ရပ်ကွက်ထဲမှာ‌တော့ဗျာ - ၄

ကျောင်းက ကြီးလေးကြီးကတော့ နီပေါ၊ တရုတ်၊ ဂျော်ဒန်၊ အီသီယိုးပီးယား။ နီပေါနဲ့ တရုတ်အကြောင်းကတော့ ဖွပြီးသွားပါပြီ။ အာဖရိက အီသီယိုးပီးယားနိုင်ငံကနေ ခွဲထွက်ပြီး နိုင်ငံထူထောင်ထားတဲ့  Eritrea နိုင်ငံလေးက ဒီဗွီပေါက်လို့ စတိတ်ကို ရောက်နေတဲ့ အာရိယန်ရဲ့ စရိုက်ကို မကြိုက်လို့ မပေါင်းဖြစ်တော့ အာဖရိကတွေအကြာင်း ဖွချင်သော်ငြားလည်း မဖွနိုင်ပါ။ မိန်းကလေးဆို အပေါင်းအသင်းလုပ်ဖို့ မပြောနဲ့ နှုတ်လည်းမဆက်၊ အသိအမှတ်တောင် မပြုတဲ့ အရှေ့အလယ်ပိုင်းက အာရပ်တွေအကြောင်းလည်း ဖွချင်သော်ငြားလည်း ဖွခွင့်မကြုံပါ။ သို့ပါသော်ငြား သိသလောက်လေး ဖွပါမည်။

ကားမောင်းလေ့ကျင့်ရင် လိုင်စင်ရှိပြီးသားတယောက် ပါရမှာမို့ဆူနမ်နဲ့ ရာမားက အကူအညီတောင်းတိုင်း အာရိယန်က Tomorrow လို့ ပြောလေ့ရှိပါတယ်။ Tomorrow မှာ သွားမေးရင် နောက်ထပ် Tomorrow လို့ ဆိုလေ့ရှိပါတယ်။ အာရိယန် အကူအညီတောင်းလို့ ဆူနမ်တို့က HyBee ကို ကားမောင်းပို့ပေးပါတယ်။ အာရိယန်ရှိနေတုန်း ကားမောင်း နာရီဝက်လောက် ကျင့်ချင်တယ်ဆိုတော့ သူမအားဘူးတဲ့။ ဆီဖြည့်တဲ့အချိန် ဆူနမ်က ရာမားကို ဘယ်လောက်ထည့်မှာလဲ နီပါလီစကားနဲ့ မေးပါတယ်။ အာရိယန်က သူ့ရှေ့မှာ နီပေါစကား မပြောပါနဲ့တဲ့။ အကူအညီလဲ ပေးရသေး အတော် လူပါးဝတဲ့ ဟာမလေး။

စိတ်ရင်းကောင်းတဲ့ ဆူနမ်ကတော့ အမှတ်မရှိ ခေါ်ပြောပေမဲ့ ရာမား၊ မိုင်း၊ စန်းထွန်းကတော့ မဖြစ်မနေမှသာ စကားပြောလေ့ရှိပြီး ခွာခွာလေး  နေတာပါ။ အုပ်စုထဲမှာ တခုခု အကူအညီတောင်းရင် Tomorrow လို့ ဟားလေ့ရှိပြီး ဆူနမ်နဲ့ ရာမား နီပါလီလို တွတ်ထိုးနေလို့ "If you speak Nepali in front of me, I will kill you." လို့စရင် အာရိယန်ရှေ့မှာတော့ ဘာမှမပြော ငြိမ်ကုပ်နေတဲ့ ဆူနမ်က "Get Out. Go to အာရိယန်." လို့ ပြန်ပက်လေ့ ရှိပါတယ်။ ဒီကတည်းက အာဖရိကမတွေဆို ဝှောင်ဝှောင်ရှေး။

