၂၀၂၄ ရေခြားမြေခြား ခရီးသွား - ၁၀

မကြီးက အလေးမခိုင်းလို့ အမေ အလေးမတယ်။ နေ့လည် ၂ နာရီကနေ ၃ နာရီအထိ ကိုယ့်အခန်းထဲ နေရောင်ခြည်ရလို့ အပင်တွေကို နေပြတယ်။ အပင်လည်းပျော် ကိုယ်လည်းပျော်။

စန်းထွန်း

မေ ၂၉၊ ၂၀၂၄။

ဒူးရင်းသီးစားခြင်း အနုပညာ

ဒူးရင်းသီးစားတိုင်း အဲ့ဒီအကြောင်းတွေးမိတယ် တွေးမိတိုင်းလည်း ပြုံးမိတယ်။ ၁၉၉၉ - ၂၀၀၀ ဆရာကြီးဦးမြကြိုင် အင်္ဂလိပ်စာသင်တန်းတက်တုန်းက သီရိမင်္ဂလာစျေးမှာ ဒူးရင်းသီးသွားဝယ်စားကြတယ်။ နေ့လည်ဆရာ့သင်တန်းမှာ တယောက်ကခေါင်းတွေမူး သွေးတွေတက်လို့ ဘေးကလူတွေက လက်တွေချိုး ယက်ခက် ရေတိုက် ရှုဗူးတိုက်။ ဆရာက သံပုရာစေ့လာယူခိုင်းပြီး စားခိုင်းတော့မှ သက်သာသွားတယ်။ တော်သေးတယ် ဒူးရင်းသီးပဲစားလို့ သူကြိုက်တဲ့ ဒညင်းသီးအုန်းနို့ဆမ်းပါ စားလိုက်ရင် ဆေးရုံရောက်သွားမလား မသိဘူး။ အဲ့ဒီကတည်းက ဒူးရင်းသီးစားဖို့ လန့်သွားတာ စလုံးရောက်မှပဲ စားဖြစ်တော့တယ်။ သင်တန်းမှာ ကိုယ်တို့အဖွဲ့ကို လူတိုင်းသိတယ် စာကြိုးစားလို့မဟုတ်ဘူး။ အတန်းလစ်ရင် ဆယ်ခုံလောက်ကွင်းကွင်းကြီး ဖြစ်နေတော့ ကိုယ်တွေအတန်းလစ်တာ သိသာတယ်။ ကိုယ်တို့အဖွဲ့ထဲကောင်မလေးကို လာကြောင်တဲ့စီနီယာတွေကို ခက်တာတွေမေး။ ဗရုတ်သုတ်ခလုပ် တချိန်လုံးစားရင်စား မစားရင်စကားများနေလို့။ သူငယ်ချင်းရဲ့အကိုက နင်တို့တွေ ဆိတ်တွေကျနေတာပဲ။ စားရင်းစား မစားရင်စကားပြော ဆိတ်တွေလို တချိန်လုံးပါးစပ်လှုပ်နေလို့တဲ့။ တယောက်နဲ့တယောက် စိတ်နေစိတ်ထား အမူအကျင့်တွေ မတူကြပေမဲ့ ခုထိပေါင်းနေကြတုန်း။ ဝေးနေပေမဲ့ ရင်ဘတ်ခြင်း နီးနေကြတုန်း။ 

P.S ၁၉၉၉ - ၂၀၀၀ ဖုန်းလူတိုင်းမှာမရှိ ဓာတ်ပုံရိုက်မယ်ဆိုရင် ရန်ကုန်တက္ကသိုလ်ဝင်းထဲက မြဝတီကျော်ဝင်းတို့ဆီမှာ သွားရိုက်ရတယ်။

