိသော၊ အားကစားလေ့ကျင့်ရာခန်းမကြီးရှိသော အဆောက်အအုံ (နာမည်မေ့နေသဖြင့်)နားတွင် တွေ့ဆုံကြသည်။ တိုရှီဘာမှ တာဝန်ရှိသူ အမကြီးများမှ ကြိ ုဆိုကြသည်။ အင်္ကျီဆိုဒ်မေးသည်။ သူတို့သည် NUS Alumnus များဟု ဆိုသည်။ လူစုံတော့ ထွက်ခွာသည်။ ၁နာရီလောက် မောင်းပြီးချိန် အနီရောင်လိုင်းဖက် ဘယ်နေရာမှန်း မှန်းဆ၍မရသော နေရာသို့ ရောက်သည်။

တိုရှီဘာအင်္ကျီလဲရသည်။ Mangrove ခေါ် လမုတော ထိန်းသိမ်းစောင့်ရှောက်ပုံအကြောင်း ရှင်းပြသည်။ လမုတောသည် ကမ်းခြေတိုက်စားခြင်းကို ကာကွယ်ပေးသောကြောင့် အရေးကြီးသည်။ မှန်ပေသည် နေရာရှားပါးသည့် စင်္ကာပူကျွှန်း နိုင်ငံလေးအတွက် ဒီကိစ္စသည် အရေးပါသည်။ လမုတောသည် ဇီဝမျိုးစိတ်စုံ ရှင်သန်ကျက်စားသည်။ လမုပင်များသည် ရှင်သန်လွယ်သည်။ သို့သော် လမုပင်များပြားပါကလည်း ဇီဝမျိုးစိတ်တချို့ရှင်သန်ရေးအတွက် အခက်အခဲဖြစ်သည်။ သို့ပါသောကြောင့် ရှိသင့်သော အရေအတွက်ထက် မပိုအောင် ထိန်းသိမ်းရသည်။ မူလတန်းကျောင်းသားလေးများ လေ့လာရေးခရီးစဉ်အတွက် ရှင်းပြပေးသော လုပ်အားပေးဂိုက် ရှိသည်။ သဘာဝပတ်ဝန်းကျင် ထိန်းသိမ်းစောင့်ရှောက်ရေးကို စိတ်ဝင်စားသူများ၊ ငှက်ကြည့်သူများ လာရောက်တတ်သည်။ သစ်တောထိန်းသိမ်းစောင့်ရှောက်ပုံများကို ဓာတ်ပုံများနှင့်တကွ အရွှန်းဖောက်ကာ ရှင်းသွားသည်မှာ ရယ်သံတအုန်းအုန်းနှင့် မပျင်းရ။

သည့်နောက်တော့ တိုရှီဘာမှ ကြေငြာဝင် အဲလေ တိုရှီဘာ ဂရင်းအကြောင်း ရှင်းပြသည်။ တိုရှီဘာမှ ပစ္စည်များကို လေထုထဲသို့ ကာဘွန်ဒိုင်အောက်ဆိုဒ် နည်းနိုင်သမျှနည်းအောင် ကြိုးစားနေကြောင်း၊ တကမ္ဘာလုံးတွင် သစ်ပင်ဘယ်နှစ်သန်း စိုက်ပျိုးပြီးစီးကြောင်း၊ စင်္ကာပူတွင် ကိုယ်ပိုင် ပုဂ္ဂလိက ဒီလိုမျိုး လမုပင်စိုက်ဖို့ မလွယ်ကြောင်း၊ အဖွဲ့အစည်းဖြင့် စိုက်ပျိုးခွင့်ရသည်ကို ဂုဏ်ယူထိုက်သည်ဟု ရှင်းလင်းသည်ကို လက်ခုပ်သံတဖြောင်းဖြောင်းဖြင့် နိဂုံးချုပ်လိုက်သည်။

လက်အိတ်၊ ရွှံ့ထဲစီးဖို့ ဘွတ်ဖိနပ် လဲရသည်။ သစ်ပင်စိုက်ပျိုးပုံအကြောင်း သစ်တောအရာရှိများက ရှင်းပြသည်။ ကျောင်းသားများကို ကူညီရန် သစ်တောလုပ်သားကြီးများ ရှိသည်။ သုံးယောက်တဖွဲ့ သစ်ပင်သုံးပင်စိုက်မည်ဟု ကြေငြာတော့ သုံးယောက်တဖွဲ့  ဖွဲ့ရန်အတွက် တယောက်လိုနေသည်။ တကောင်တည်း အဖော်မဲ့နေသော ဗီယက်နမ်အကိုကြီးခမျာ ကံထူးသွားသည်။

