သင်ယူခြင်း အနုပညာ…

၂၀၂၀ စက်တင်ဘာ ၂၈ ကနေ ၃၀ ရက်နေ့အထိ မိုက်ခရိုဆော့ သုံးရက်သင်တန်း အွန်လိုင်းကနေ တက်ရတယ်။ ဒါရိုက်တာမက ရုံးကရတဲ့ဘောက်ချာထဲကနေ ကိုယ်ကြိုက်တဲ့သင်တန်းကို ရွေးတက်ခိုင်းတယ်။ တဖွဲ့လုံးမှာ ကိုယ့်တယောက်တည်း ပေးတာ။ HelpDesk ကို အိုင်ဘီအမ်ကဟာ ပြောင်းသုံးတော့လည်း ကိုယ့်အဖွဲ့ကိုယ်စား လေးရက်သင်တန်း ကိုယ်တက်ရတယ်။ ticket တွေကို on hold ဘယ်လိုလုပ်ရမလဲ၊ ဘယ်လို close လုပ်ရမလဲ၊ user ကို ဘယ်လိုအီးမေးလ် ပို့ရမလဲ၊ tag ဘယ်လိုလုပ်ရမလဲ၊ child ticket ကို ဘယ်လိုချိတ်ရမလဲ၊ ဘယ်လို sort လုပ်ရမလဲ၊ column အသစ်ဘယ်လိုထည့်ရမလဲ တခုခုဆို ကိုယ့်ကိုမေးကြတော့တာပဲ။ ကိုယ်တက်ချင်တာ data analysing ဘာသာရပ်တွေ။ software developer အလုပ်မှာ ဂိတ်ဆုံးက senior developer ပဲရှိတယ်။ မန်နေဂျာဖြစ်ချင်ရင် ပရောဂျက် management ဖက်ကနေ သွားလို့ရတယ်။ ပရောဂျက်မန်နေဂျာဆိုတာ စကားပြောကျွှမ်းကျင်၊ meeting တွေကို ဥ◌ီးဆောင်နိုင်ရမယ်။ ကိုယ်တချို့အသံထွက်ကို လူတော်တော်များများ နားမလည်ဘူး။ ပြီးတော့ စကားပြောမကျွှမ်းကျင်ဘူး စင်မြင့်တက်ရမှာလည်း ကြောက်သေးတယ်။ ကိုယ့် mentor က data architect သူ့လိုဖြစ်ချင်တာ။ data architect နဲ့ data scientist ကို သဘောကျတယ်။ ခုခေတ်မှာ data analyzing က အရေးပါတယ်။ ရွေးကောက်ပွဲမှာ ဘယ်သူနိုင်မယ်လို့ ခန့်မှန်းတာမျိုး၊ ကိုဗစ်ကာလမှာ ဘယ်လိုအခြေအနေဆိုရင် ဘယ်လို model တွေနဲ့ တွက်ချက်ကြတာမျိုး။ ရုံးမှာ PowerBI မှာသုံးရမှာမို့ အဲ့ဒါပဲရွေးလိုက်တယ်။ မနက် ၈ နာရီခွဲကနေ ညနေ ၄ နာရီခွဲအထိ။ virtual class က zoom နဲ့ ဆရာက အင်္ဂလန်က၊ တပည့် ၁၆ ယောက်က နယူးယောက်၊ ဘော်စတွန်၊ ဆန်ဖရန်စစ္စကို၊ တိုရန်တိုက။ အလုပ်မှာသုံးနေလို့၊ သင်ဖို့လိုလို့ လာတက်ကြတာ။ lab ကို ဘယ်လိုဖွင့်ရမလဲ၊ lesson material ကို ဘယ်လိုဖွင့်ရမလဲ၊ license key က ဘာလို့မပေါ်တာလဲနဲ့ သင်တန်းစဖို့ကို တနာရီလောက်ကြာတယ်။ ဆရာ့ကွန်ပျူတာမျက်နှာပြင်ကိုပဲ မြင်ရပြီး ကိုယ့်ကွန်ပျူတာမျက်နှာပြင်လို ပြလို့မရတော့ chat ကနေ စာရိုက်၊ mic နဲ့ စကားလှမ်းပြော။ ဆရာက မှန်းပြီးပြောပြ အဆင်ပြေတာလည်းရှိ အဆင်မပြေတာလည်းရှိ။ စာသင်ခန်းထဲမှာ ပြသနာမဟုတ်တာတွေက ဒီမှာပြသနာ။ ဆရာသင်တာတွေ နားလည်ပေမဲ့ lab လုပ်ခိုင်းရင် အဆင်မပြေတော့ဘူး။  အချိန် ၄၅ မိနစ် အချိန်မလောက်မပြီးလို့ ဇောချွှေးပြန် ဆရာသင်တာကို စိတ်မဝင်းစားနိုင် ခိုးပြီး lab ဆက်လုပ် မရလို့ စိတ်ပျက်လက်ပျက်ဖြစ်။