စန်းထွန်း

မေ ၂၅၊ ၂၀၂၄။

ဒူးရင်းသီး စားကြသူများ

နွေဦးတော်လှန်ရေး - ၃၉

၂၀၂၄ မေ ၁၁ ရက် စနေနေ့ စိန့်ဂျိမ်းဘုရားကျောင်းမှာ ရန်ပုံငွေအတွက် မုန့်ဖက်ထုပ်သွားရောင်းတယ်။ အမေလုပ်တာ ကိုယ်ကနှမ်းဖြူး ရောင်းပေးတာ။ မခိုင်က အမေ့အတွက် ပေးလိုက်တဲ့ ထိုင်းကအင်္ကီျက သေးနေလို့ ကိုယ့်အတွက်ဖြစ်သွားတယ်။ ထမီကတော့ ဖြိုးပေးထားတာ အတော်ကြာပြီ။ ၂၀၁၇ လောက်ကတည်းက အဖေတို့နဲ့ ထည့်ပေးလိုက်တာ ခုမှပဲ ဝတ်ဖြစ်တော့တယ်။ ညီမတယောက်က ညီမပေးထားတဲ့ ကျောက်စိမ်းဆွဲကြိုးလေးနဲ့ဆို အလိုက်ပဲတဲ့။ ဟုတ်ပါ့ သူပေးထားတဲ့ ကျောက်စိမ်းဆွဲကြိုးလေးကို မေ့နေတာ။ နောက်ဝတ်မယ်လို့ ပြောလိုက်ပေမဲ့ အိမ်အပြောင်းအရွှေ့မှာ ဘယ်အိတ်ထဲထားလိုက်မှန်း မသိတော့ဘူး။ သူများကိုပေးလိုက်တာလား၊ လွှင့်ပစ်လိုက်လား၊ အသိမ်းလွန်နေတာလား မမှတ်မိတော့ဘူး ဆောရီးပါညီမရေ။ အအရင်အိမ်ရှင်နဲ့တွေ့တော့ နင်တော်တော်ဝလာတယ်တဲ့။ ၁၅ ပေါင်တက်နေလို့ intermittent fasting နဲ့ဝိတ်ချနေတယ်။ မနက်စာ ဘလက်ကော်ဖီကို ghee ၊ collagen powder နဲ့သောက်တယ်။ နေ့လည်စာ ၁၂ နာရီ ညစာ ည ၆ နာရီ စားတယ်။ ကြိုက်သလောက် စားချင်တာစား နေ့လည်စာနဲ့ ညစာကြား ဘာမှမစားရဘူး no snack, juice, fruit, solid food။ အရင်တုန်းက တချိန်လုံးစားနေလို့ ဗိုက်ကလုံးဝမဆာဘူး။ ခုတော့ နေ့လည် ၁၁ ခွဲနဲ့ ည ၅ နာရီခွဲဆို ဆာတယ်။ ၁၅ ရက်နဲ့ ဗိုက်နည်းနည်းလေး ကျလာတယ် ဝိတ်ကတော့ လုံးဝမကျသေးဘူး။ ဒါပေမဲ့ နေလို့ကောင်းတယ်။ မနက်တိုင်း နာရီဝက် တပတ် ၅ ရက် လေ့ကျင့်ခန်းလုပ်တယ်။

စန်းထွန်း

မေ ၂၂၊ ၂၀၂၄။

၂၀၂၄ ရေခြားမြေခြား ခရီးသွား - ၉

၂၀၂၄ ဧပြီ ၂၁ တနင်္ဂနွေနေ့ ပန်ဆယ်ဗေးနီးယားပြည်နယ် Bethlehem မြို့ ပါချုပ်ကျောင်း နှစ်စဥ်ကျင်းပနေကျ သက်ကြီးပူဇော်ပွဲသွားတယ်။ အသက် ၆၅ နှစ်အထက် သက်ကြီးကန်တော့ခံစာရင်းမှာပါပြီး မနှစ်ကလက်ဆောင်ပစ္စည်းတွေ အများကြီးရတော့ သွားဖို့တက်ကြွနေတယ်။ အိမ်ကနေ Penn Station အထိ မိနစ် ၄၀ မြေအောက်ရထားစီး။ New York Penn Station ကနေ New Jersey Edison ဘူတာအထိ NJ Transit ရထား တနာရီစီး။ Edisonကနေ မမီးတို့ကားနဲ့ နောက်ထပ်တနာရီလောက်စီး။ အသွား ၃ နာရီ အပြန် ၃ နာရီပင်ပန်းတယ်။ ၂၀၂၄ ဧပီ ၂၇ စနေနေ့ ပီတိလူကြီးဂေဟာကနေ နယူးဂျာစီပြည်နယ်က အမေရိကန်မှာ အကြီးဆုံးဟိန္ဒူဘုရားကျောင်း BAPS Swaminarayan Akshardham နဲ့ ဟော်လန်ကျူးလစ်ပန်းခြံဆီ တယောက် ၄၅ ကျပ်နဲ့ ပို့ပေးတယ်။ အဖေတို့ကတော့ မနက် ၇ နာရီခွဲလောက်ကတည်းက ထမင်းချိုင့်နဲ့ ထွက်သွားလိုက်တာ အိမ်ကိုညနေ ၅ နာရီကျော်မှ ပြန်ရောက်တယ်။ အထက်တန်းကျောင်းသားလေးတွေ လေ့လာရေးခရီးထွက်တာ ကျနေတာပဲ။ ကိုယ်တို့နေကြာပန်းနဲ့ရိုက်ချင်တဲ့နေရာက ဟော်လန်လယ်တောပဲ။ အများသုံးသယ်ယူပို့ဆောင်ရေးမရှိ ကိုယ်ပိုင်ကားနဲ့မှ သွားဖို့အဆင်ပြေတာမို့လို့ sunflower tour ရှာနေတာ သိပ်မတွေ့ဘူး။ တွေ့ပြန်တော့လည်း ပြီးသွားပြီ။ ကျူးလစ်ပန်းတွေ တအားလှတယ်။ မကြီးက အလေးမခိုင်းလို့ အမေက မနေတာ။ နေ့လည် ၂ နာရီနေရာင်ရရင် အပင်လေးတွေ နေရောင်ပြတယ်။

