Sayōnara 2012 (Tag)



2012 White House Xmas card by Iowa Artist
Features Bo ( President Obama's dog) and No Christmas Tree
credit to www.whitehouse.gov



အရှုပ်တွေလုပ်ရင်း ဘလော့နဲ့ကင်းကွာနေတာ တစ်လကျော်နေပါပြီ။ နှစ်သစ်ဆုတောင်းပို့စ်လေး ရေးဖို့ကြံစည်နေတုန်း ပစ်ပစ်က သတိတရ တဂ်လာတော့ အတော်ဖြစ်သွားတယ်။ တစ်နှစ်ဆိုတာလည်း ခဏလေး..အချိန်ကုန်တာ မြန်လိုက်တာ။ ၂၀၁၂ မှာ သူငယ်ချင်းတွေ၊ ဆရာတွေရဲ့ ချစ်ခင်ရင်းနှီးမှုတွေ၊ ကူညီစောင့်ရှောက်မှုတွေနဲ့ လုံခြုံနွေးထွေးတယ့် မြို့ငယ်လေးကနေ ခွဲခွာခဲ့ဖူးတယ်။ သူစိမ်းသက်သက် မြို့လေးနဲ့ ရင်းနှီးကျွှမ်းဝင်အောင် ကြိုးစားရင်း နေရာအသစ်၊ အလုပ်အသစ်၊ လူအသစ်တွေနဲ့ နေသားကျကာ အဲဒီမြို့လေးကို နှစ်သက်နေပြန်တယ်။

အင်ဂျင်နီယာတွေ သုံးတယ့် VBA ဆိုတယ့် Excel Programming ၊ HRSG ( Heat Recovery Steam Generator) ရဲ့ Steam ၊ Drum ၊ Valve ၊ Pipe ဆိုတယ့် အသုံးအနှုန်းတွေနဲ့ လုပ်ငန်းသဘောကို နားလည်အောင် ကြိုးစားရင်း ကွန်ပျူတာပရိုဂရမ်မာ၊ ဆော့ဝဲလ်အင်ဂျင်နီယာမဟုတ်တယ့် Thermal  ၊Structural အင်ဂျင်နီယာတွေ ရေးချင်သလို ရေးထားတယ့် ဆော့ဝဲလ်တွေရဲ့အမှား (bug) တွေကို သပွတ်အူ ဖြေရသလို ရှင်းရတာ စိတ်ညစ်ဖို့လည်းကောင်း၊ ဖြေရှင်းနိုင်ရင် ပါးစပ်နားရွက် ချိတ်နေပြန်ရော။ အဲဒီအကြောင်း အမှောင်ခွင်းကြသူများ ဆိုတယ့် ပို့စ်လေးတစ်ပုဒ် ရေးခဲ့ဖူးတယ်။
credit to http://www.huffingtonpost.com

ဒီနိုင်ငံရဲ့ လေယူလေသိမ်း၊ ဓလေ့ထုံးစံတွေကို သင်ယူလေ့လာနေရဆဲ။ တော်နေဒိုးသတိပေးချက် Live ကို ကြည့်ရင် ကောင်တီဆိုတယ့် အသံ အမြဲကြားရပါတယ်။ လေးလပတ် ကုမ္ပဏီအစည်းအဝေးမှာ စီအီးအို Steve က ဘယောင်းကောင်တီလို့ ပြောသွားတာ ကြားရပြန်တော့ စီနီယာ ဝီလီယမ်ဂရင်းကို မေးရပြန်တယ်။ ကန်တက်ကီ ပြည်နယ်မှာ  ကောင်တီတွေ အများကြီးရှိပြီး လူဝီဗီလ်မြို့က ဂျက်ဖာဆန်ကောင်တီ ( County ) မှာ ပါဝင်ပါသတယ့်။ ကောင်တီဆိုတာ မြို့နယ်နဲ့ ဆင်တယ်။ ၁၀၀ ဒေါ်လာဆိုရင်  100 bucks လို့ ပြောပါတယ်။ ခုတော့ စန်းထွန်းတယောက် Ok lah ၊  Never mind lah ၊ Faster lah ၊  Don't play play ၊ အားရို ၊ Can or Can not ၊ What lao ၊ အလားမ စလုံးလေသံကနေ Oh My Gosh ၊  How are you doing today ၊ How are you ၊ I appreciate your help ၊ Appreciated ၊ Oh yeah ၊ It sounds good ၊ Have a great day ၊ Have a good night လို့ နှုတ်ဆက်တတ်နေပါပြီ။

ချိုလွန်း၊ ငန်လွန်းတယ့် အမေရိကန်စာတွေကို မစားနိုင်လို့ ချက်ပြုတ်ရင်း အရင်ကထက် အချက်အပြုတ် နည်းနည်း တိုးတက်လာတယ်။ ကန်တက်ရဲ့ ကားကို ပွတ်မိသွားတာ လျော်ကြေးတော်တော်ပေးလိုက်ရလို့  အရင်ကထက် ကားမောင်းတာ သတိထားလာတယ်။ ဂျူလိုင်လမှာ ဘော့စတွန် (မက်ဆာချူးဆက်ပြည်နယ်) ၊  စက်တင်ဘာလမှာ အမေစု ကြိုဆိုဖို့ ဖို့ဝိန်း (အင်ဒီယားနားပြည်နယ်)၊ တလတခေါက် စင်စင်နာတီ (အိုဟိုင်းရိုးပြည်နယ်) နဲ့ ဒီနှစ်အတွင်း ခရီးတွေ ထွက်ဖြစ်ပါတယ်။ အပတ်စဉ် တင်ရတယ့် အဆိုင်းမန့်တွေရယ်၊ တစ်လခွဲ တစ်ကြိမ် ဖြေရတယ့် စာမေးပွဲတွေမှာ အောင်တာလည်း ရှိသလို ကျတာတွေလည်း ရှိရဲ့။ နောက်ဘာသာတွေမှာ အမှတ်ကောင်းအောင်လုပ်မယ်လို့ ကြုံးဝါးပေမယ့်လည်း ဒုံးရင်းက ဒုံးရင်း ပတ်ချာလည် လိုက်နေတာပါပဲ။

