ဂျော့တောင်းသွား တောလား..

ဂျော့တောင်းသွား တောလားဆိုတော့ ဘယ်ပြည်နယ် ဘယ်မြို့ဘယ်တောတွေ လားနေပြန်ပြီလဲလို့ မထင်လိုက်ပါနဲ့။ ဒီစီပြည်နယ် ဂျော့တောင်းတက္ကသိုလ်ကို လည်လည်သွားတာပါ။ စက်တင်ဘာလကုန်ခါနီး တခုသော စနေနေ့ ကလဲရားနဲ့အတူ တရုတ်ယဉ်ကျေးမှုပွဲတော်ကို  ဗော်လန်တီယာလုပ်ဖို့ စာရင်းပေးထားပါတယ်။ စနေနေ့မို့ ထင်ပါရဲ့ ဒီစီမြို့တော်ကြီးက ခြောက်ကပ်နေလိုက်တာ။ ကယ်ပီတယ်ကနေ မိုးနှုမတ်ကျောက်တိုင်အထိ ကွင်းပြင်ကျယ်ကြီးကို ကယ်ပီတယ်မောလ်လို့ခေါ်ပြီး ပွဲတော်တွေ၊ အားကစားပြိုင်ပွဲတွေ ကျင်းပလေ့ ရှိပါတယ်။ နေ့လည် ၁၂ နာရီ ရီဂျက်စတာလုပ်တော့ ကဒ်လေး ထုတ်ပေးတယ်။ ဘာလုပ်ရမလဲဆိုတော့ ခုံတွေအားလုံး စီပြီးသွားပြီ စားဖို့ပဲ ကျန်တော့တယ် ရော့ ထမင်းဗူးတဲ့။ ဘာမှမလုပ်လိုက်ရတဲ့ ဗော်လန်တီယာ း) ။

လူတွေအုံနေလို့ သွားစပ်စုတာ ကလေးနှစ်ယောက်နဲ့ လူကြီးတယောက် စုတ်တံနဲ့ စာရေးပေးနေတာ။ အလကားဆိုတာနဲ့  အချစ်ဆိုတဲ့ စကားလုံးကို ရေးပေးဖို့ ရီကွတ်လုပ်လိုက်တယ်။ မှင်ကို စုတ်တံနဲ့ ရေးတာ အတော်ခက်တယ်လို့ ကြားဖူးတယ်။ ကျွှန်မ ကို ရေးပေးတဲ့ ကလေးမလေးက ဆယ်နှစ်လောက်ပဲ ရှိဦးမယ်။ တရုတ်ရိုးရာဝတ်စုံလေးနဲ့ ချစ်စရာလေး။


မိုးနှုမတ်ကျောက်တိုင်ကနေ ဒုတိယကမ္ဘာစစ်အထိမ်းအမှတ်၊ ရီဖလန်းရှင်းရေကန်၊ လင်ကွန်းအထိမ်းအမှတ်တို့ကို ဖြတ်ကျော်လို့ ပတ်တိုးမတ်မြစ် ဘေးကလမ်းအတိုင်း လမ်းလျှောက်ကြတယ်။ လမ်းလျှောက်ကြသူတွေ၊ စက်ဘီးစီးကြသူတွေ၊ ပတ်တိုးမတ်မြစ်ထဲမှာ သင်္ဘောစီးကြသူတွေ၊ ကနူးလှေလှော်ကြသူတွေ၊ မတ်တပ်ရပ် လှော်ကြသူတွေနဲ့ စည်ကားပါတယ်။ ဂျွှန်ဖက်ကနေဒီ ပါဖောင့်မတ်အနုပညာစင်တာကို ကျော်ပြီးချိန် မောလို့ မြစ်ကမ်းဘေးမှာ နားကြတယ်။ ကလေးမလေးတယောက်က ဂျင်းဂဲဘဲလ်သီချင်းကို တိုးတိုးလေး ညည်းဆိုပြီး ဘဲတွေကို အစာကျွှေးနေတယ်။