တူတော်မောင် - ၁၄

ဆုရလို့ ဘေးအိမ်က တသောင်းဆုချတယ်၊ နာရီလက်ဆောင်ပေးတယ်။ ကြီးကြီးတို့က ဘာဆုချရမလဲမေးတော့ စာအုပ်ဖိုးပဲပေးပါတဲ့။ အတန်းကြီးလာလို့ စာများလာပြီ ခက်လာပြီတဲ့။ ကားမောင်းတဲ့ဂိမ်းဆော့တဲ့အခါ ကြီးတော်က ကျော်ပစ်၊ တိုက်ပစ်၊ စျေးအကြီးဆုံးကားဝယ်ပစ်လို့ မြှောင့်ပစ်လိုက်သေးတယ်။

စန်းထွန်း

မေ ၁၅၊ ၂၀၂၄။

နွေဦးတော်လှန်ရေး - ၃၈

PRF မန်ဘာ ၂ နှစ်ဆက်တိုက် ထောက်ပို့ခဲ့တဲ့အတွက် ကိုပေါ်ရဲ့ပန်းချီကားလေးကို MOD ကပို့ပေးလာပါတယ်။ ၂၀၂၄ မတ် ၁၆ စနေနေ့ စိန့်ဂျိမ်းဘုရားရှိခိုးကျောင်းမှာလုပ်တဲ့ စျေးရောင်းပွဲတော်မှာ PRF အတွက် ထောက်ပို့ငွေသွားကောက်တယ်။ ၂၀၂၄ ဧပြီ ၁၄ တနင်္ဂနွေနေ့ အွတ်ပီကအကိုကြီးလာလို့ ကွင်းကယိုးဒယားဆိုင်မှာ စားသောက်စကားပြောလိုက်ကြတာ ဆိုင်ပိတ်မှပဲ ပြန်တော့တယ်။ ၂၀၂၄ ဧပြီ ၂၇ စနေနေ့ တိုင်းစကွဲမှာ ဆန္ဒပြပွဲလုပ်တယ်။ အဲ့ဒီမှာလူတွေဆုံကြပြီး နယူးဂျာစီကအကိုအိမ်မှာ စားသောက်စကားပြောကြတာ မနက်၁နာရီမှ အိမ်ပြန်ရောက်တယ်။ အပြင်မှာတခါမှ မဆုံဘူးပေမဲ့ ယုံကြည်ချက်၊ ရည်မှန်းချက်တူတဲ့သူတွေမို့လို စိတ်ထဲရင်းရင်းနှီးနှီးပဲ။

အရေးတော်ပုံ အောင်ရမည် !

စန်းထွန်း

မေ ၁၁၊ ၂၀၂၄။

၂၀၂၄ ရေခြားမြေခြား ခရီးသွား - ၈

၂၀၂၄ ဧပြီ ၁၄ တနင်္ဂနွေနေ့ မန်ဟက်တန်နဲ့ ကွင်းကြားက Roosevelt Island ဆီသွားလည်တယ်။ ကွင်းကနေ F ရထားစီး Roosevelt Island မှတ်တိုင်မှာစီး။ ချယ်ရီပင်တချို့က ကြွေနေပြီ တချိူ့ချယ်ရီပင်မျိုးတွေက ခုမှဖူးနေတုန်း။ လမ်းလျှောက်နေရင်း မိုးရွာလာလို့ ကေဘယ်ကားဆီးပြီး မက်ဟန်တန်စီသွားတယ်။ ကေဘယ်ကားတစီး လူ ၃၀- ၄၀ လောက်ဆန့်တယ်။ ကျွှန်းဆီပြန်သွားမလားမေးတော့ ပိုက်ဆံထပ်ကုန်မယ်။ ဒီနားမှာပဲ လမ်းလျှောက်မယ်ဆိုပြီး ရှာကြည့်လိုက်တော့ အနီးအနားမှာ Central Park ရှိတယ်။ Central Park မသွားဘူး Roosevelt Island သွားမယ်ဆိုပြီး Central Park ပြန်ရောက်သွားမယ်။ မနေ့က လမ်းလျှောက်ထားတာ ပင်ပန်းနေတယ် လမ်းသိပ်မလျှောက်ဘူးနော်ဆိုပြီး အိမ်သာရှာရင်းနဲ့ ၄ မိုင်လောက် လျှောက်ဖြစ်သွားတယ်။ Long Island က Greek Catholic School ကျောင်းသားတွေ ဂရိအလံလေးတွေကိုင်ပြီး ချီတက်ပွဲလုပ်ဖို့ ပြင်နေကြတယ်။ ပန်းရောင်စုံဖူးပွင့်တဲ့ နွေဦးဟာ သိပ်လှတယ်။

စန်းထွန်း

မေ ၈၊ ၂၀၂၄။

၂၀၂၄ ရေခြားမြေခြား ခရီးသွား - ၇

၂၀၂၄ ဧပြီ ၇ တနင်္ဂနွေ Central Park မှာ ချယ်ရီပင်တွေ သွားကြည့်တယ်။ မနှစ်က ဝိုင်းနဲ့သွားကြည့်ခဲ့တာလို့ အဖေနဲ့အမေက သတိတရပြောနေကြတယ်။

စန်းထွန်း

မေ ၄၊ ၂၀၂၄။