MBA က အာဖရိကမတွေကတော့ ပဲကအပြည့်။ ရေလည်း အလွန်ချိုးပါတယ်။ နွေရာသီ တနင်္ဂနွေနေ့အပြင်ထွက်တဲ့နေ့မျိုးဆို ၃ခါလောက် ရေချိုးပါတယ်။ ခုလို အေးတဲ့ ဆောင်းမှာ ၃ရက်နေမှ ရေတခါချိုးဖြစ်ပေမဲ့ သူတို့ကတော့ နေ့တိုင်း ရေချိုးတာဗျား။ သူတို့တွေနားက ရေချိုးခန်းဆို အဲဗားဘီးစီးနေလို့ တခြားရေချိုးခန်းမှာ သွားချိုးရတယ်။ "ညစ်ပတ်တဲ့သူတွေသာ နေ့တိုင်း ရေချိုးဖို့လိုတာ။ သန့်တဲ့သူများဆို တပတ်နေမှ တခါပဲ ချိုးဖို့ လိုတယ်။ ဒီလောက် ရေချိုးတာတောင် အသားက ဖြူမလာဘူး"လို့ တပတ်မှတခါ ရေချိုးတဲ့ မိုင်းနဲ့ ရာမားက အတင်းဆိုပါတယ်။

အာဖရိကတွေက ဖော်ရွေပါတယ်။ တွေ့ရင် ပွေ့ဖက်ပြီး ပါးချင်းအပ်၊ ယောကျ်ားလေးဆိုရင် လက်သီးချင်းတိုက်၊ လက်ကမ်းပြီး နှုတ်ဆက်ကြတာပါ။ တခါက လက်ကမ်းပြီးနှုတ်ဆက်တဲ့ တန်ဇနီးယားက အစ်ဒီလက်ကို ဆွဲကိုင်နှုတ်ဆက်လိုက်ပါတယ်။ သူ့အရိုးပိန်ပိန်လေးတွေနဲ့ စန်းထွန်းလက်ကို ဖြစ်ညှစ်လိုက်တဲ့ သကာလ...

အား..လား..လား

နောင်များဆို အစ်ဒီနဲ့ တွေ့ရင် သူကလည်း လက်မကမ်းတော့သလို စန်းထွန်းကလည်း လက်ကလေးဝေ့ယမ်းပြီးပဲ နှုတ်ဆက်တော့ပါတယ်။ အာဖရိကတွေက အကဝါသနာပါကြပါတယ်။ ကတာများ တကိုယ်လုံး ကွေးနေအောင် ကကြသလို သူတို့ကတာလည်း  ကြည့်လို့ ကောင်းပါတယ်။

အရှေ့အလယ်ပိုင်း ဂျော်ဒန်၊ ကူဝိတ်၊ ဘာရိန်း၊ ယီမင်၊ အီရတ်၊ အီရန်၊ အီဂျစ်၊ ပါလက်စတိုင်းက ကောင်လေးတွေက အသားဝါဝါ၊ မျက်လုံး နက်နက်၊ မျက်ခုံး ကောင်းကောင်းနဲ့ ချောကြပါတယ်။ တချို့များဆို မျက်လုံးက စိမ်းဖန့်ဖန့်။ မေးခွန်းလည်း အရမ်းမေးကြသလို အငြင်းလည်း သန်ပါတယ်။ မှားတာကို ထောက်ပြရင် မကြိုက်တဲ့ မျက်နှာပေးနဲ့။ ယောကျ်ား၊ မိန်းမ ခွဲခြားမှု ပြင်းထန်တာမို့ မိန်းကလေးဆို အပေါင်းအသင်းလည်း မလုပ်၊ နှုတ်လည်းမဆက်၊ အသိအမှတ်လည်း မပြု၊ ကိုယ်တွေ ဖြတ်သွားရင်တောင် ပြောနေစ စကားကို လက်စသတ်ပြီး ကျောက်ရုပ်တွေလို သတိအနေအထား နေတာပါ။ ရာမန်ဒါဥပုဒ်လက မနက်ဆို ၅ နာရီမတိုင်ခင်ကတည်းက နေထွက်နေပြီး ည၉နာရီလောက်မှ နေဝင်တော့ နေထွက်ကနေ နေဝင်အထိ မစားရ၊ တံတွေးတောင် မျိုလို့မရတော့...

Algorithms သင်တဲ့ ပရက်ဖော်ဆာ ဒေါက်တာရူဘီက အရမ်းတော်ပါတယ်။ Algorithms ကောင်းမှ  Performance ကောင်းတာပါ။ A ကို ကျော်ပြီး AH (Honour) ရတဲ့  ယုလျံကျိုးကို ကျောင်းက Amazon နဲ့ ချိတ်ပေးပါတယ်။  WhiteBoard မှာ Algorithms ရေးပြီး တနေကုန် ရှင်းပြ၊ အင်တာဗျူး ၆ ခါတိတိ ဖြေပြီးချိန်မှာတော့ Amazon က အလုပ်ရသွားလို့ Seatle ကို သွားရတာပါ။  စန်းထွန်းကတော့ P=NP ဆိုတာ ခုထိ နားမလည်နိုင်သေးတာပါ။ ကိုယ့်ရှေ့မှာ ချထားတဲ့ နာမည်ဘုတ်လေးတွေကို ကျောင်းသားတွေက ကာတွန်းလက်စွမ်းပြလေ့ ရှိပါတယ်။

ကမ္ဘောဒီးယားက ဆမ်နမ်ချန်ကတော့ Water the root, Enjoy the fruits. တဲ့

အီရတ်က ဖီရက်ကတော့ Algorithms ဆိုတာ နံရံပေါ်ကို မရမက ကုတ်ဖက်တက်နေရသလိုပါပဲတဲ့။ ထောင့်စွန်းနားက ကာတွန်းတွေကတော့ စန်းထွန်းလက်ရာပါ။

TM စတင်တည်ထောင်တဲ့ မဟာရီချီယောဂီပုံကို လက်စွမ်းပြထားတဲ့ ရာမား။

Distributed Computing (Web Application Architecture) သင်တာ ပရော်ဖက်ဆာ နာဂျစ်နာဂျစ် အီရတ်ကပါ။ လွန်ခဲ့သော ၃နှစ်လောက်က နာဂျစ်လည်း စန်းထွန်းတို့လို ကျောင်းသားပါ။ ဘာသာတိုင်းမှာ A ရလို့ ကျောင်းက Offer ပေးပြီး ဆရာခန့်ထားတာပါ။ Course မစခင် Welcome အီးမေးလ်နဲ့ Course အကြောင်း အသိပေးတတ်ပါတယ်။ ကျောင်းသားတယောက်ချင်းစီရဲ့ နာမည်ကို သိတာမို့ နာဂျစ်အတန်းမှာတော့ နာမည်ဘုတ်ကလေးတွေ မရှိပါဘူး။ အိပ်ချင်စိတ်များဟာ သူ့အသံကျယ်ကြီးကို ကြားလိုက်ရရင် ပျောက်ချင်းမလှပျောက်။ သူစာသင်ချိန်နေချိန်မှာ ကြိုက်တာလုပ်လို့ရပေမဲ့ ကြွက်နဲ့ မတည့်တဲ့ ဆရာက မောက်ကလစ်သံကိုတော့ လုံးဝခွင့်မပြုတာပါ။ မောက်ကလစ်နေတဲ့ ကျောင်းသားရဲ့ မောက်ကို ဆွဲဖြ ုတ်တာပါ။

မေးခွန်းမေးတိုင်း ကန်ဒီတွေ ပစ်ပေးတတ်ပါတယ်။ မေးခွန်းမမေးရ မနေနိုင်တဲ့ ပါကစ္စတန်အီဂျက်၊ အာနက် ၊ ဂျော်ဒန်ရမ်မီတို့ကတော့ တနေ့ကို ကန်ဒီ ၅ ခုလောက် ရတာပါ။ ဘေးမှာ ထိုင်တဲ့အီဂျက် က Course သာ ပြီးသွားရော မေးခွန်းမမေးလို့ကန်ဒီတခါမှ မရဖူးတဲ့ စန်းထွန်းကို ကန်ဒီတွေ ဝေလေ့ရှိပါတယ်။

မနက်တိုင်း Quizz တွေ ဖြေရပြီး အဖြေတွေကို ရှင်းပြတတ်ပါတယ်။ နားလည်သွားအောင် တကယ်သင်တာပါ။ တတ်ပြီးသားကျောင်းသားတွေက ပညာစမ်းလေ့ရှိသလို ဆရာနဲ့ ကျောင်းသား ပညာပြိုင်ကြတာလည်း ရှိပါတယ်။ တခါတလေများ အတန်းပြီးသွားရင် ဆရာ့အခန်းမှာ သွားငြင်းကြပါသေးတယ်။ ကျောင်းသားတွေကို တကယ်တတ်စေချင်တာပါ။ မေးခွန်းချင်းတူပေမဲ့ အတွေ့အကြုံ၊ ညဏ်ပညာပေါ် မူတည်ပြီး Grade လည်း ကွာပါတယ်။ အမှတ်ပေးပုံက Labs 10 ၊ Quizz 5 ၊ Etiquette (attendance & dress) 5 ၊ Midterm Programming 20 ၊ Midterm paper 20 ၊ Final Programming 20 ၊ Final paper 20 ။ ကျောင်းသားဆီက သင်ယူနေသလို တခုခု သိရရင်လည်း ဘယ်ကျောင်းသားဆီက သိရတာလို့ ရှယ်တတ်ပါသေးတယ်။