ပတ်တိုးမတ်မြစ်က ဒီစီနဲ့ဗာဂျီးနီးယားပြည်နယ်ကို ခြားထားပြီး အလယ်မှာ သီဟိုဒိုရုစဗဲ့ကျွှန်း ရှိပါတယ်။ တဖက်ကမ်းက ဗာဂျီးနီးယားပြည်နယ် အာလင်တန်ဖက်က တိုက်မြင့်မြင့်ကြီးကို မြင်ရတယ်။ ဂျော့တောင်းဝါတားဖရန့်ပန်းခြံမှာ ရေပန်းတွေနဲ့ သာယာတယ်။ ကျွှန်မ က ဂျော့တောင်းတက္ကသိုလ်ကို မရောက်ဖူးဘူးလို့ ရောက်တုန်းလေး သွားလည်ချင်တယ်။ ကလဲရားက ဂျော့တောင်းတက္ကသိုလ်ထွက် မဟုတ်ပေမဲ့ ဂျော့တောင်းတက္ကသိုလ်အားကစားခန်းမက ကောင်းလွန်းလို့ အသင်းဝင်ထားပြီး အားကစားလာလုပ်၊ ရေလာကူးလေ့ ရှိပါတယ်။


တူးမြောင်းလေးကို ကျော်ဖြတ်တော့ မဆီမဆိုင် အီတလီက ဗင်းနစ်မြို့လေးကို သတိရတယ်။ လမ်းမတန်းရောက်တော့ လား...လား လူတွေမှ ကြိတ်ကြိတ်တိုးနေလိုက်တာ ခြင်္သေ့ကျွှန်းက အော့ချက်လမ်းမအတိုင်း။ နာမည်ကြီးဆိုင်တွေ အကုန်ရှိတယ်။ ဆိုင်တွေကလည်း တထပ်တိုက် ရှေးဟောင်းလက်ရာတွေ။ ကလဲရားကြိုက်တဲ့ ဂျေခရူး  J.Crew ကျွှန်းကြိုက်တဲ့ ဘနနားရီပါ့ပလစ် Banana Republic ရဖဲလော်ရန် Ralph Lauren ဇာရာ Zara တွေ ဝင်ကြတော့ ဒစ်စကောင့်ဆိုတာ မတွေ့တဲ့အပြင် ဈေးကကြီး ကြိုက်တာလည်းမတွေ့။


မနှစ်က ဒီဇင်ဘာ ခရစ်စမတ် ဝါရှင်တန်ဒီစီ Ronald Reagan Washington National Airport ကနေ ဆူနမ်တို့ဆီ ရှယ်တယ်စီးတော့ ဒရိုင်ဘာအန်တီကြီးက ရဲတိုက်ကြီးကို ညွှန်ပြပြီး အဲဒါဂျော့တောင်းတက္ကသိုလ် နာမည်ကြီးသလို ဈေးလည်းအရမ်းကြီးတယ်။ အဲဒီတဝိုက်က အိမ်ငှားခတွေက အရမ်းအရမ်းကို ဈေးကြီးတယ်တဲ့။ ရဲတိုက်ကြီးလို ကြီးကျယ်ခမ်းနားလှတဲ့ ဂျော့တောင်းတက္ကသိုလ်ဆိုတာကြီးကို လှမ်းမြင်လိုက်ရကတည်းက ရောက်ဖူးချင်ခဲ့တာ။ ခုတော့ ရောက်ဖူးပြီ။

credit to www.georgetown.edu
credit to www.georgetown.edu

၁၇၈၉  ကတည်းက တည်ထောင်ခဲ့တဲ့ ဂျော့တောင်းတက္ကသိုလ်ဟာ နိုင်ငံရဲ့သက်တမ်းအရှည်ဆုံး ကက်သလစ်တက္ကသိုလ်ဖြစ်သလို ကမ္ဘာအဆင့် ပညာရေး၊ သုသေတနလုပ်ငန်းတွေကို ဦးဆောင်နေတဲ့ တက္ကသိုလ်ပါ။ ပတ်တိုးမတ်မြစ်ကို အပေါ်ကနေ လှမ်းမြင်ရသလို တောင်ကုန်းပေါ်မှာ တည်ထားတဲ့ တက္ကသိုလ်ကြီးက အင်မတန်မှ သာယာလှပသလို ကြီးကျယ်ခမ်းနားပါတယ်။ အထဲကိုတော့ မဝင်ဖြစ်တော့ဘူး။ အသင်းက ကန်ရတော့မဲ့အလှည့်ဆိုရင် အဲဒီအသင်းဖက်က ဘင်ခရာတီးဝိုင်းက တီးမှုတ်လိုက်၊ သီချင်းတွေ သံပြိုင်ဟစ်ကြွေးကြ၊ ချီယားလီဒါမိန်းကလေးတွေက ကလိုက်ကြနဲ့ အတော်ပျော်ဖို့ကောင်းသား။ ကွျှန်မကတော့ ကာထားတဲ့ ပိုက်ကွက်ထဲကို ကင်မရာထည့် Zoom နဲ့အကြီးချဲ့ပြီး ရိုက်ရတယ်။ ဂျော့တောင်းအနွေးထည်လေးတွေ ဝတ်ထားတဲ့ တရုတ်ကျောင်းသူလေးတွေ တွေ့တယ်။