နိုဝင်ဘာလအကုန်မှာ နှလုံးသွေးကြောကျဉ်းလို့ အဖေ ရန်ကုန်ဆေးရုံကြီး တက်ရပါတယ်။ လူနာအတွက်တောင် အိပ်စရာမရှိလို့ ခုံတွေကို ဆက်ပြီး အိပ်ရပါတယ်။ နှလုံးသွေးကြောကျဉ်းတာ စစ်တယ့်စက်က ရန်ကုန်ဆေးရုံကြီးရယ်၊ ပန်းလှိုင်ဆေးရုံမှာပဲ ရှိပါတယ်။ ရန်ကုန်ဆေးရုံကြီးမှာ ခွဲစိတ်ဖို့ ဆိုရင် တလလောက် စောင့်ရမှာရယ်၊ လူနာအတွက် ခုတင်တောင် မရှိတယ့် ရန်ကုန်ဆေးရုံကြီးကို စိတ်ကုန်၊ တနေ့သွားပြတာ တစ်သိန်းကုန်တယ့် ဈေးကြီးတယ့် ပန်းလှိုင်ဆေးရုံကြီးထက် သက်သာတယ့် ဘန်ကောက်မှာ သွားခွဲပါတယ်။

credit to www.huffingtonpost.com

မြန်မာတွေ တော်တော်များများ ဆေးလာကုကြပါတယ်။ ပုံမှန်ဆို နှစ်နာရီကြာပေမယ့် သွေးကြောလေးချောင်းက ဆိုးဆိုးဝါးဝါး ပိတ်နေလို့ လေးနာရီကြာအောင် ခက်ခက်ခဲခဲ ခွဲစိတ်အောင်မြင်ခဲ့ပါတယ်။ ဆေးရုံက ဝန်ဆောင်မှုက ကောင်းပေမယ့် ဘီလ်တွေကို သေသေချာချာ စစ်ဖို့လိုပါတယ်။ စင်္ကာပူက မကြီးတို့စုံတွဲလည်း လာရောက်တာမို့ စန်းထွန်းကလွဲရင်  မိသားစုတွေ့ဆုံပွဲလေးပေါ့။ တညီတညွှတ်တည်း ပြောကြတာက ဘန်ကောက်က အစားအသောက်တွေ သိပ်ကောင်းဆိုပဲ။

၂၀၁၂ မှာ အချစ်ရေးက လွဲရင် အလုပ်၊ ကျန်းမာရေး၊ ပညာရေး၊ မိသားစု၊ သူငယ်ချင်း သင့်တင့်တယ့် နှစ်လေးပါပဲ။  ခရစ်စမတ်နဲ့နှစ်သစ်ကူးမှာ ဆူနမ်၊ ရာမားရှိရာ ဝါရှင်တန်ဒီစီမှာ ရှိနေပါမယ်။ ပို့စ်အတွက် နာမည်စဉ်းစားတာ ဂွတ်ဘိုင် ၂၀၁၂  ကို ကိုညီလင်းသစ်က အရင်ဦးသွားတယ်။ ၂၀၀၁ ဂျပန်စာ တစ်လသင်တန်း တက်တုန်းက ပြန်မတွေ့ဖြစ်တော့ရင် ဆာယိုနာရလို့နှုတ်ဆက်ကြတယ်လို့ သင်ခဲ့ဖူးပါတယ်။ ကုန်ဆုံးသွားတယ့် နှစ်ဟောင်းကို ဆာယိုနာရ ၂၀၁၂ လို့ နှုတ်ဆက်ပြီး  မျှော်လင့်ခြင်းတွေ၊ ရည်မှန်းချက်တွေနဲ့  နှစ်သစ်ကို ကြိ ုဆိုလိုက်ရအောင်။

ဘလော့ကို အမြဲလာရောက်သူတွေ၊ ရံဖန်ရံခါမှ လာရောက်သူတွေ၊ သူငယ်ချင်းတွေကို မင်္ဂလာရှိသော နှစ်သစ်ဖြစ်ပါစေလို့ ဆုတောင်းရင်း

ဆာယိုနာရ ၂၀၁၂

စန်းထွန်း
ဒီဇင်ဘာ ၂၆၊ ၂၀၁၂။

အချိန်ရမှ နားဆင်ပါ - ၁

ကန်တက်ကီနားရဲ ့အကြိ ုက်ဆုံး ရေဒီယို စတေရှင်းတွေကတော့ 99.7 နဲ့95.0 အဖ်အမ်တွေပါ။ 95.0 ကတော့ Symphony  အော်ပရာတွေပဲ လွှင့်ပြီး  ( စင်္ကာပူ  Symphony 92.4 fm ကို ပိုကြိ ုက်တယ် )  99.7 ကတော့ ဟစ်ဖြစ်တယ့် သီချင်းတွေ လွှင့်ပါတယ်။  ရေဒီယိုမှာ နားထောင်ရပြီး ဘေဘုတ်မှာ ရှာကြည့်တော့မှ သီချင်းနာမည်နဲ့ အဆိုတော်ကို တွဲမိတော့တယ်။ အချိန်ရရင် နားဆင်သွားပါဦးနော်။



Moroon 5 ရဲ  ့ One More Night ... အသံ၊ တီးလုံး ကောင်းမွန်တာမို့ နံပါတ်တစ် ချိတ်ပါတယ်။


Maroon 5 ရဲ  ့ Payphone ကလည်း နားထောင်လို့ ကောင်းတယ်။


Kesha ရဲ  ့ Die Young သီချင်းကလည်း နားထောင်ကောင်းတယ်။



စစ်ချီတေးလို ဗုံသံ ခပ်ပြင်းပြင်းလေးနဲ့ တင်ဆက်ထားတော့ အစတုန်းက ၂၀၁၀ ကမ္ဘာ့ဖလား အဖွင့်သီချင်း Waving Flag  ဆိုတယ့် K'naan လို့ထင်နေတာ..ခုတော့  fun အဖွဲ့ရဲ့  Some Nights  ပါတယ့်။ အဲဒီအဖွဲ့ကို သိဘူးရယ်။



ရေဒီယိုမှာ နားထောင်ရပြီးကတည်းက  နှစ်သက်နေတာ..ခုမှ သိတယ် Fun အဖွဲ့ရဲ့ We are Young ပါတဲ့။




နံပါတ် ၅ ချိတ်ပြီး ယူကျူမှာ လူကြည့်အများဆုံးနဲ့ အမ်တီဗွီဆု သိမ်းပိုက်သွားပြီး ရယ်လည်းရယ်ရ အားလုံးနှစ်သက်ကြတယ့် ကိုရီယားက PSY ရဲ့ ဂဏ္ဏန်းစတိုင် GANGNAM STYLE ကို အမေရိကန်တွေလည်း ကြိုက်ကြပါတယ်။ သူတို့ထက် အသက်ကြီးတယ့် ချစ်သူကို ကိုရီးယားကောင်မလေးတွေက အိုပါးလို့ ခေါ်ကြတယ်ဆိုတော့ အမေရိကန်မတွေကလည်း  သူတို့ထက် အသက်ကြီးတယ့် ချစ်သူကို ဒက်ဒီလို့ ခေါ်တာနဲ့ တူပါသတဲ့။