မပြီးရင် ရှေ့ဆက်လို့မရလို့ စိတ်ပျက်ဇောချွှေးပြန် နေ့လည်စာထမင်းတောင် ကောင်းကောင်းမစားနိုင်ဘူး။ ညနေအတန်းပြီးတော့ ရှာဖွေကြည့်လိုက်တဲ့အခါ solution folder မှာ အဖြေသွားတွေ့တယ်။ အဲ့ဒါတွေကြည့်တော့မှ နားလည်သွားတယ်။ ပထမနေ့က ခေါင်းတွေကိုက်ပြီး ညစာစားပြီးတာနဲ့ ပင်ပန်းလို့ အိပ်ယာမှာ လဲနေတော့တာပဲ။ အမလေး စာသင်ရတာ ပင်ပန်းလိုက်တာ။ အွန်လိုင်းကနေ သင်ဖူးပါတယ် ၃ နှစ်လုံးလုံး အွန်လိုင်းကနေ ကျောင်းတက်ခဲ့တာပဲ။ သင်ခန်းစာ ဗွီဒီယိုဖိုင်တွေကြည့်၊ စာအုပ်ဖတ်၊ အပတ်တိုင်း assignent တင်၊ တလခွဲတခါ learning center တွေမှာ စာမေးပွဲသွားဖြေ။ ဆရာနာဂျစ်ကတော့ အွန်လိုင်းကနေ စာသင်တယ် စာသင်တာကို ကြိုက်တဲ့သူဆိုတော့ သတ်မှတ်ထားချိန်ထက် နောက်ကျပြီးမှပြီးတယ်။ ကျောင်းနဲ့ဝေးနေတာ ခြောက်နှစ်ရှိပြီ။ ၂၀၂၀ အစပိုင်းက data architect လုပ်မယ် ကျောင်းတက်မယ် လုပ်လိုက်သေးတယ်။ ခုပုံစံအတိုင်းဆို ကျောင်းတက်နိုင်ပါ့မလား။ လွန်ခဲ့တဲ့ဆယ်နှစ် ၂၀၀၈ စင်္ကာပူမှာကျောင်းတက်တုန်းကဆို မနက် ၇ နာရီခွဲအိမ်ကထွက် ၉ နာရီကျောင်းတက်။ ည ၁၁ နာရီ ၄၅ နောက်ဆုံးဘတ်စ်ကားနဲ့ ကျောင်းကနေပြန် နောက်ဆုံးရထားမှီအောင် ပြေးကြလွှားကြ။ အိမ်ကို ည ၁၂ ခွဲလောက်မှရောက်တယ်။ စနေ၊ တနင်္ဂနွေလည်း အဲ့ဒီအချိန်စာရင်းအတိုင်းပဲ။ အဲ့ဒီတုန်းက ပင်ပန်းပေမဲ့ ဒီလောက်မပင်ပန်းသလိုပဲ။ ဆယ်နှစ်ဆိုတဲ့အချိန် တကယ်စကားပြောတယ်။ ဒုတိယနေ့ကျတော့ ပထမနေ့လောက် မပင်ပန်းတော့ဘူး နည်းနည်းလိုက်နိုင်လာပြီ။ ကျောင်းသားတယောက် ထွက်သွားတယ် သင်တန်းကြေး နှမြောစရာ တနေ့ ၇၀၀ ကျော်ကျတယ်။ ဒီရုံးက သင်တန်းကြေးလည်းပေးတယ်၊ သင်တန်းတက်ချိန်ကိုလည်း အလုပ်လုပ်ချိန်ဆိုပြီးပေးတယ်။ ဒီတော့ ဘာလို့သင်တန်း မတက်ရမှာလဲနော့။ တရုတ်ကုမ္ပဏီတုန်းကဆို သင်တန်းကြေးကိုယ့်ဘာသာပေး အောင်ရင် ကုမ္ပဏီဆီက ပြန်တောင်းလို့ရတယ်။ ဒါပေမဲ့ သုံးနှစ်လုပ်ပေးပါမယ်လို့ လက်မှတ်ထိုးရတယ်။ သင်တန်းတက်ချိန်ကို ကိုယ့်အားလပ်ရက်ကနေ သုံးရတယ်။ သင်တန်းတက်ရတာ အလုပ်လုပ်ရတာထက် ပင်ပန်းပါလားလို့ တွေးမိတယ်။ ဒါတောင် စာမေးပွဲမဖြေသေးလို့ စာမေးပွဲဖြေမယ်ဆိုရင် အောင်ပါ့မလား၊ အမှတ်ကောင်းကောင်းရပါ့မလားနဲ့ ဘယ်လောက်တောင် စိတ်ဖိစီးလိုက်မလဲ မသိဘူး။ ပထမနေ့ကတော့ ဆရာသင်တာ ၁၀၀% ရ,ရမယ်လို့ ကြုံးဝါးတယ်။ ဒုတိယနေ့ကျတော့ ၈၀% ရရင် ကျေနပ်ပါပြီ။ တတိယနေ့ကျတော့ ၆၀% ရရင် အတော်ဟုတ်နေပြီလို့ တွေးမိတယ်။ တနေ့နေ့ လျော့လာလိုက်တာ တလလောက်များ တက်ရမယ်ဆိုရင် နောက်ဆုံးနေ့မှာ ၁% ရရင် ကျေနပ်ပါပြီလို့ ပြောနေမိမလားဘဲ…။

စန်းထွန်း
အောက်တိုဘာ ၂၊ ၂၀၂၀။
 
Credit to Twitter

No comments: