တူတော်မောင် - ၂

တူတော်မောင် ဖုန်းသန့်ခေါင် (ခေါ်) အဲလက်စ်က တီချယ်စုသင်တန်းမှာ တက်နေတာ ၂ နှစ်ရှိပြီ။ မနှစ်က Starter အတန်းမှာ Speaking Project ရှိပေမဲ့ တခါမှမပါဘူး။ ဒီနှစ်တော့ Mover33 အတန်းရဲ့ Speaking Project မှာ ပထမဆုံးပါတာနဲ့ ဆုရတော့တာပဲ။ တူတော်မောင်က အင်္ဂလိပ်လိုတော်တော် နားလည်တယ်။ ဆရာမပြောတာ အကုန်နားလည်ပေမဲ့ အပြောမသွက်၊ နားမထောင် သူချည်းပြောနေလို့ အပြောနဲ့နားထောင်တာမှာ အမှတ်လျော့တယ်။ ကျောင်းတောင်မတက်ရသေးဘူး တော်တော်တတ်နေပြီ ကိုယ်တွေအထက်တန်း နီးပါးလောက်တတ်တယ်။ ကြီးတော်တွေက ဘိုလိုမှုတ်၊ တီဗွီ၊ ယူကျူ၊ ဂိမ်းမှာလည်းသင်။ Speaking Project မှာပါဖို့ အမေတွေက တော်တော်လုပ်ပေးရတာပဲ။ စာကိုအလွတ်ကျက်ပြီး ရွတ်သလိုဖြစ်နေပေမဲ့ ပထမဆုံးပရောဂျက်မှာ ဆုရတယ်ဆိုတော့ တော်ပါပေတယ်။ သူ့ကိုကြည့်ရင်း ပြုံးနေမိတော့တာ။ ၂ နာရီ မနားတမ်းတရစပ်ပြောနိုင်တဲ့ကလေး။ မကြီးက သူပျော်ပါစေဆိုပြီး ယူကျူမှာအမှတ်တရ တင်ပေးထားတယ်။ ကြီးကြီးယူကျူချန်နယ်ကို like & subscribe လုပ်ပေးပါလားပြောတော့ ဒင်းကလေးက သူကကြိုက်မှ like & subscribe လုပ်မှာတဲ့။ ကိုယ့်ကြီးကြီးပေမဲ့ မကြိုက်ရင် like & subscribe မလုပ်နိုင်ဘူးဆိုတဲ့သဘော။ ဟိုတနေ့ကလည်း ဖုန်းချချင်ရင် မျက်နှာလေးလာပြဆိုတာကို လာမပြနိုင်ဘူး ကြီးကြီးက ဘာလို့ သားပြောတာကို နားမထောင်ရတာလဲတဲ့။ ကြီးတော်ကြီးစကားတွေကို ပြန်အသုံးချနေတာ။ သူ့ကို စမ်းနဲ့မပြောပါနဲ့ မကြိုက်ဘူးတဲ့။ ခုခေတ်ကလေးတွေက ဘာမကြိုက်မှန်း သူတို့လိုချင်တာ ဖြစ်ချင်တာကို အသေအချာသိတယ်။ ကိုင်း တူတော်မောင်ရဲ့ My Dream House ကို ကြည့်လိုက်ရအောင်။

စန်းထွန်း
ဇန်နဝါရီ ၁၈၊ ၂၀၂၂။