အမေရိကန်အဆိုတော်မလေး Taylor Swift  ရဲ့ We are Never Ever Getting Back Together က မြူးမြူးကြွကြွလေး။



၂၀၁၁ အမေရိကန်အိုင်ဒေါ Philip Philips ရဲ့ Home ။ အကြိုက်ဆုံးနေရာလေးက သံပြိုင်ဆိုတယ့် အိုး..အို..အိုး..အို..အို..အိုး နေရာလေးဆိုရင် ရယ်ကြမလား။

သီချင်းလေးတွေ နားဆင်ရင်း ပျော်ရွှင်စရာ အချိန်လေးတွေ ပိုင်ဆိုင်ပါစေ။

စန်းထွန်း
နိုဝင်ဘာ ၁၆၊ ၂၀၁၂။

ရက်ကွက်ထဲမှာတော့ဗျာ - ၁၆

ရင်သားကင်ဆာ လမ်းလျှောက်ပွဲမှာ ပါဝင်မယ့် ကုမ္ပဏီကိုယ်စားပြ ုအသင်းအတွက် နာမည်ရွေးရာမှာ စန်းထွန်းရဲ့ Vogt Venus ၊ တခြားသူတွေရဲ ့ Team Ta Ta ၊ The Rack Pack ၊ The Boobie Brigade ၊ Bodacious Ta Tas ၊ Vogt Voluptuous Voom Vooms အမည်တွေကို ဒီမိုကရေစီနိုင်ငံပီပီ မဲပေးကာ ရွေးချယ်ပါတယ်။ မဲအများစုနဲ့The Rack Pack က အနိုင်ရသွားပါတယ်။ Rack ဆိုတာ ရင်သားကို ခေါ်တာပါတဲ့ ။  အရင်အသင်းနာမည်တွေကတော့ Vogt Vixens, Vogt's Voluptuous Vixens, Vogt's Breast Friends ပါတဲ့ ခင်ည။ ကြသပတေးနေ့အထိ ဒေါ်လာ ၈၆၀ ပဲ ရသေးတာမို့ ရည်မှန်းချက် ဒေါ်လာတစ်ထောင် ပြည့်မှီရေး လှုဒါန်းဖို့ နှိုးဆော်စာတွေ ရုံးရဲ့ထင်သာမြင်သာရှိတယ့် အိမ်သာတွေ၊ တံခါးတွေမှာ ကပ်ပြီး နှိုးဆော်ပါတယ်။

အောက်တိုဘာ ၂၈ တနင်္ဂနွေနေ့မှာတော့ ကန်တက်ကီပြည်နယ် လူဝီဗီလ်မြို့ရဲ့ Waterfront ပန်းခြံမှာ ရာသီဥတု အအေးဒဏ်ကို အံတုပြီး ကလေးတွေပါမက ခွေးလေးတွေကလည်း သခင်တွေနဲ့အတူ ၊ ယောကျ်ားလေးတွေကလည်း  I walk for Granny. In memory of ဘယ်သူဘယ်ဝါတွေအတွက် အောက်မေ့သတိရ လမ်းလျှောက်ပြီး Making Strides Against Breast Cancer ပွဲ ဆင်နွှဲပါတယ်။ ။ အသင်းအဖွဲ့လိုက် တူညီဝတ်စုံတွေလေးတွေနဲ့ ပန်းရောင်ကမ္ဘာလေး ဖန်တီးကြပါတယ်။ ရင်သားကင်ဆာကို အောင်မြင်စွာ တိုက်ပွဲဝင်ခဲ့နိုင်သူများကို Suvivor ပန်းရောင်စလွယ်လေးတွေ ဝတ်ဆင်စေပါတယ်။

We are survivors
credit to uploader Making Strides,Louisville,KY on facebook


Survivors
 credit to uploader Making Strides,Louisville,KY on facebook

ရင်သားကင်ဆာဟာ အမျိုးသမီးတွေရဲ့ အသက်ဇီဝိန်ခြွှေတယ့် ရောဂါဆိုးကြီးပါ။ စောစောသိရင် ပျောက်ကင်းအောင် ကုသနိုင်ပါတယ်။ အမျိုးသမီးတွေ အသက် ၄၀ ကျော်လာရင် မန်မိုဂရမ်လို့ခေါ်တယ့် ရင်သားစစ်ဆေးချက်ကို နှစ်စဉ် စစ်ဆေးသင့်ပါတယ်။ အိမ်ရှင်အစ်မကတော့ သူ့အဘွားက ရင်သားကင်ဆာနဲ့ ဆုံးသွားတာမို့ ၄၀ မတိုင်မှီ စစ်ဆေးနေရပါတယ်။ THC လို့ခေါ်တယ့် ဆေးရွက်ကြီးမှာ ပါတယ့် ဓာတ်တစ်မျိုးက ရင်သားကင်ဆာဖြစ်ပွားနူန်း မြှင့်စေပါတယ်။ အဲဒီဓာတ်ပါဝင်တယ့် ဆေးရွက်ကြီးကို ကန်တက်ကီပြည်နယ်မှာ တရားမဝင်ဖြစ်အောင် ပြည်နယ်အစိုးရက ကြိုးပမ်းနေပါတယ်။ အမျိုးသားတွေလည်း ရင်သားကင်ဆာ ဖြစ်ပွားနိုင်တယ်လို့ ကြေငြာတာ ကြားလိုက်ရတယ်။  အမျိုးသားတွေမှာသာ ဖြစ်ပွားတယ့် ကင်ဆာတစ်မျိုး (Prostate Cancer) အထိမ်းအမှတ်အတွက်  နိုဝင်ဘာလမှာ အမျိုးသားတွေဟာ မုတ်ဆိတ်မွှေးမရိတ်ဘဲ No Shave November ဆင်နွှဲပါသတဲ့။

credit to uploader Making Strides,Louisville,KY on facebook
credit to uploader Making Strides,Louisville,KY on facebook
လမ်း‌လျှောက်လို့ရပြီ
credit to uploader Making Strides,Louisville,KY on facebook
ဖဲကြိုးဖြတ်ဖွင့်လှစ်လိုက်ပြီ
credit to uploader Making Strides,Louisville,KY on facebook
ပန်းခြံကနေ စကာ မြို့ထဲလမ်းတွေ ဖြတ်ပြီး ကန်တက်ကီပြည်နယ်နဲ့ အင်ဒီယားနားပြည်နယ်ကို ဆက်သွယ်ထားတယ့် တံတားကြီးကို ဖြတ်၊ တံတားဆုံးရင် ပြန်လှည့်ကာ ပန်းခြံမှာ ပန်းဝင်ရပါတယ်။ နေ့လည် ၁ နာရီမှာ စပြီး ၂နာရီခွဲမှာ ပြီးပါတယ်။ ကလေးတွေ ပါတော့ ၁နာရီခွဲသာသာ လျှောက်ရပါတယ်။ တံတားမှာ အဘွားတစ်ယာက် ပစ်လဲသွားလို့ ရဲကားက လမ်းရှင်းကာ လူနာတင်ယာဉ် ရောက်လာပြီး ကုသပါတယ်။ လူဝီဗီလ်မြို့ဂုဏ်ဆောင် ၁၉၆၃ ကတည်းက အိုဟိုင်းရိုးမြစ်တလျှောက် ပြေးဆွဲနေတယ့် အမေရိကန်နိုင်ငံရဲ့ နောက်ဆုံးလက်ကျန် ရေနွေးငွေ့နဲ့မောင်းတယ့် အပျော်စီးသင်္ဘောကြီး The Belle of Louisville ကလည်း တဘော်ဘော် အသံပေးကာ တံတားပေါ် လမ်းလျှောက်နေသူများကို ဂုဏ်ပြုပါတယ်။ တံတားအောက်က ဖြတ်မောင်းသွားတယ့် ကားတွေကလည်း တတီတီ ဟွန်းသံပေးကာ အားပေးပါတယ်။ အထက်တန်းကျောင်းသားတွေကလည်း ဗုံတွေ၊ ဘင်ခရာတွေ တီးကာ ကြိုဆိုပါတယ်။
ဒီလို ဆင်နွှဲကြတယ်
credit to cancer.org/stridesonline
တံတားဆီသို့
credit to uploader Making Strides,Louisville,KY on facebook
တရေွှ့ရေွှ ့ချီတက်
credit to uploader Making Strides,Louisville,KY on facebook
ဒီလို အားပေးကြတာ
credit to uploader Making Strides,Louisville,KY on facebook
လူဝီဗီလ်ရဲ့ မိန်းမပျို
၂၀၁၄ အောက်တိုဘာမှာ ရာပြည့်မွေးနေ့ဆင်နွှဲတော့မှာမို့လို့
အမေရိကန်နိုင်ငံရဲ့ ရေနွေးငွေ့သင်္ဘောသမိုင်းမှာ
သူမလောက် ဘယ်သူမှ အောင်မြင်မှု မရခဲ့ပါဘူးတယ့် ခင်ည
credit to Google
အိုဟိုင်းရိုးမြစ်ပေါ်က မိန်းမပျို
credit to Google
The Rack Pack team of Vogt Power International
credit to Robert C. Lescinski
ရာသီဥတုအေးလို့ ဟိုရိုက်ဒီရိုက်ဖို့ထား လက်တောင် အင်္ကျီထဲက မထုတ်ချင်တယ့် စန်းထွန်းတယောက် ဂူဂယ်လက်ရာတွေနဲ့ ဆားချက်ပါတယ် ခင်ညာ။  အောက်တိုဘာ ၃၁ မှာတော့ အမေရိကန်တဝှမ်း ဟောလိုဝင်းပွဲတော် ဆင်နွှဲကြပါတယ်။ အင်္ကျီဆန်းဆန်းလေးတွေ ဝတ်ဆင်ကာ တချို့ကလည်း မျက်နှာမှာ ကြောက်မက်ဖွယ် ဆေးရောင်တွေ ခြယ်လို့ အိမ်ပေါက်စေ့လိုက်ကာ Trick or Treat ဆိုပြီး သကြားလုံးတောင်းကြပါတယ်။

credit to google
credit to google
ဆောင်းဦးရဲ့ သင်္ကေတ ရွှေဖရုံသီး၊ ရိုးပြတ်၊ ပြောင်းဖူးခြောက်
credit to google
အောက်တိုဘာ ၃၀မှာ အမေရိကန် အရှေ့ဖက်ကမ်းခြေ နယူးဂျာစီပြည်နယ်ဖက်ကို အင်အားအလွန်ကောင်းတယ့် စန္ဒီမုန်တိုင်း ဝင်တိုက်ပါတယ်။ စန္ဒီမုန်တိုင်းဟာ မြောက်ဖက်က နှင်းမုန်တိုင်းနဲ့ ဆုံပြီး အမေရိကန်သမိုင်းမှာ မကြုံဖူးအောင် အားအလွန်ကောင်းတယ့် မုန်တိုင်းအဖြစ် ဝင်ရောက်မှာမို့လို့ သတိပေးမှုတွေ၊ ကြိုတင်ပြုဆင်မှုတွေ လုပ်ပါတယ်။ သမ္မတအိုဘားမားကတောင် မုန်တိုင်းဝင်တိုက်နေကျပေမယ့် ဒီမုန်တိုင်းက အားအလွန်ပြင်းတယ့် မုန်တိုင်းမို့လို့ ပြည်သူတွေကို မပေါ့ဆဖို့၊ ရွှေ့ပြောင်းရမယ့်ဇုန်က ပြည်သူတွေကို ရွှေ့ပြောင်းဖို့၊ ရထားတွေ၊ ဘတ်စ်ကားတွေကို ရပ်ဆိုင်းမှာမို့ အဲဒီအချိန်မတိုင်မှီ အဆင်သင့်ဖြစ်နေဖို့၊ ပြည်နယ်အုပ်ချုပ်ရေးမှုးတွေရဲ့ စကားကို လိုက်နာဖို့ အသေအချာ သတိပေးပါတယ်။ မဲဆွယ်ပွဲဖျက်သိမ်းလိုက်ရတော့ မဲနိုင်ရရှိရေးအတွက် စိတ်မပူဘူးလား မေးတော့ မဲဆွယ်ပွဲတွေထက် ပြည်သူတွေ မုန်တိုင်းကို ကောင်းကောင်းရင်မဆိုင်မှာကို စိတ်ပူမိပါတယ်လို့ သမ္မတအိုဘားမားက ဖြေကြားပါတယ်။ အရေးကြီးတယ့် မဲဆွယ်ပွဲတွေ ဖျက်သိမ်းကာ မုန်တိုင်းကို အနီးကပ် စောင့်ကြည့်ပြီး လိုအပ်တာတွေ  သမ္မတက အမိန့်ပေးပါတယ်။