ကလဲရားက တရုတ်ပြည် တက္ကသိုလ်မှာလည်း ဘောလီဘော ကစားတယ်။ ဖီလာဒဲဗီးယားတက္ကသိုလ် တက်တော့လည်း  ဘောလီဘော ကစားတယ်။ ခုလည်း တပတ်တကြိမ် ဘောလီဘော ကစားတယ်။ နင် တက္ကသိုလ်တက်တုန်းက ဘာကစားလဲမေးတော့ ငယ်ငယ်တုန်းက တုပ်ဆီးထိုးတယ်၊ အာလူးကောက်တယ်၊ ကြိုးခုန်တယ်၊ ဆောင်းရာသီဆို ကြက်တောင်ရိုက်တယ်၊ လမ်းလျှောက်တယ်။ ခုနစ်တန်းရောက်တော့ စကပ်တလွှားလွှားနဲ့ ကြိုးခုန်နေတာ မသင့်တော်လို့ ဆရာမတွေက ကြိုးမခုန်ရလို့ ပိတ်လိုက်ကတည်းက မဆော့တော့တာ။ ပြီးတော့ ငါတို့တက္ကသိုလ်မှာ ဘာမှမရှိလို့ ဘာမှမကစားဘူးဆိုလို့ ကလဲရားက အံ့တွေသြလို့။


တံတားပေါ်ကနေ ပတ်တိုးမတ်မြစ်ကို ဖြတ်ကျော်ရင်ပဲ ဗာဂျီးနီးယားပြည်နယ် ရိုစလင်ကို ရောက်ပြီ။ တံတားပေါ်မှာ ကွျှန်မတို့ကို ဖြတ်ကျော်သွားတဲ့အုပ်စုထဲက အန်ကယ်ကြီးတယောက်က သူ့ဓာတ်ပုံတွေ တဖျပ်ဖျပ် ရိုက်ခိုင်းနေတာတွေ့လို့ ကျွှန်မ က ပြံပြုံးတော့ ကလဲရားက အံမယ် သူများကို ပြုံးမနေနဲ့။ နင်လည်း ဘာထူးလဲ အဲဒီအတိုင်း တဖျပ်ဖျပ် ရိုက်ခိုင်းလိုက် ရှုခင်းတွေကို ရိုက်လိုက်နဲ့ ရှုပ်ရှက်ခတ်နေတာပဲ။ တော်ကြာ ဟိုနေရာမှာ ရပ်လိုက် ဒီနေရာမှာ ရပ်လိုက်နဲ့နင်နဲ့ လမ်းလျှောက်ရတာ ခရီးမတွင်ဘူးလို့ ကောင်းချီးပေးတယ်။

ငါတို့လမ်းလျှောက်လာတာ ၃ နာရီကျော်နေပြီ ရှုးတခါမှ မပေါက်ရသေးဘူး ဟို Marriot ဟိုတယ်မှာ ရှုးဝင်ပေါက်ရအောင်။ ဟမ်...ဝင်ပေါက်လို့ရပါ့မလား။ ကလဲရားက ကောင်တာကို သွားပြီး ကျွှန်မ သူငယ်ချင်းအတွက် ဘွတ်ကင်းကို ကျွှန်မ ခရက်ဒစ်ကဒ်နဲ့ ပေးထားတာ သူတို့ချက်ကင်လာရင် သူတို့ခရက်ဒစ်ကဒ်နဲ့ ပေးလို့ရတယ်မလား။ (ဟိုတယ်ကောင်တာ) ရပါတယ် မမ်။ လာ..ရှုးပေါက်လို့ရပြီ။ ပိုင်သကွာ ကလဲရား..ရာ။