တော်တဲ့ ကျောင်းသား၂ယောက်ကို TA (Teaching Assistant) ခန့်ထားပြီး Homework တွေ၊ ကျောင်းသားတွေရဲ့ ပြသနာတွေ၊ နားမလည်တာတွေကို TA တွေက ဖြေရှင်းပေးရပါတယ်။ အတန်းတက်နောက်ကျတဲ့ ကျောင်းသား၊ Formal မဝတ်တဲ့ ကျောင်းသားဆို စာမေးပွဲမှာ A ရပေမဲ့ A မပေးပါဘူး။ Final exam တုန်းက မနက် ၉ ၄၅ ကတည်းက ဖြေလိုက်တာ ၁ နာရီသာ ထိုးရော မမှန်သေးပါဘူး။ ဆရာကို ပြလို့ ဆရာက ကျေနပ်ရင် သွားတော့လို့ ပြောပါတယ်။ စန်းထွန်းတို့ကိုတော့ သွားလို့ ခွင့်မပြုပါဘူး။ ရအောင်လုပ်တဲ့။ ညနေ၄ နာရီ ထိုးချိန်မှာတော့ ပြီးသမျှ ပြ၊ မပြီးသေးတဲ့ အပိုင်းကို ဘယ်လိုဖြေရှင်းရမလဲ ဆိုတဲ့ အိုင်ဒီယာ ပြောရပါတယ်။ ညကျရင် အီးမေးလ် ပို့လိုက်မယ်။ အီးမေးလ်ပေါ် မူတည်ပြီး မနက်ဖြန် ရေးဖြေစာမေးပွဲ လာဖြေရမယ်တဲ့။

နေ့လည်စာလည်းလွတ်ရုံမက B- ရနေလို့ မနက်ဖြန် ရေးဖြေစာမေးပွဲဖြေရမှာ သေချာသလောက်ပါပဲ။ ပင်ပန်းလွန်းလို့ ကျောင်းကိုမုန်း၊ အမေရိကားဆိုတာကြီးကိုလည်း မုန်းမိပါတယ်။ စလုံးမှာ နေတာအကောင်းသား။ ဘာလို့များ ဒီမှာ ဒုက္ခလာရှာတာပါလိမ့်။ သူငယ်ချင်းမရှိ၊ ရာသီဥတုက အေး၊ အစားအသောက်က မကောင်း။ မုန်းတယ်၊ မုန်းတယ်၊ အားလုံးကို မုန်းတယ်။

ည ၁၁နာရီမှာ နာဂျစ်ဆီက အီးမေးလ် လာပါတယ်။ ဘီရတယ်။ နက်ဖြန် စာမေးပွဲ လာဖြေစရာမလိုပါ။ အမှတ်ထပ်လိုချင်ရင်တော့ လာဖြေလို့ရပါတယ်တဲ့။ ရေးဖြေစာမေးပွဲပြီး နေ့လည်မှာတော့ Pizza Ranch မှာ မိတ်ဆုံစားပွဲ ရှိပါတယ်။ ဆရာ၊ တပည့်ကျောင်းသားတွေ တပျော်တပါး ဆင်နွှဲကြပါတယ်။ ကျောင်းသားတွေက ဆရာ့ကို ကျေးဇူးတင်သလို ဆရာကလည်း ဒီလိုမျိုး ကျောင်းသားတွေကို အမှတ်ရမှာပါ။ ပင်ပန်းသလောက် ပညာတွေ တိုးသလို ဒီလိုဆရာမျိုးနဲ့ဆို နောက်ထပ် ဘာသာတွေ သင်ချင်ပါသေးတယ်။