credit to Google


လေတိုက်နှုန်း တနာရီ မိုင်၁၀၀ နီးနီး ရှိကာ သစ်ပင်တွေပြို၊ ရေတွေကြီး ၊ လျှပ်စစ်အားတွေ ပြတ်တောက်၊ နယူးယောက် မက်ဟန်တန်လို အနိမ့်ပိုင်းမှာ ရေတွေကြီး၊ မြန်မာတွေ အနေများတယ့် ကွင်းစ်ဖက်မှာ ထရန်စဖော်မာပေါက်လို့ မီးတွေလောင်၊ ၉၁၁ ကို ခေါ်ဆိုသူများလို့ တခြားလိုင်းကို ခေါ်ဆိုဖို့ ပြောရတယ့် အထိ။ နယူးဂျာစီပြည်နယ်မှာ ရေတွေကြီး၊ လေတွေထန်ပေမယ့် အနောက်ဗာဂျီးနီးယား ပြည်နယ်မှာတော့ နှင်းထု ၅လက်မ ကျပါတယ်။ မုန်တိုင်းကြောင့် ၈၀ကျော် သေဆုံးပြီး အများစုက နယူးယောက်ဖက်ကပါ။ အေးချမ်းတယ့်ရာသီမှာ သန်းချီတဲ့ ပြည်သူလူထုဟာ လျှပ်စစ်မီးမရရှိဘဲ နေရပါတယ်။


credit to Google
နယူးယောက်က ဘလော့ဂါ မမီးငယ် တယောက် အဆင်ပြေရဲ့လားမသိ ။ အခုအချိန်မှာတော့ နယူးယောက်ဖက်က ရထားလိုင်း၊ ဘတ်စ်ကားလိုင်း တော်တော်များများ ပြန်ဖွင့်ပါပြီ။ လျှပ်စစ်ကုမ္ပဏီတွေလည်း လျှပ်စစ်မီး အမြန်ဆုံးပြန်ရဖို့ အင်တိုက်အားတိုက် ဆောင်ရွက်နေပါတယ်။ မုန်တိုင်းဒဏ်ခံရတယ့် ပြည်နယ်တွေကို သမ္မတက အရေးပေါ်ပြည်နယ်အဖြစ် ကြေညာလိုက်တာမို့လို့ ပြန်လည်တည်ထောင်ရေး ရန်ပုံငွေတွေ ရရှိပြီး အရင်အခြေအနေ ပြန်ရောက်ဖို့ ကြိုးပမ်းပါတယ်။ မုန်တိုင်းဒဏ် ကင်းလွှတ်တယ့် အနောက်ဖက်ခြမ်း ကယ်လီဖိုးနီးယားပြည်နယ်ဖက်က လှုဒါန်းတာတွေ မုန်တိုင်းသင့် ပြည်သူတွေဆီ အမြန်ဆုံးရောက်ရှိဖို့ စစ်တပ်လေယာဉ်တွေ သုံးစွဲဖို့ သမ္မတက ညွှန်ကြားထားပါတယ်။ မုန်တိုင်းဒဏ်ခံရတယ့်ဒေသတွေကို မုန်တိုင်းပြီးနောက်နေ့မှာပဲ သမ္မတကိုယ်တိုင် သွားကြည့်ပါတယ်။

နယူးယောက်မြို့ကြီး အမှောင်ကျနေပုံ
credit to Google
မီးေဘးသင့်ရာနေရာ
credit to Google
credit to Google
သမ္မတရဲ့ဦးဆောင်မှု အရည်အချင်းကို မုန်တိုင်းတိုက်ချိန်မှာ ပြသလိုက်တာမို့ အရင်က ရီဘာပလင်ကန် အခုတော့ ဘယ်ပါတီမှ မဟုတ်တယ့် နယူးယောက်မြို့တော်ဝန်က သမ္မတအိုဘားမားကို ချီးမွမ်းပြောဆိုပြီး အမှတ်ပေးလိုက်ပါတယ်။ စန္ဒီမုန်တိုင်းကြောင့် မုန်တိုင်းသင့် ဒေသတွေမှာ သမ္မတအိုဘားမားက မဲဆွယ်စရာ မလိုဘဲ နိုင်သွားပြီလို့ ပြောဆိုကြပါတယ်။

နိုဝင်ဘာ ၄ ရက်က စပြီး မနက် ၇ ၁၅ ဆို နေထွက်၊ ည ၅ ၄၀ ဆို နေဝင်၊ ည ၆ နာရီဆိုရင် လုံးဝမှောင်သွားပြီ။ မတ်လ ၁၁ရက် မနက် ၂ နာရီမှာ  စတင်ခဲ့တဲ့ DayLight Saving Time ဟာ နိုဝင်ဘာ ၄ ရက် မနက် ၂ နာရီမှာ ကုန်ဆုံးတာမို့  DayLight Saving Time တုန်းက တနာရီ ရှေ့တိုးထားတာ အခုတော့ တနာရီ နောက်ဆုတ်ပါတယ်။ နိုဝင်ဘာ ၅ ရက်ကတော့ အမေရိကန် ဆရာများနေ့မို့ ကျောင်းတွေ ပိတ်ပါတယ်။ စန္ဒီမုန်တိုင်းမှာ ဦးဆောင်မှု အရည်အချင်း ပြသနိုင်လို့ အိုဘားမားက နိုင်မလား၊ စီးပွားရေး ကျွှမ်းကျင်လို့ သူ သမ္မတဖြစ်လာရင် စီးပွားရေးများ ဦးမော့လာမလားဆိုပြီး ရွှန်မနီက နိုင်မလား။ နိုဝင်ဘာ ၆ရက်နေ့မှာ အမေရိကန်ပြည်သူတွေရဲ့ ရွေးချယ်မှုက ဘယ်သူပါလဲ။

စန်းထွန်း
နိုဝင်ဘာ ၃၊ ၂၀၁၂။

ရက်ကွက်ထဲမှာတော့ဗျာ - ၁၅

မမအိုင်အိုရာ အညွှန်းကောင်းလို့ ပထမဦးဆုံးသော ကိတ်မုန့်လက်ရာ။ ကြက်ဥ ၃လုံး၊ ဆီ ဖန်ခွက်တဝက်၊ ရေ ဖန်ခွက်တခွက်နဲ့ ၂ဒေါ်လာတန် အဲဒီတံဆိပ်အမှုန့်ကို ရောသမမွှေ။ ဖုတ်မယ့်ဗန်းကို ထောပတ်သုတ်၊ ၃၅၀ ဒီဂရီနဲ့ ၄၅မိနစ်လောက် ထားလိုက်ရင် အရသာရှိလှတဲ့ ကိတ်မုန့်လေး ရပါပြီ။ မမအိုင်အိုရာ လေသံအတိုင်း ပြောရရင် စူပါအီးဇီး.. း )