ရိုစလင်မြို့ထဲတလျှောက် လမ်းတပတ်လျှောက်ပြီး ဗိုက်ဆာလာတော့ နာမည်ကြီး ဗီယက်နမ်ဆိုင် Pho 75 က ဖော်ကို မစားတော့ဘဲ Asia Cafe က နာမည်ကြီး အင်ဒိုနီးရှားအစားအစာ  Nasi Uduk  နာဆီအူထုတ် စားကြတယ် ကောင်းသား။ ခြင်္သေ့ကျွှန်းမှာတုန်းက ဖိလစ်ပိုင်တွေစုရပ် လပ်ကီးပါလဇာဆိုလား ဘာပါလာဇာပါလိမ့် နာမည်မေ့နေပြီ အဲဒီမှာ အာရမ်ပါရမ်ဆိုတဲ့ အင်ဒိုနီးရှားအစားအစာ ထမင်းကို ကြက်အကြွပ်ကြော်၊ အမဲအကြွပ်ကြော်၊ ကန်းစွန်းရွက်ပြုတ်၊ သခွားသီး၊ ငါးပိထောင်း အတော်စပ်စပ်နဲ့ စားတာ အတော်ကောင်းတယ်။ ဟာဘားဖရန့်မှာ အင်ဒိုနီးရှားဆိုင် ဂါရုဒါဆိုတဲ့ စားသောက်ဆိုင်လည်း မြန်မာပါးစပ်နဲ့ကိုက်တယ် စားကောင်းတယ်။


 စားပြီးတော့ ကလဲရားက ဒီစီကို ၂ နာရီ လမ်းလျှောက်ပြီး ပြန်မယ်တဲ့။ ကလဲရားထက် အသက် ၂၀ လောက်ပိုငယ်တဲ့ ကျွှန်မ ကတော့ လမ်းမလျှောက်နိုင်တော့လို့ ရထားစီးပြီး အိမ်ပြန်ခဲ့ပါတယ် း) ။ NIH မှာ အလုပ်အသစ် ရသွားတဲ့ ကလဲရားနဲ့ အလုပ်အသစ် မရသေးတဲ့ ကျွှန်မ တို့ အရင်လို ဖလမ်းဖလမ်း မထနိုင်တော့ပါဘူး။ ကလဲရားက ခေါက်လို့ရတဲ့ စက်ဘီး ( ရပ်ကွက်ထဲမှာတော့ဗျာ - ၁၂ မှာ ကျွှန်မ စီးနေတဲ့ စက်ဘီး) ဝယ်ထားတဲ့အပြင် BMW SUV X3 ဝယ်ထားပြီမို့ ကားမှာ စက်ဘီးတွေ တင်လို့ရပြီ အားတဲ့တနေ့Biking ထွက်မယ်၊ ရှေ့လ တရုတ်ပြည် အလည်မသွားမှီ ဖီလာဒဲဗီးယားကို သွားဖြစ်ခဲ့ရင် လိုက်ခဲ့။  အဲဒီမှာ လွတ်လပ်ရေးကြေငြာခေါင်းလောင်း ၊ သမိုင်းဝင်နေရာတွေကို လည်ပတ်လို့ရတယ်လို့ခေါ်ထားပေမဲ့ ရေစက်ရှိရင် ဆုံတွေ့ဦးမှာပေါ့။ သွားဖြစ်ခဲ့ရင်တော့ ဖီလာဒဲဗီးယားသွား တောလား ရေးဖြစ်ပါလိမ့်မယ်။

စန်းထွန်း
အောက်တိုဘာ ၂၉ ၊ ၂၀၁၃။

5 comments:

Anonymous said...