‌ကောလင်းကို ဝိုင်းသမနေကြစဉ်

Question Machine အာနက်ကို Teaching Machine နာဂျစ်က အချိုပွဲ ကျွှေးနေစဉ်

ပထမဆုံးအကြိမ် ကားမောင်းလိုင်စင်သွားဖြေတဲ့ စန်းထွန်းတယောက် အမြင်စစ်တော့ ဝါးနေပါတယ်။ ကဏ္ဏန်းတွေကို ပြူးပြဲကြည့် ဘေးမှာ လင်းတဲ့ Flash တွေကို မှန်အောင်ဖြေ။ လိုင်စင်ပလိတ်ပြားက ရှေ့နောက်မှားတပ်ထားလို့ ဖြုတ်ပြီး ပြန်တပ်၊ ကားအာမခံစာရွက်တောင်းလို့ အံဆွဲထဲကနေ ထွက်လာတာက ဂင်္ဂါ့စီဗွီ၊ ဆူနမ်တို့ အရင်အာမခံစာရွက်၊ အတင်းဖြဲရှာလို့ နောက်ဆုံးမှ ထွက်လာတာက အာမခံစာရွက်။ လိုင်စင်စစ်တဲ့ အန်တီကြီးက အံဆွဲရှင်းသင့်တယ်၊ မဆိုင်တာတွေ မထားသင့်ဘူးတဲ့။ စထွက်တော့ ညာကို ဆုတ်ချင်ရင် ဘယ်ကို စစ်ကနယ်ပြပြီး ဘယ်ကို စတီရင်ယာတိုင် ကွေ့ရမဲ့အစား ညာကို စစ်ကနယ်ပြပြီး ညာဖက်ကို စတီရင်ယာတိုင်ကွေ့တော့ အန်တီကြီးခမျာ လန့်ပြီး စတီရင်ယာတိုင်ကို ကူကွေ့ပေးပါတယ်။

လမ်းသွယ်ကနေ လမ်းမကြီးကို အတက် လုံးဝဘရိတ်အုပ်ပြီး လမ်းမကြီးက ကားကို စောင့်ပါတယ်။ ကားလုံးဝဘရိတ်မအုပ်ဘဲ အရှိန်လျှော့ပြီး လမ်းမကြီးက ကားတွေကို စောင့်တဲ့ အမ်းထရူး အဘမ်းခံရတယ်လို့ ဂင်္ဂါသင်တုန်းက ပြောထားတာကိုး။ အန်တီကြီးက Emergency Brake On နေလို့တဲ့။ Jefferson Building ကြီးကို တပတ်ပတ်ပြီး ပြန်လာချိန်မှာတော့ ၃ ပတ် ဘမ်းလိုက်ပါတယ်။ လိုင်စင်ဖြေဖို့ အဆင့်သင့် မဖြစ်သေးဘူး ၃ ပတ် ကျင့်ပြီးမှ ပြန်လာခဲ့တဲ့။

Rui ကတော့ ၃၀ စက္ကန့်အတွင်းမှာ တလ ဘမ်းခံလိုက်ရပါတယ်။ ကားစက်နှိုးပြီး နောက်ဆုတ်ချင်ရင် Reverse ဂီယာထိုးရမဲ့ အစား Drive ဂီယာထိုးလိုက်လို့ပါ။ Building တပတ်လေးတောင် မမောင်းလိုက်ရဘူး။  ၃ပတ် ဘမ်းခံရတဲ့သူ၊ ၁လ ဘမ်းခံရတဲ့သူ၊ ၂လ ဘမ်းခံရသူ၊ လိုင်စင်စစ်သူက ညာကွေ့လို့ ပြောပေမဲ့ ဘယ်ကွေ့လိုက်ပေမဲ့ တခါတည်းနဲ့ လိုင်စင်ရသွားတဲ့သူတွေနဲ့လိုင်စင်လောကရဲ့ သောင်းပြောင်းထွေလာတွေကတော့ ပြောလို့မကုန်နိုင်အောင်ပါပဲ။

၃ပတ် အဘမ်းခံရတဲ့ စန်းထွန်းကို နောက်နေ့မနက်စောစော SMS ပို့ပြီး ကွန်ဂရက်ကျူလေးရှင်းလုပ်လာတာက မိုင်း။ "Congratulations San San for banning 3 weeks." တဲ့။ Credit Card Reject ဖြစ်တဲ့ ဆူနမ်ကို စန်းထွန်းကလည်း "Congratulations Sunam for being rejected ur credit card." ဆိုတော့ ဆူနမ်က "San San, are u my true friend?" လို့ မေးပါတယ်။

ဟုတ်ကဲ့ ခင်ည ဂုဏ်ပြုထိုက်သည်များကို ဂုဏ်ပြုပါမှ သူငယ်ချင်းစစ်စစ် မည်ပါသည်...

စန်းထွန်း
နိုဝင်ဘာ ၅၊ ၂၀၁၁။