နိုဝင်ဘာ ၁၀ မှာ ဖြေရမယ့် ကွန်ပျူတာဂရပ်ဖစ် ဘာသာအတွက် မှတ်စုထုတ်ရင်း စာအုပ်တခြား၊ အဖုံးတခြား ဖြစ်နေတဲ့ စာအုပ်အဖုံးလေးကို မြင်မိတော့ ဓာတ်ပုံရိုက်လိုက်တယ်။ စာတော့ မသိဘူး..စာအုပ်တော့ ကြေနေပြီ  း D ။ ဆူနမ်နဲ့ ရာမား ပေးထားတယ့် မိုင်သောင်းချီအဝေးကနေ သယ်လာတဲ့ ဗလာစာအုပ်။ နီပေါနိုင်ငံရဲ့ အမှတ်သင်္ကေတ ကမ္ဘာ့အမြင့်ဆုံးး ဧဝရက်တောင်၊  အတန်း၊ ခုံနံပါတ်၊ ဘာသာ၊ ကျောင်းနာမည်တွေ ရေးဖို့ နီပေါနိုင်ငံ မြေပုံလေးရယ်။


အလုပ်ဝင်တာ ခြောက်လပြည့်လို့ အမြဲတမ်းဝန်ထမ်းခန့်ဖို့ မေးကြည့်တာ စန်ထရယ်အင်ဂျင်နီယာဌာနကို ဘတ်ဂျက်ဖြတ်ထားလို့ မခန့်နိုင်ပါဘူးတယ့် ခင်ည။ အခုက ကျောင်းသားဗီဇာ F1 ။  Curricular Practical Training  (CPT)  အလုပ်အချိန်ပြည့်လုပ် Distance Education (DE) Courses တွေ တက်နေရတဲ့ W2 အလုပ်လုပ်ခွင့်ပါမစ်ကို ကျောင်းက စပွန်ဆာပေးထားတာပါ။ အဲဒါက ၂၀၁၃ ဒီဇင်ဘာဆို ကုန်ပြီ။ စတိတ်မှာ ဆက်နေချင်ရင် အလုပ်ရှင်က H1B စပွန်ဆာပေးတယ့် အလုပ်ကို ရှာနေရပါပြီ။ အင်တာဗျူးတွေမှာ H1B စပွန်ဆာပေးလား မေးလိုက်ရင် ဆောရီးတွေကများလို့ စန်းထွန်းတယောက် ဆယ့်တစ်ကျပ်ကျ အဲ စိတ်ဓာတ်ကျနေတာပေါ့ ခင်ညာ။ စလုံးမှာ အီးပီ၊ အက်စ်ပတ်စ်တို့ကို အလုပ်ရှင်က လျှောက်ပေးသလိုမျိုးပေါ့။ အလုပ်တူရင်တောင် ဂရင်းကဒ်၊ စီးတင်းဇင်တွေက လစာပိုများတယ်။ နိုင်ငံခြားသားဆိုတာ နိုင်ငံသားနဲ့ အခွင့်အရေး ကွာတယ်။


မြို့အသစ်၊ အလုပ်အသစ်၊ လူအသစ်တွေနဲ့ အသားကျဖို့ ခြောက်လလောက် အချိန်ယူရတယ်။ ဟော..အသားကျလို့ ဒီကုမ္ပဏီ၊ ဒီမြို့၊ ဒီလူတွေကို ကြိုက်ပါတယ်ဆိုကာမှ ရေစက်ကုန်လို့ ခွဲရပြန်ဦးမယ်။ ဘယ်ဆီဘယ်ဝယ်မှန်းမသိ။ ဆောင်းဦးကာလမှာ သစ်ရွှက်တွေက အဝါရောင်၊ လိမ္မော်ရောင်၊ အနီရောင်တွေပြောင်းတာ တော်တော်လှတယ်။ ရာသီဥတုကလည်း သိသိသာသာ အေးလာပြီ။ အခုတော့ အပင်တွေက ရိုးတံကျဲကျဲ  ဆောင်းလေအဝှေ့မှာ သစ်ရွှက်ကြွေတွေက ဝေ့ဝဲလို့။

တုပ်ကွေးရာသီချိန်မို့ တုပ်ကွေးကာကွယ်ဆေးတွေ စတိုးဆိုင်ကြီးတွေ၊ ရုံးတွေမှာ အခမဲ့ ထိုးပေးနေပါတယ်။ တုပ်ကွေးဖြစ်တာကို ကာကွယ်ပေးပြီး တကယ်လို့ ကွေးခဲ့ရင်လည်း ကွေးချိန် တိုပါတယ်တဲ့။ အဲ နည်းနည်းတော့ ဟပ်ချိုးတယ်။ မတည့်တာကတော့ အတော့်ကို ဖြစ်နိုင်ချေ နည်းပါတယ်တဲ့။ အလကားဆို လက်မလွှတ်တယ့် စန်းထွန်းတယောက် ကာကွယ်ဆေးထိုးပါတယ်။ ပုရွှတ်ဆိတ်ကိုက်သလောက်သာ နာပေမယ့် နောက်နှစ်ရက်ကတော့ လက်မောင်း နာတယ်။ နမိုးနီးယားကာကွယ်ဆေးလည်း ထိုးလို့ရတယ်။ အိမ်ရှင်ရယ်၊ ပီတာရယ်က အားမပေးတာနဲ့ မထိုးလိုက်တော့ဘူး။


တုပ်ကွေးကာကွယ်ဆေးကို ဘယ်အချိန်လောက်ကစပြီး အမေရိကန်မှာ သုံးနေတာလဲဆိုတော့ ငါ ငယ်ငယ်ကတည်းကတဲ့။ အိမ်ရှင်က ၃၈ နှစ်။ မြန်မာပြည်မှာ တုပ်ကွေးချိန်ဆို ဟိုင်းကြီးတနယ်လုံးက ကလေးတွေ နယ်လုံးကျွှတ် ကွေးကြတာ သတိရတယ်။ တုပ်ကွေးပြင်းရင် အသက်ပါသွားနိုင်တယ်။ ဒန်းကီး(တုပ်ကွေး) ဖြစ်စေတဲ့ ခြင်၊ ပိုးဟပ်၊ ကြွက်၊ အကောင်ပလောင်တွေဆို စလုံးတွေက သိပ်ကြောက်ကြတာ။ ရွှေမြန်မာတွေကတော့ လာထား တုတ်နဲ ရိုက်၊ တစ်ရှူးနဲ့ ဖမ်း ။  ခြင်ကိုသာမက ကိုယ့်ကိုကိုယ်ပါ ဆော်တတ်တယ့် သူတွေမလား ဒီလောက်တော့ အပျော့။ တွေးမိတယ် အဲဒီတုပ်ကွေးကာကွယ်ဆေးသာ မြန်မာတနိုင်ငံလုံးက ကလေးတွေကို အခမဲ့ထိုးပေးနိုင်ရင် ဘယ်လောက်များ ကောင်းမလဲနော်။