စန္းထြန္းေလး..
ဓါတ္ပံုုေတြသေဘာက်တယ္။
သြားႏုုိင္သေလာက္သာသြား။ စိတ္သြားတိုုင္းကုုိယ္မပါႏုုိင္တဲ့အခါက်ျပန္ေတြးရတာေပါ့။ း)
အလုုပ္သစ္ေကာင္းေကာင္းေနရာေကာင္းေကာင္းမွာရပါေစလုုိ ့...
ခ်စ္ေသာမမအိုုင္အိုုရာ

မေလး said...

ညိမစန္းထြန္းေရ ဓါတ္ပံုေတြအမ်ားၾကီးပဲ။ တ၀ၾကီးၿကည့္
သြားတယ္။ ဓါတ္ပံုေတြကို သေဘာက်မိတယ္။
ခ်စ္ခင္တဲ့
မေလးၿမတ္

ဟန္ၾကည္ said...

စန္းထြန္းရာ...

က်န္တဲ့စာလံုးေတြ ေရးခိုင္းရင္လည္း ရပါလွ်က္ကနဲ႔ ဘယ့္ႏွာျဖစ္လို႔ ဒီစာလံုးကိုမွ ေရးခိုင္းပါလိမ့္...အိမ္း သီတင္းကလည္း ကၽြတ္ၿပီကိုးဗ်... း)

ျမန္မာျပည္က တကၠသိုလ္ေတြမွာ အားကစားသာ မရွိတာရယ္ ေလာင္းကစားကေတာ့ ဘာေပါသလဲမေမ့နဲ႔လို႔ ကလဲရားကို ေျပာျပလိုက္ေပေရာ့ဗ်ား... း)

ဘုန္းဘုန္းေတာက္ said...

သြားေရာက္လည္ပတ္ခ်င္စရာ... သာယာလုိက္တာေနာ္ ဂယ္ပဲ... ဒါနဲ႔ ဆရာမက ႀကဳိးမခုန္နဲ႔ေတာ့လုိ႔ ေျပာေတာ့ စန္းထြန္းက ေဘာင္းဘင္၀တ္ၿပီး ခုန္မယ္လုိ႔ ျပန္မေျပာလုိက္ဘူးလား...

San San Htun said...

Anonymous said...
စန်းထွန်းလေး..
ဓါတ်ပုံတွေသဘောကျတယ်။
သွားနိုင်သလောက်သာသွား။ စိတ်သွားတိုင်းကိုယ်မပါနိုင်တဲ့အခါကျပြန်တွေးရတာပေါ့။ း)
အလုပ်သစ်ကောင်းကောင်းနေရာကောင်းကောင်းမှာရပါစေလို့...
ချစ်သောမမအိုင်အိုရာ
October 29, 2013 at 10:17 PM
မလေး said...
ညိမစန်းထွန်းရေ ဓါတ်ပုံတွေအများကြီးပဲ။ တဝကြီးကြည့်
သွားတယ်။ ဓါတ်ပုံတွေကို သဘောကျမိတယ်။
ချစ်ခင်တဲ့
မလေးမြတ်
October 30, 2013 at 8:09 AM
ဟန်ကြည် said...
စန်းထွန်းရာ...

ကျန်တဲ့စာလုံးတွေ ရေးခိုင်းရင်လည်း ရပါလျှက်ကနဲ့ ဘယ့်နှာဖြစ်လို့ ဒီစာလုံးကိုမှ ရေးခိုင်းပါလိမ့်...အိမ်း သီတင်းကလည်း ကျွတ်ပြီကိုးဗျ... း)

မြန်မာပြည်က တက္ကသိုလ်တွေမှာ အားကစားသာ မရှိတာရယ် လောင်းကစားကတော့ ဘာပေါသလဲမမေ့နဲ့လို့ ကလဲရားကို ပြောပြလိုက်ပေရော့ဗျား... း)
October 30, 2013 at 9:44 AM
ဘုန်းဘုန်းတောက် said...
သွားရောက်လည်ပတ်ချင်စရာ... သာယာလိုက်တာနော် ဂယ်ပဲ... ဒါနဲ့ ဆရာမက ကြိုးမခုန်နဲ့တော့လို့ ပြောတော့ စန်းထွန်းက ဘောင်းဘင်ဝတ်ပြီး ခုန်မယ်လို့ ပြန်မပြောလိုက်ဘူးလား...
November 1, 2013 at 10:40 AM