ရွှံ့နွံဖြင့် စေးထန်းနေသော မြေသားကို တူးရသည်မှာ မလွယ်။ လူတရပ်ခန့်ရှိနေပြီဖြစ်သော သစ်ပင်ပေါက်၏ အမြစ် လွတ်လွတ်ကင်းကင်းဝင်ရန် အတော်လေး နက်နက်တူးရသည်။ လေးလံသော ပေါက်တူးကို တခါမကြည့်ရင်း ကိုယ့်အခြေအနေ သိသွားသည်။ ဗီယက်နမ်ကြီး တူးပြီး သစ်ပင်ထည့်သည့်အခါ မြေဖို့ရုံသာ စွမ်းဆောင်နိုင်သည်။ တဖွဲ့သုံးပင်စာအတွက် သုံးတွင်း တူးရမည်။

အားနာနာဖြင့်

အာ ယူ အိုကေ

၂နာရီ ပူပြင်းသောနေပူချိန်အောက် နဖူးမှ ကျလာသော ချွှေးကို လက်ဖြင့်သုတ်လိုက်ရင်း ဗီယက်နမ်ကြီးမှ လက်နှစ်ချောင်းထောင်ကာ ပြန်ဖြေသည်။

အို..အိုကေ ဟော..ဟဲ

သစ်တောလုပ်သားကြီးများမှ ဝိုင်းကူညီကြသည်။ မပြီးသေးသော အဖွဲ့ကို ပြီးသူများက ကူညီကြသည်။ မျက်နှာတွင် ရွှံ့ပေနေသော လူကိုကြည့်ပြီး ရယ်ကြသည်။ ပူပြင်းသော နေရောက်အောက်တွင် ကမ္ဘာမြေကြီး စိမ်းလန်းဖို့ တတပ်တအား အားထုတ်နေကြသည်။ ပင်ပန်းသော်လည်း သူတို့ပျော်ကြသည်။

အပြန်တွင် NTU ကျောင်းကို အရင်ပို့သည်။ ကျောင်းပရဝုဏ် တော်တော်ကျယ်သည်။ ပထမဆုံးနှင့် နောက်ဆုံးအကြိမ် ရောက်ဖူးခြင်း ဖြစ်သည်။

ဟိုင်းကြီးကျွှန်းသူဖြစ်သော ကျွန်မ ဒီရေတော၊ လမုတောတွင် ကြီးပြင်းခဲ့သည်။ လမုသီးများဖြင့် အိုးပုတ်တမ်းကစား၊ မီးဖိုချောင်းတွင် ထင်းအဖြစ် သုံးခဲ့သည်။ သို့သော် ထိန်းသိမ်းစောင့်ရှောက်သင့်မှန်း တခါမှ အတွေးမဝင်ခဲ့သလို လမုပင် တပင်မှလည်း မစိုက်ပျိုးခဲ့။ စင်္ကာပူတွင် သစ်ပင်များဖြင့် စိမ်းလန်းသောမြို့တော်ဖြစ်ရမည်ဆိုသော ဆိုင်းဘုတ် မရှိ။ သို့သော် နေရာကျဉ်းသော စင်္ကာပူသည် နေရာကျယ်သော ကျွန်မတို့တိုင်းပြည်ထက် ပို၍ စိမ်းလန်းနေခဲ့သည်။ ကမ္ဘာမြေ၏ စိမ်းလန်းမှုကို လူသားများက ဖျက်ဆီးသည်။ ထိုအကျိုးဆက်အဖြစ် ရာသီဥတုဖောက်ပြန်မှုဒဏ်ကို ခံရသည်။

ကျွှန်မ၏ သစ်ပင်လေးသည် မြစ်ကမ်းပါးတိုက်စားမှုကို ကာကွယ်ပေးပြီး လေထုထဲသို့အောက်ဆီဂျင်ဓာတ် ထုတ်လွှတ်ကာ ကမ္ဘာမြေကြီး စိမ်းလန်းရေးအတွက် တတပ်တအားပါဝင်သည်ကို တွေးမိတိုင်း ကြည်နူးမိသည်။

စန်းထွန်း
မတ်လ ၂၄၊ ၂၀၁၂။