အရင်ပို့တုန်းက လာဗင်ဒါလို့နာမည်ပေးထားတဲ့ မြက်ပင်တွေ ခုတော့ အသီးသီးနေကြပြီ
ရှေ့တပတ်ကတော့ ဆူပါဗိုက်ဆာကို စိတ်ဆိုးလွန်းလို့ နေ့လယ်စာလည်း မစားနိုင်၊ အသားတွေ အဆတ်ဆတ်တုန်၊ ခေါင်းတွေကိုက်။ တူရကီလေး မူဆာဖာ အလုပ်မရှိလို့ အလုပ်တောင်းတာ သူက တူရကီကို မကြာမှီ ပြန်တော့မှာ ပရောဂျက်တန်းလန်းဖြစ်နေမှာမို့လို့ အလုပ်မပေးနိုင်ပါဘူးတဲ့။ ပြီးတော့ ပိုက်ဆံလေလွင့်တယ်လို့ပြောလိုက်သေးတယ်။ အလုပ်မပြီးရင် သူ့အပြစ်၊ အလုပ်မရှိတာက သူ့အပြစ်မဟုတ်ဘဲ ပြောခံရတော့ မူဆာဖာ ဒေါသအမျက် ခြောင်းခြောင်းထွက်။ ဒါပေမယ့် သူက ဂျရတ်ကို ဘာမှမပြောဘူး။ ကိုယ့်အဖြစ်ကလည်း မူဆာဖာနဲ့ ထူးမခြားနား။ မဟုတ်မခံ ဆတ်ဆတ်ကျဲ စန်းထွန်းကတော့ မူဆာဖာလို ငြိမ်ခံမနေဘူးဗျ။ သွားချဲပစ်လိုက်တယ်။ မန်နေဂျာကိုပါ သွားတိုင်ပစ်လိုက်တယ်။ ကိုယ်မှန်လို့ကတော့ ဘူလီ လာမလုပ်နဲ့။ လုံးဝ ခံဘူး။ ခုတော့ ဂျရတ်တယောက် စန်းထွန်းကို မော်မကြည့်ရဲဘူး။ အဲ.. ငုံ့တော့ ကြည့်ရတယ်  း ) ။


အိမ်ရှင်မိဘတွေက လယ်လုပ်ကြတာမို့ သူတို့နိုင်ငံက စိုက်ပျိုးနည်းစနစ်ကို စပ်စုကြည့်ပါတယ်။ ဒီနှစ် ဒီလယ်ကွက်မှာ ပြောင်းစိုက်ရင် နောင်နှစ်မှာ မြေပဲ၊ ဝါဂွမ်း အလှည့်ကျ စိုက်ပျိုးနည်းစနစ်ကို သုံးပါတယ်။ လယ်ကွက်ထဲကမြေကို သုတေသနဌာနကို ပို့လိုက်ရင် မြေဆီလွှာမှာ ဘာဓာတ်တွေ၊ ဘယ်လောက်အချိုးအစား ရှိနေတာမို့ ဘယ်အပင်စိုက်သင့်တယ်လို့ ညွှန်ကြားပါတယ်။ သဘာဝဘေးဒဏ်ကြောင့် အသီးအနှံမအောင်ရင် အစိုးရက ရင်းနှီးစိုက်ပျိုးသမျှ ကျသလောက်ကို ပြန်ပေးပါတယ်တဲ့။ ရှုံးလို့ လယ်သမားတွေ လယ်မစိုက်တော့ရင် ဘယ်သူတွေ စိုက်ပျိုးကြမလဲနော့။ လယ်သမားတွေရဲ့ ထုတ်ကုန်တွေ ဈေးကွက်ထဲမြန်မြန်ဆန်ဆန် ရောက်ဖို့လည်း ကူညီပါတယ်။ ကုန်စည်စီးဆင်းမှု မကောင်းလို့ အသီးအနှံတွေ ပုပ်သိုးပြီးမှ ဈေးကွက်ထဲရောက်ရင် စိုက်ပျိုးသမျှ အလကားပါပဲ။ စတိတ်က အသီးအနှံတွေက ကြီးပေမယ့်လည်း နူးညံ့တယ်။ ဒီမျိုးစေ့က အရသာ၊ ဒီမျိုးစိတ်က အနံ့၊ ဒီမျိုးစိတ်က ရောဂါခံနိုင်မှု အကောင်းဆုံးဆိုတာတွေယူပြီး မျိုးစိတ်ကို ပြုပြင်ပါတယ်။

မွှေးထုံအီလို့ ပျားပိတုန်းတကောင်က ဝတ်ရည်သောက်သုံးလို့

သမ္မတရွှေးကောက်ပွဲအတွက် အမေရိကန်တဝှမ်း မဲဆွယ်ပွဲတွေ ပြင်းထန်နေပါတယ်။ ရီဘာပလင်ကန် သမ္မတလောင်း ရွမ်နီနဲ့ ဒီမိုကရက်တစ် လက်ရှိသမ္မတ အိုဘားမားတို့ စကားစစ်ထိုးပွဲတွေ၊ သူတို့ သမ္မတဖြစ်ရင် ချမှတ်မဲ့ စီးပွားရေး၊ နိုင်ငံရေး ပေါ်လစီတွေ၊ ပြိုင်ဘက်ရဲ့ အမှားတွေထောက်၊ သာသာနဲ့နှာနှာလေးနှက်ကာ မဲဆန္ဒရှင်တွေကို ဆွဲဆောင်နေပါတယ်။ မဲအရေအတွက်က သိပ်မကွာနိုင်တော့ အကြိတ်အနယ် ရှိလှပါတယ်။ တိုင်းပြည်ရဲ့အနာဂတ်ဆိုတော့ အမေရိကန်ပြည်သူတွေလည်း စိတ်ဝင်တစားရှိလှပြီး ပြည်သူတွေကို အကောင်းဆုံးလုပ်ပေးနိုင်မယ်ထင်တယ့် သမ္မတကို ရွေးချယ်ကြတော့ပါမယ်။


ရီဘာပလင်ကန် အမာခံ တက္ကဆက်က လာတယ့် အိမ်ရှင်က အရင်က အိုဘားမားကို မဲပေးခဲ့ပေမယ့် ခုတော့ ရွမ်နီတဲ့။ သမ္မတရွှေးကောက်ပွဲဆိုတာ မမြင်ဘူးတဲ့ စန်းထွန်းတယောက် စတိတ်မှာ မဲပေးခွင့်မရှိပေမယ့်လည်း သမ္မတလောင်းတွေ အကြိတ်အနယ်မဲဆွယ်ကြတာ နားဆင်ရင်း တို့ရွှေမြန်မာပြည်ကြီးလည်း တနေ့နေ့တော့...

စန်းထွန်း
အောက်တိုဘာ ၂၈၊ ၂၀၁၂။

Singapore Botanic Garden

ဘလော့ဂင်းရင်း စင်္ကာပူရုက္ခဗေဒဥယျာဉ်ဆိုတာ တွေ့လိုက်ရတော့ ကိုယ်သွားခဲ့တာလေး သတိရသွားတယ်။ စန်းထွန်းတောင်တက်နေသည် - ၁ ပို့စ်တွေတုန်းက ဖလမ်းဖလမ်းထဖက် အဲလေ တောင်တက်ဖက် အိအိနဲ့ ၂၀၁၀ ဧပရယ်  Good Friday ပိတ်ရက်မှာ တခါ၊ စက်တင်ဘာမှာ ဘွဲ့ယူဖို့ ရောက်နေကြတယ့် ဖေ၊ မေ၊ မောင်မောင်တို့ကို လိုက်ပို့ပေးရလို့တခါ နှစ်ခါတိတိ ရောက်ပါတယ်။

စင်္ကာပူရောက်ရင် ရောက်သင့်တယ့်နေရာတွေထဲမှာ ဒီရုက္ခဗေဒဥယျာဉ်ကြီးလည်း ပါပါတယ်။ ဝင်ကြေးက အခမဲ့ပါ။ Buona Vista နဲ့ Orchard ပြေးဆွဲတယ့် ကားတွေစီး Gleneagles Hospital မှတ်တိုင်မှာ ဆင်းပြီး လမ်းကူးလိုက်တာနဲ့ ရောက်ပါပြီ။ Bukit Timah ဖက်ကလာရင် Singapore Botanic Garden မှတ်တိုင်မှာ ဆင်းတာနဲ့ ရောက်ပါပြီ။ Circle အဝါရောင်မီးရထားလိုင်းကြီး ပြီးသွားရင်တော့ ရထားစီးပြီး ရုက္ခဗေဒဥယျာဉ်မှတ်တိုင်မှာ ဆင်းရုံပဲ။ သစ်ခွဥယျာဉ် ဝင်ချင်ရင်တော့ စီနီယာစီတင်ဇင်၊ ကလေးတွေက အခမဲ့၊ ကျောင်းသားဆိုရင် ဒီစကောင့်နဲ့ ငါးကျပ်ပေးရပါတယ်။ ငါးကျပ်မပေးချင်လို့ အင်တင်တင်လုပ်နေတာ အိအိက နောင်ရောက်ဖြစ်မှာ မဟုတ်ဘူး ဝင်ရအောင်ဟာလို့ တိုက်တွန်းတာနဲ့ ဝင်ဖြစ်သွားပါတယ်။ ငါးကျပ်ပေးရတာ တကယ်တန်ပါတယ်။ အမျိုးအစားအစုံအလင် သစ်ခွပန်းကလေးတွေ မြင်ရတာ စိတ်ချမ်းသာပါတယ်။

ရုက္ခဗေဒ မှန်လှောင်အိမ်ထဲမှာ ကိုးတန်း၊ ဆယ်တန်း ဘိုင်အိုမှာ သင်ရတယ့် အပင်တွေ တွေ့ခဲ့သေးတယ်။


ဘွန်ဇိုင်းမျိုးစုံ၊ ကြာမျိုးစုံ၊ Symphony Lake မှာဆို တေးဂီတစင်ဆက်တယ့် အဆောက်အဦးတွေနဲ့ သာယာပါတယ်။ တနေ့တာ အပန်းဖြေစေမယ့် နေရာလေးပေါ့။ ရှုခင်းလှလို့ လက်ထပ်မင်္ဂလာဆင်နွှဲမယ့် မောင်နှံတွေ ဓာတ်ပုံအရိုက်များကြတယ့် နေရာလေးပါ။

အဲဒီတုန်းက ဘလော့ဂါ မဖြစ်သေးတော့ ရှုခင်းထက် ကိုယ့်ကိုကိုယ် ပြန်ရိုက်တာ များတယ်။ လှတယ့်နေရာလေးတွေ့ရင် အပြေးလေးကပ် လက်နှစ်ချောင်းထောင်လိုက်၊ ခါးလေးကုန်းလိုက်နဲ့ ပဲပေးနေတာများ မြင်ရသူ ရယ်ချင်စရာ။ သူများတွေက ရှုခင်းခံစားနေချိန်မှာ ဘယ်နေရာလေးမှာ ဘယ်လိုပဲပေးပြီး ရိုက်ရမလဲလို့စဉ်းစားနေတာကိုး။ နို့မို့ ဓာတ်ပုံဒီထက်များများ တင်နိုင်မှာ။ ( ဘုရား..ဘုရား တော်ပါသေးရဲ့ အဲဒီတုန်းက ဘလော့ဂါ မဖြစ်သေးတာ...သူ့ဟိုရိုက် ဒီရိုက်လက်ရာတွေနဲ့ နှိပ်စက်မယ့်ဒုက္ခက လွတ်သွားတယ်..  း D  )

အောက်ကသစ်ခွပုံကတော့ ကြွားတာ... း ) ။ မခိုင်ဆရာမဆီက ယူလာပြီး အိမ်မှာပွင့်တယ့် သစ်ခွလေးပါ။ Clementi အိမ်က နေရောင်ရတော့ ပွင့်လိုက်တာ။ ဘုရားပန်း အတော်ကပ်လိုက်ရတယ်။ Boon Lay အိမ်ပြောင်းတော့ နေရောင်မရလို့ သေသွားတယ်။

စင်္ကာပူရောက်ခဲ့ရင် ရုက္ခဗေဒဥယျာဉ်ကြီးကို သွားပြီး ခြေတို.. အဲလေ အပန်းဖြေကြပါနော်။

စန်းထွန်း
အောက်တိုဘာ ၁၅၊ ၂၀၁၂။